a26:2Mul 12:1-27; Mat 20:18
b26:7Luk 7:37-38
c26:11Lap 15:11
d26:15Sek 11:12; Ioa 11:57
e26:17Mul 12:14-20
f26:23Lex 41:9
g26:28Mul 24:8; Iel 31:31-34; Sek 9:11; 1Ko 10:16
h26:30Luk 22:39; Ioa 18:1
i26:31Sek 13:7; Ioa 16:32
j26:32Mat 28:7, 16
k26:34Mat 26:69-75
l26:38Ioa 12:27
m26:46Ioa 14:31
n26:51Ioa 18:26
o26:52Tav 9:6; Pal 13:10
p26:55Luk 19:47, 21:37
q26:61Ioa 2:19-21
r26:63Ais 53:7; Mat 27:12
s26:64Lex 110:1; Tan 7:13; Mat 24:30
t26:65Mat 9:3; Ioa 10:33
u26:66Liv 24:16; Ioa 19:7
v26:67Ais 50:6, 53:5
w26:75Mat 26:34

Matthew 26

Ane'i Misakii Vaikala sou Lexe Ivau Iesu Usoli

(Mak 14:1-2; Luk 22:1-2; Ioa 11:45-53)

No mine Iesu muvikala mukalu la muvikalane'i ta molomolo noxou aloxo 'o, a  “Ngingi ngelavusou lexe voxo tamei si'a uxolu sou nenge tasosovosou voxo e Lataua mupolopepene'i ta Isilaeli, la ino'u Itema 'Olu ilailixu no avo'a ta mitema sou ivau usoli.” La ta tatila noxi'a ta aili'i ilo'a ta tatilasi'a ta Isilaeli mipita no tani tatila noxou kisi'a ta aili'i ualasou lexe Kaiapasi, Sou ikamuli vote'i sou lexe itetelisou lesu mo ivau usoli a loxo vaa. Ane'i miavuti la mivikala lexe, “Maasi la nenge ta'oxonu mii e nenge tevivikalasou 'o no nixi no anu voxo tila 'o uasi. Xo loxo 'o io ta mitema imaisinge, la iavutinoxu 'oto'oto toxoxa'a.”

Sema Vile Minixi'u Ueli E Tuma'u Lailaixe no Kisou Iesu

(Mak 14:3-9; Ioa 12:1-8)

No mine Iesu muxolu ne Vetania la mulai mu'unalai no tani noxou itema vile ualasou lexe Saimoni. Anu Saimoni ne vulukali mu'oxonu tei. b Iesu mu'unalai mo mutalupexa sou lexe u'ani. Ia sema vile mino'u lavotoli sou ueli e tuma'u lailaixe vile ne lamoli sou tila misevile. Ane mino'u xe milai mixali noxou Iesu, la mixola'u anaxu ka minixi'u no kisou Iesu. Ia no mine ta molomolo noxou mimaisie aloxo ne, la ane'i la'iaxa'a, la mivikalane'i ngatongato'o lexe “Tava'u loxovaa ane sema 'o ivila'isou ueli e tuma'u lailaixe loxo 'o? Lexe uaisi mo sou tasovanu, la ilotonu no anu lamoli tatila manina, la sou tano'u la taiti'a ta mitema ane i'a mimii uasi.” 10 Ane'i mivivikalane'i ngatongato'o aloxo ne, la Iesu mulavusou la muvikalane'i aloxo 'o, “Iengi uvaxaiesi, loxovaa ane ngingi ngalosie tu'umaxu ane loxo ne? Mii e ane mi'oxonu mune'e noxilo ne, ane mi'oxonu laixe misevile. 11  c Ta mitema ane i'a mimii uasi ne, anu voxovoxo piepiena 'a uxoxolu sou ngingi ngaiti'a mimii loxo ngemasaxau, xo ngingi ngongi'a ngaxoxolu. Ia eni ne nenge nenge'a taxoxolu utotomu uasi. 12 Ane minixi'u ueli e tuma'u lailaixe no vasimelo tei loxo ne, sou ulalaxiinu vasimelo sou ulai no lulu. 13 Eni avikalangengi manina aloxo 'o. No xalexalee tuatuala ne'i ne, lexe ilai ia'aloxu a'alo laixe, la mii e ane mi'oxonu 'o ne, ane'i ia'aloxu kalumo sou ixavutalane.”

Iudasi Mulai Muxali Noxi'a ta Tatilasi'a ta Aili'i sou lexe Anu U'italonu Iesu Ulai Noxi'a

(Mak 14:10-11; Luk 22:3-6)

14 Xe Iudasi Isikarioti, anu vile noxi'a ta molomolou mavulovexa mo mulelia tamei ne, muavuti la mulai muxali noxi'a ta tatilasi'a ta aili'i, la mutali'isi'a aloxo 'o, 15  d  “Lexe eni a'italonu Iesu ulai no avonge, la ngingi ngalosilo ma'ia?” Xe ane'i miavuti la miitisou lamoli siliva muxali loxo mavulovexa tatalu la milosou. 16 La sou Iudasi muavuti sou ukamuli vote'i sou u'italonu Iesu no avo'a.

Iesu Ilo'a ta Molomolou Mi'ani

(Mak 14:12-21; Luk 22:7-13; Ioa 13:21-30)

17  e Voxo vile sou veleti imulaxu isi sou uasi 'a muxali, la ta molomolo noxou Iesu mine'e noxou la mitali'isou lexe, “Nini nemasaxa lexe nexi talalaxii la'ilalixene sou voxo sou Lataua Mupolopepene'i ta Isilaeli 'ava?” 18 La Iesu muvikalane'ixu itema vile, la sou mupalusi'a lexe, “Ngalai no nano no tuala tila ne Ielusalemu xe ngamaisou itema e epela'ingexu ne la ngavikalanu lexe, ‘Tisa mu'oxo lexe voxo noxilo 'a muxali 'alai. La sou nexi noxi'a ta molomolo noxilo ta'ani la'ilali sou ta sosovosou voxo sou Lataua Mupolopepene'i ta Isilaeli no tani noxine.’” 19 La sou ta molomolo noxou Iesu mi'oxonu aloxo Anu mupela'axu ne sou milalaxiinu la'ilali sou ixavutalanu voxo sou Lataua Mupolopepene'i ta Isilaeli.

20 Xe no 'olo'olovoxo la Iesu ilo'a ta molomolo noxou mavulovexa mo mulelia tamei ne milai mixolu mipita sou i'ani. 21 No mine ane'i i'ani'ani, la Iesu muvikalane'i aloxo 'o, “Eni avikalangengi aloxo 'o, vile no nixi noxinge ne, ulai la anu u'italoleli ulai no avo'a ta mitema sou 'oto'oto.” 22 Xe ane'i milomu aloxo ne, la opone'i tu'umaxu la sou ane'i vilevilesi miavuti la mitali'isou aloxo 'o, “Tila male eni uasi ne?” 23  f Xe Iesu muavuti la mukoline'i aloxo 'o, “Anu ane loxo nexi noxou ta'uinu la'ilali no anu lisi vilesisi, la anu moosou e sou u'italoleli no avo'a ta mitema ane. 24 Itema 'Olu ne, ulaisi mo uulua aloxo vaivaikalasou mikaukavunu no anu Lavuku Tavuna teinu. Ia itema e uitalonu itema 'olu ulai noxi'a ta mitema avo'a ne usaxila'u no anu tu'utu'umaxu. Anu laixe lexe nenu ivo'onu uasi, la anu laixesi.” 25 Xe Iudasi itema e sou u'italonu Iesu no avo'a ta mitema ne muavuti, la muvikalanu Iesu aloxo 'o. “Tila male eni ne?” La Iesu mukolinu lexe, “Ani, ninisi.”

Tila Uno'u Navunavu

(Mak 14:22-26; Luk 22:14-23; 1Ko 11:23-25)

26 No mine ane'i ilo'a i'ani'ani la Iesu mukasi mulu'e no anu veleti la muno'u sou muvikala laixe musuku noxou Lataua, xe mukalu, la muse'ise'inu sou mulosi'a ta molomolo noxou vilevilesi la muvikalane'i aloxo 'o, “Ngano'u mo nga'ou, anu vasimelo ane.” 27 Xe muavuti la mukasi vaxa no anu lisi sou uaini, la muvikala laixe musuku noxou Lataua. Xe mukalu la mulosi'a la muvikalane'i aloxo 'o, “Ngingi latala ne ngaiexu.” 28  g Mo muvikalane'i la aloxo 'o, “Sialuxo ano 'o. Eni asoli xe sialuxo unixi, la anu u'oxonu vaikala e nenge nenge'a Lataua tesakii 'o, uxali manina. Sialuxo 'o ne, sou unixisi'a ta mitema tavu'alo sou upamauline'i xe uxexeenu 'ili'ilixo masumasua noxi'a.” 29 La muvikalane'i la aloxo 'o, “Eni avikalangengi manina. Umomomo sou eni aie la no anu uaini temanu la uasi, ulai utalo no voxo ane sou nenge nenge'a taiexu ane alavua no tuala teitexi noxou Lataua.” 30  h Xe ilo'a mi'ani mukalu la milexe lexe vile sou milaa milai no laxa'ilu ne Olivu.

Iesu Mutotokalasou Pita Lexe Usingisou

(Mak 14:27-31; Luk 22:31-34; Ioa 13:36-38)

31  i Ilo'a milai xoo la Iesu muvikalane'i aloxo 'o la, “Maasi no 'olovoxo 'o, la ngingi latala 'o ne, nga'umesilo ukalusi. Xo mikaukavunu vaikala vile muxolu no anu Lavuku Tavuna teinu aloxo 'o, ‘Ulai la eni avau itema sou usaxila'a ta sipsip la ane'i ta sipsip ne i'ume ipeila'u tani.’ 32  j Ia ili'i, eni atulu sou amauli, la eni auli alai ne Xalilaia.” 33 Xe Pita muavuti la muvikalanu lexe, “Ulai la ane'i latala 'o ne i'ume'ume ukalusi, ia eni ne uasi.” 34  k Xe Iesu muavuti la mukolinu vaikala noxou lexe, “Eni avikalaneni manina aloxo 'o, maasi no 'olovoxo 'o la koko'a u'ava uao, ia nini nasingisilo alaxu tatalu lexe nalavusilo uasi.” 35 La Pita ne mutotoiti manina. Xe muavuti la muvikala pekia'u lexe, “Eni umomomo sou asingisine lexe eni alavusine uasi, uasi xo nenge nengei tasoli takei.” Mo Pita ta menexu ne mivikala kalumo aloxo ne.

Iesu Mukilaka ne Xetesemane

(Mak 14:32-42; Luk 22:39-46)

36 Ilo'a mimuamua'i xe mixali no lia xalee ilemolu lexe Xetesemane, la Iesu muvikalane'i ta molomolo noxou lexe, “Ngaxoxolu 'o ia eni alai mo akilaka.” 37 Xe Anu muavuti la muno'a Pita ilo'a Sevetaio ta 'olu tamei sou ilo'a milai. Ilo'a milutu xe milai la Anu tanulili xe opo tu'umaxu manina. 38  l La muvikalane'i ane'i tatalu ne aloxo 'o, “Ngaxoxolu ano mo ngautiti laixe. Xo eni opoleli tu'umaxu manina mo eni 'a 'ala'alai sou asoli.” 39 Musuku mulai va'axu sevile mukalu, la sou mutangatulu mulu'elai no lia sou mukilaka. Mukilaka la muvikala lexe, “Mamilo mimii latala ne, pekia'u noxine sou na'oxonu uasi. La sou eni emasaxa lexe naxexeenu soli noxilo 'o uxexesilo. Mo namulinu masaxa noxilo uasi, ia namulinu masaxa noxinesi.” 40 Anu mukilaka mukalu xe mulivu mulai noxi'a ta molomolo noxou tatalu ne, la ane'i a iaai. Xe muavuti la muvikalanu Pita aloxo 'o, “Loxovaa ngingi ngongi'a ta menexine umomomo sou ngaxolu mo ngautiti utalo loxo aso iou taiinu vile uasi? 41 Ngingi ngaxoxolu mo ngautiti mo ngakilaka, mo sou tovotovo uxali noxinge la utaloxolingenge uasi. Manina musuku, itema uleenu umasaxa lexe uxaxai ia vasimolu ne pekia'u uasi, mamalaxusi.” 42 Iesu muvikalane'i aloxo ne xe mukalu, la mulivu mulai la sou mukilaka alaxu tameisou. Mulai la mukilaka aloxo 'o, “Mamilo mimii latala ne, pekia'u noxine sou na'oxonu uasi. La sou eni emasaxa lexe naxexeenu soli noxilo 'o uxexesilo. Lexe nini nemasaxa lexe eni alai asoli la anu mivile uasi, eni amulinu masaxa noxinesi.” 43 Xe mulivu mune'e, la mumaisi'a ta molomolo noxou tatalu ne ane'i a iaai sio, xo ie'i uvuvusio. 44 La sou Anu mu'umesi'a miai ne ia Anu mulivu mulai la, sou mukilaka alaxu tatalusou. La mukilaka aloxo tei ne la. 45 Anu mukilaka alaxu tatalusou mukalu xe mulivu mune'e la mumaisi'a ane'i a iaai sio. Xe muavuti la mutali'isi'a lexe, “Ngingi a ngama'ila mo ngaai sio? Mumomomo aloxo ne! Xo voxo a muxali. Ngamaisou! Ane'i ta mitema sou i'italonu Itema 'Olu no avo'a ta mitema sou susu a 'ala'alai sou ixali 'o. 46  m La sou ngatulu mo nenge'a talai. Ngamaisou! Itema e u'italoleli no avo'a ta mitema ne, anu a uxali 'o.”

Mitetelisou Iesu

(Mak 14:43-50; Luk 22:47-53; Ioa 18:3-12)

47 Iesu uvivikala 'o, ia alaxu vilesisi 'o, la Iudasi mune'e noxou. Anu vile noxi'a ta molomolou noxou mavulovexa mulelia tamei. Anu ilo'a ta mitema tavu'alo mixali, ia ta mitema ne mitetelisou viso ilou kuluvololou. Ta mitema e mine'e ne, ta tatila noxi'a ta aili'i ilo'a ta tatilasi'a ta mitema mipalusi'a mine'e. 48 Itema e mu'italonu Iesu no avo'a ta mitema ne, muvikalane'ixu sosovo vile tei aloxo 'o, “Lexe eni alai atimu no xaleenu, la Anu ane, ngatetelisou.”

49 Ioxe, Iudasi muxali la mulai alaxu vilesisi noxou. La muvikalanu lexe, “Tila! laixenenisi.” La sou mutimu no xaleenu. 50 Xe Iesu muavuti la muvikalanu aloxo 'o, “Menexilo, mii ma'ia ane nini namasaxa lexe na'oxonu.” Xe ta mitema ne mimaisou Iudasi mine mutimu no xaleenu, la sou ane'i mikasi vaxa no avolu sou mitetelisou. 51  n La itema vile mututulu 'alai noxou Iesu ne muavuti la mulavee viso ka muvali vaxa no sangalou itema sou xaixai noxou kisi'a ta aili'i. La sangalou ne muxoto la mulapau mulai no lia. 52  o Xe Iesu muavuti la muvikalanu aloxo 'o, “Nano'u lavisomeni mo namulaxu no tanixu. Xo ane'i e i'oto no anu viso la isoli no anu viso. 53 Male nini nalavusou uasi ne? Eni emomomo sou a'ava ulai noxou Mamilo, la Anu upalusi'a ta angelo noxou ne ine'e alaxu vilesisi. Ta angelo ne itiitisi'a ua'ulixa'a ta mitema sou 'oto'oto xulumuxa'a mavulovexa mulelia tamei. 54 Ia lexe eni a'oxonu aloxo ne, la vaikala e muxolu no anu Lavuku Tavuna teinu ne umomomo sou uxali manina uasi. Xo lavuku noxou Lataua ne muvikala lexe, mimii ane ne anu uxali la uxali manina.”

55  p Xe Iesu muxiu la muvikalane'i ta mitema e mine'e sou itetelisou ne aloxo 'o, “Ngingi ngeno'u viso ilou kuluvololou sou ngene'e sou ngatetelisilo xo eni amitema sou aavutilixu 'oto'oto? No voxovoxo nenge'a texoxolu no taasou lalotu tatila noxou Lataua sou elosi'a ta mitema lavulavu la ngingi nganava la ngatetelisilo no voxo ane ne ua? 56 Ia anu mii vile uasi. Mimii ne anu uxali sou umomosou vaikala noxi'a ta mitema sou palomatana mikaukavunu.” La ta molomolo noxou Iesu mi'ume la milailai.

Mitulusou Iesu no 'a Vaivaikala

(Mak 14:53-65; Luk 22:54-55, 63-71; Ioa 18:13‑14, 19-24)

57 Xe ili'i la ane'i ane mitetelisou Iesu ne, milailixu noxou Kaiapasi anu kisi'a ta aili'i. La ta tisa sou lapuloto ilo'a ta tatila latala a ipita ixoxolu ne. 58 Ia Pita mumulinu Iesu muili'i no paxa. Xe mulai muxali, la mu'unalai avile no nano no vimelu sou tani noxou kisi'a ta aili'i ne. Anu mu'unalai, la ilo'a ta mitema sou isaxila'u tani mixolu sou lexe umaisou mii ma'ia i'oxonu noxou Iesu. 59 La ta tatila noxi'a ta aili'i ilo'a ta tatila sou imomomosou tu'utu'umaxu noxi'a ta mitema latala ne, ikalavoi sou Iesu no anu vaikala mose'i mo ikamuli susu noxou Iesu sou lexe ivau usoli. 60 Ta mitema tavu'alo mitelo vaikala noxou, ia vaikalai'a ne manina uasi. Mo ixalisou susu vile noxou mumomomo sou ivau usoli uasi. Ia ili'i manina la ta mitema tamei mine'e la mitulu ili'i no tumali'a sou mivikala. 61  q Ia mivikala lexe, “Nexi telomusou itema 'o muvikala lexe, ‘Eni amomomo sou akisilalanu tani tila noxou Lataua, ia voxo tatalusou la eni atulusou ulivu la.’” 62 Ioxe, kisi'a ta aili'i muavuti mutulu, la mutali'isou Iesu aloxo 'o, “Nini namasaxa nakolinu vaikala ane ane'i mitelonu noxine ne uasi? Nini nexavutala a loxovaa no anu vaikala ane ane'i mitelonu noxine 'o?” 63  r La Iesu mutaloxa'asi. Ia ukolinu vaikalai'a vile uasi. Xe kisi'a ta aili'i muavuti la muvikalanu aloxo 'o, “Eni alingaine no ualasou Lataua anu mauli no anu aloxo 'o. Lexe nini Kalisito, Lataua 'Olu, la nini navikalanexi.” 64  s La Iesu mukolinu lexe, “Ani, anu aloxo nini nelemolu ne. Ia eni avikalangengi latala 'o aloxo 'o, ili'i la ngingi ngamaisou Itema 'Olu mine uxolu uva'isa'inu Lataua xavinu musuku. Ngingi ngamaisou mine Anu uxolu no pa'umolu no avolu tema la une'e no anu umuumu molu teitexi no opo loxotolo ulu'e.” 65  t Anu mulomusou Iesu muvikala aloxo ne la mukakanu tokolomou xo anu la'iaxu. Xe muavuti la muvikala lexe, “Ngamaisou, ngingi ngelomusou ne. Itema 'o anu muvikala masua mulai noxou Lataua, la sou nenge tatali'isi'a ta mitema se'i la sou ipala'alixu susu noxou la uasi. 66  u La sou ngingi ngexavutala a loxovaa? Nenge ta'oxonu mii ma'ia noxou?” Xe ane'i miavuti la mikolinu lexe, “Anu mususu ane, mo Anu mumomomo sou usolisi.” 67  v Xe miavuti la mituve vaxa no iou xe mivau, xe se'i misavasavalou. 68 La mivikalanu lexe, “Ioxe nini Kalisito, la nalemolu 'ei ane muvene ne?”

Pita Musingisou Iesu

(Mak 14:66-72; Luk 22:56-62; Ioa 18:15-18, 25-27)

69 Ta mitema mi'oxo'oxonu Iesu aloxo ne, la Pita ne anu a muxolu no nano no vimelu sou tani ne, la sema sou xaixai vile noxou kisi'a ta aili'i ne mine'e noxou la mivikalanu lexe. “Nini kalumo ngingi ngongou Iesu sie Xalilaia ngexolu ane.” 70 Ia anu musingisou no ie'i latala ne lexe, “Eni alavusou mii ma'ia e nini nalelemolu ne uasi.” 71 Anu muvikala aloxo ne mukalu, la mulaa no aitengaxu tani sou mulai no ale. Xe sema sou xaixai vile la mimaisou, la mivikalane'i ane'i ane itutulu 'alai noxou ne lexe, “Itema ane 'o, anu ilou Iesu sie Naseleti ane.” 72 La anu musingisou la lexe, “Manina teitexi, eni alavusou itema ne uasi.”

73 Mixolu sevile kitu'a, la ta mitema e ane mitulutulu 'alai noxou ne, mine'e noxou la mivikalanu lexe, “Manina, nini vile noxi'a ane, xo xolineni molu mupalalixene.” 74 Ioxe, Pita muavuti la muvikala pekia'u aloxo 'o, “Manina teitexi, eni alavusou itema e ngingi ngelelemolu ne uasisi manina. Lexe eni akalavoingengi la laixe lexe Lataua ukalusilo.” Anu muvikala aloxo ne xe mukalu la alaxu vilesisi 'o la koko'a mu'ava. 75  w La Pita muxavutalanu vaikala noxou Iesu e muvikalanu lexe, “Maasi no 'olovoxo 'o, la koko'a u'ava uao, ia nini nasingisilo alaxu tatalu lexe nini nalavusilo uasi.” La Pita mutaloxu iii sou mutama mulai no ale.

Copyright information for `ATA