a27:5Mat 26:14-15; Apo 1:18-19
b27:9-10Sek 11:12-13
c27:12Ais 53:7
d27:18Ioa 11:47-48, 12:19
e27:24Lap 21:6-9
f27:25Apo 5:28
g27:28Luk 23:11
h27:30Ais 50:6
i27:34Lex 69:21
j27:35Lex 22:18
k27:38Ais 53:12
l27:39Lex 22:7, 109:25
m27:40Mat 26:61; Ioa 2:19
n27:43Lex 22:8
o27:46Lex 22:1
p27:48Lex 69:21
q27:51Mul 26:31-33; Eva 10:19-20
r27:55Luk 8:2-3
s27:58Lap 21:22-23
t27:60Ais 53:9
u27:63Mat 12:40, 16:21; Mak 9:31, 10:33-34; Luk 9:22, 18:31-33; Ioa 2:19-21

Matthew 27

Iudasi Mulai Mu'alili 'o

(Mak 15:1; Luk 23:1-2; Ioa 18:28-32)

Xe ili'i no kakau manina, la ta tatila noxi'a ta aili'i ilo'a ta tatilasi'a ta mitema mipita sou mipotoxu Iesu. Xe mukalu la sou misakiinu vaikala lexe ivau usoli. La sou ane'i misakisakiinu la milailixu no avolu Pilato anu tila noxi'a ta Romu.

Xe no mine Iudasi anu itema e mu'italonu Iesu no avo'a ta mitema sou ivau mumaisou Iesu mine ane'i mitulusou no anu vaivaikala sou i'oxo masuanu, la anu muxiunu xavutalau. La muno'u lamoli siliva mavulovexa tatalu sou mulivunoxu mulai noxi'a ta tatila noxi'a ta aili'i ilo'a ta tatilasi'a ta mitema. Mulai muxali la muvikalane'i lexe, “Manina eni e'oxonu masua noxou itema mulapu 'o la elailixu sou sialuxu unixi, la Anu u'oxonu susu vile uasi.” Xe ane'i miavuti la mikolinu lexe, “La sou anu mii ma'ia noxixe? Ane'i mikolinu lexe, anu mii noxine.” a La sou Iudasi muavuti la mupeinu lamoli ne mu'unalai no nano no taasou lalotu tatila noxou Lataua, ia mu'ume mulai sou mu'alili 'o.

Xe ili'i la ta kisi'a ta aili'i mitaxusou lamoli ne la mivikala lexe, “Lamoli ano 'o ne tamuxaxu ilou lamolisou tani tila noxou Lataua uasi xo anu lamoli ane 'o ne nenge teno'u sou 'ulusou ivau itema usoli.” La sou ane'i misakiinu vaikala lexe lamoli ne, ane'i ilotonu lia xalee vile noxi'a ta mitema e ilavusou i'oxonu lasopeni no anu. Xo ane'i imasaxa lexe lia ne uxolu sou iasixa'a taasila no anu. Tava'u aloxo ne la sou lia xalee ane ne ane'i ilemolu lexe, “Lia sou sialu no voxo vaimomo.” b Aloxo ne sou anu umomomo sou mii ma'ia ane itema sou palomatana Elemia mulemolu tei, muvikala lexe, “La sou ane'i ino'u lamoli mi'oxonu no anu siliva mavulovexa tatalu loxo ta mitema ne Isilaeli misosovo sou lexe ino'u 'ulu sou itema no anu. 10 Mo no anu lamoli ne la ane'i ilotonu lia xalee vile noxi'a ta mitema sou i'oxonu lasopeni, loxo tatila muvikalalelixu.”

Iesu Mutulu no Talaxu Pilato Anu Tila Noxi'a ta Romu

(Mak 15:2-5; Luk 23:3-5; Ioa 18:33-38)

11 Ioxe, ta kisi'a ta aili'i ilo'a ta tatilasi'a ta mitema mino'u Iesu xe milailixu noxou Pilato la mulai mutulu no talaxu. Xe tila noxi'a ta Romu muavuti la mutali'isou Iesu lexe, “Nini tatananu tuala noxi'a ta Iutaia?” La Iesu mukolinu vaikala noxou lexe, “Ani, aloxo nini nelemolu ne.” 12  c No mine ta tatila noxi'a ta aili'i ilo'a ta tatilasi'a ta mitema milomu aloxo ne la mileanu vaikala tu'utu'umaxu tavu'alo mulai noxou, la Iesu ukolinu uasi. 13 La Pilato mutali'isou aloxo 'o, “Loxovaa, nini nelomusou vaikala tavu'alo e ane'i mileanu mune'e noxine ne uasi?” 14 La Iesu ukolinu vaikala vile e ane'i mileanu mune'e noxou ne uasisi manina. Aloxo ne la mu'oxonu Pilato mukuluke manina.

Mililixu Iesu no Ovu Valautu sou Usoli

(Mak 15:6-15; Luk 23:13-26; Ioa 18:39–19:16)

15 Io, no voxo tila aloxo ne, la Pilato ulavusou sou ululusou itema vile uxolu no nano no taasou navunavu ne, uatu. Ta mitema me'asi ilavusou isosovosou itema la sou anu ululusou. 16 No voxo ane ne la itema vile ualasou lexe Valavasi, anu a uxoxolu no nano no taasou navunavu ne. Anu itema e ta mitema latala milavusou lexe anu itema masua vile. 17 Ta mitema mixali mipita mukalu, la sou Pilato mutali'isi'a aloxo 'o, “Ioxe ngingi ngemasaxa lexe eni alulusou 'ena'ei uuatu noxinge Valavasi, uasi, Iesu e ilemolu lexe anu Kalisito 'o?” 18  d Anu muvikala aloxo ne, xo anu mulavusou lexe ane'i ta tatilasi'a ta tatila noxi'a ta aili'i ne tane'i masuau Iesu misevile. 19 Xe no mine Pilato uxoxolu no anu puloulou sou ulomusou vaivaikala noxi'a ta mitema sou itulu no anu vaivaikala, la semau misovanu vaikala mune'e noxou, la mimulesou aloxo 'o. “Mamu sou na'oxonu mii vile noxou itema e mulapu ne, xo eni eai pipiena no 'olovoxo la emaisou itema ne la examuli tu'umaxu tatila.” 20 Xe ta kisia ta aili'i ilo'a ta tatilasi'a ta mitema ne miavutinoxu opone'i ta mitema latala ne, sou lexe i'ava ulai noxou Pilato lexe nalulusou Valavasi, ia navau Iesu mo usoli. 21 La sou tila ne Romu mutali'isi'a lexe “Ngingi ngemasaxa lexe, eni alulusou 'ena'ei noxi'a ta tamei 'o ulai noxinge?” La ane'i mikolinu lexe “Valavasi.” 22 La anu mutali'isi'a la lexe, “Ia eni a'oxonu mii ma'ia noxou Iesu e ane'i ilemolu lexe Kalisito 'o?” La ane'i latala ne mikolinu lexe, “Ngalilixu teitexi no ovu valautu.” 23 Xe Pilato muavuti la mutali'isi'a la aloxo 'o, “Tava'u loxovaa, anu u'oxonu susu vile uasi?” Xe ane'i miavuti la mi'ava tatila manina lexe, “Ngalilixu teitexi no ovu valautu.” 24  e Ia Pilato mumaisou lexe anu vote'i vile la sou anu u'oxonu la uasi xo maasi la 'oto'oto toxoxa'a uxali. La sou anu mukasi vaxa no lexa ka mu'uinu avolu no ie'i ta mitema xo mulavu lexe maasi la 'oto'oto toxoxa'a uxali la sou muvikalane'i lexe, “Eni susu noxilo uasi, ia lexe itema 'o usoli la anu mii noxingesi.” 25  f Xe ane'i miavuti la mikolinu lexe, “Sialuxu ne une'e utelo noxixe xe noxi'a ta 'ili'ilixe ili'i.” 26 La sou anu mululusou Valavasi mulai noxi'a. Ia anu muvikalane'i ta mitema sou 'oto'oto la mipuapuasou Iesu. Mipuapuasou mukalu la sou anu mu'italonu mulai no avo'a ta mitema sou lexe ililixu no ovu valautu.

Ta Mitema sou 'Oto'oto Mimolovila'isou Iesu

(Mak 15:16-21; Ioa 19:2-3)

27 Xe ili'i la ane'i ta mitema sou 'oto'oto noxou tila noxi'a ta Romu milailixu Iesu mu'unalai no nano no vimelusou taasou itema tila noxi'a ta Romu. La ane'i mi'avali'a ta mitema sou 'oto'oto latala ne mine'e mipita. 28  g Ane'i mine'e mipita mukalu, la miluvusou tokolomou la mitaanu tokolomo vile lauoinu vaxa noxou. 29 Xe mipalipaxoxonu savovolu ka mimuxaxu vaxa no kisou loxo kisivalu sou sosovo lexe Anu tatananu tuala vile ane. Mo mino'u puate vile la mimuxaxu no avolu tema xe mukalu, la mitangatulu mulu'elai no talaxu la mimolovila'isou lexe, “Anu ane tatananu tuala noxi'a ta Iutaia.” 30  h Ane'i mituvetuvesou xe mino'u puate la mivau no kisou ka mivau la. 31 Xe ili'i no mine mimolovila'isou mukalu la miluvunu tokolomo lauolauoinu e mitaanu noxou ne ia ane'i mitaanu tokolomo noxou mulivu vaxa noxou la. La sou mino'u milailixu sou lexe ililixu no ovu valautu.

Mililixu Iesu no Ovu Valautu

(Mak 15:22-32; Luk 23:27-43; Ioa 19:17-27)

32 No mine ane'i mino'u Iesu miuatulailixu no ale, la mixalisou itema vile ualasou lexe Saimoni, tualasou ne Sairini, la mivikala pekia'u noxou sou lexe anu utavulenu ovu valautu noxou Iesu. 33 Ane'i mino'u Iesu la milailixu no tuala ilemolu lexe Xoluxata. Uala ane ne, laaxu lexe tuala sou ta mitema xavanane'i. 34  i Xe milai mixali ne, la milosou Iesu uaini ane ane'i mixiunu ilou lamalasile sixula, la Anu mutovonu muiexu sevile kitu'asi ka mulomuanu. 35  j Xe ili'i la ane'i mililixu Iesu no ovu valautu. No mine mililixu mukalu la sou ane'i mi'oxonu vila'i vile sou misosovosou lexe 'ei ane uno'u mii ma'ia ma'ia. La sou ane'i mivelunu tokolomou Iesu noxi'a vilevilesi. 36 Xe mukalu la ane'i mixoxolu ne sou miloosou. 37 Ane'i mikaukavunu vaikala e anu mususu no anu ne, la miteinu teitexi no kisou. Ane'i mikaukavunu aloxo 'o, “Anu ano 'o Iesu tatananu tuala noxi'a ta Iutaia ane.” 38  k Mo ane'i mililixa'a ta mitema sou pakali ta tamei no pa'umolu. Mililixu vile no avolu tema xe vile mililixu no avolu ae. 39  l Ta mitema mimuamua'i xe mine'e mipolopepeenu, la milulu kisi'a sou mimolovila'isou. 40  m La mivikala mulai noxou lexe, “Ae, nini namitema e ne'oxo lexe namamulonu tani tila noxou Lataua ka natulusou ulivu voxo tatalusi ane! Mo lexe nini Lataua 'Olu la mene nasu'ulineni mo nalu'e no ovu valautu ne.” 41 Ta tatila noxi'a ta aili'i ilo'a ta tisa sou lapuloto xe ta tatilasi'a ta mitema kalumo mimolovila'isou. 42 La mivikala lexe, “Anu musu'uline'i ane'i ane va'axu, ia Anu molu umomomosou upamaulinu uasi. Lexe Anu tatananu tuala noxi'a ta Isilaeli, la ane alalae 'osi la Anu uxexee no anu ovu valautu ne mo ulu'e la sou nexi tamuxaxu tanexi noxou. 43  n Anu mumuxaxu tanu noxou Lataua mo Anu muvikala lexe, ‘Eni Lataua 'Olu.’ Ioxe, lexe Lataua mumasaxau, la Anu Lataua molu usu'ulinu.” 44 Mo ta mitema ta tamei e mililixa'a no pa'umolu ne, ane'i ilou mimolovila'isou kalumo.

Iesu Musoli

(Mak 15:33-41; Luk 23:44-49; Ioa 19:28-30)

45 Aso mukulupa mo mulai muxali no aso iou tatalu no 'olo'olovoxo la isivoxo mutaasou xalexalee tuatuala mukalusi. 46  o Ia alaalai sou aso iou tatalu no 'olo'olovoxo la Iesu mu'ava tatila lexe, “Eloi, eloi lama savakatani?” Laaxu lexe, Lataua noxilo, Lataua noxilo, loxovaa la sou nini nesu'aleli 'o? 47 Anu mu'ava aloxo ne, la ta mitema se'i mitulutulu 'alai noxou ne milomusou, la mivikala lexe, “Ngalomu anu a u'avalou Eliasi.” 48  p Xe itema vile muiave alaxu vilesisi 'o la mulai muno'u kateni la mutaa mulu'elai no uaini e sixula. Xe mukalu la mutolosou mutelai no anaxu Iesu sou muie no anu. 49 Xe ane'i latala miavuti la mivikala lexe, “Ioxe, naxexesou, mo tamaisou lexe Eliasi une'e sou usu'ulinu.” 50 Xe no mine Iesu muunga tatila alaxu vile la mukalu la Anu musoli.

51  q No mine Anu musoli ne, la lavalava e mulili no nano no tani tila noxou Lataua ne, mukakaa tamomolu teitexi la mulai mupee no lia. Mo laliua mukunikuni la kulu muvalavala. 52 Xe lulusi'a ta mitema e misoisoli ne mumamulo xe mukisi la ta mitema tavu'alo noxou Lataua e misoisoli ne mitulu mimauli. 53 Ane'i milaa no anu lousi'a xe Iesu mutulu mumauli, la ane'i milai mi'unalai ne Ielusalemu mo ta mitema tavu'alo mimaisi'a. 54 Mo itema tila sou uulaxune'i ta mitema itemaxu ta'uve sou 'oto'oto ilo'a ta mitema sou 'oto'oto e mitulutulu sou iloosou Iesu ne mimaisou laliua mukunikuni, xe mimii latala e muxali ne la mi'ume. La mivikala lexe, “Manina misevile, itema ane 'o ne, anu Lataua 'Olu ane.” 55  r Mo ta sema tavu'alo se'i a itulutulu va'axu sevile sou imamalei. Ane'i mimulinu Iesu ne Xalilaia mito'o sou isu'ulinu. 56 Xe no tane'i ne la Malia sie Maxadala mo Malia ane Iakovo ilou Iosepu neni'a xe Sevetaio ta 'olu neni'a ne ane'i kalumo mitutulu ne.

Iosepu Mu'asixu Iesu

(Mak 15:42-47; Luk 23:50-56; Ioa 19:38-42)

57 Xe no 'olovoxo la itema sou lavuluti vile sie Alimatia, ualasou lexe Iosepu anu muxali molomolo vile noxou Iesu mune'e muxali. 58  s Anu mune'e la mulai muxali noxou Pilato la mutali'isou sou lexe uno'u Iesu vasimolu, la sou Pilato mupalusou sou uno'u. 59 La sou Iosepu mulai muno'u lavalava kea vile alavua sou mune'e mukupoonu Iesu vasimolu no anu. 60  t Xe mukalu la muno'u mulai mumulaxu no anu lulu noxou alavua e mu'asou no tava'u maea ne. Xe mupipalo'u lavo'o vile toxoxa'a la mune'e mutaluxu lulu anaxu ne, io anu mulivu. 61 La Malia sie Maxadala ilee Malia ane vile, ane'i ilou a ixoxolu xalee vile ia ie'i ulalai.

Ta Mitema sou 'Oto'oto Miloosou Lulu

62 Xe voxo sou lalaxii sou voxo Tavuna mukalu ia no anu voxo ane ili'i, la ta tatila noxi'a ta aili'i ilo'a ta Palisaio milai mixali noxou Pilato. 63  u La mivikalanu lexe, “Tila, nexi texavutalanu vaikala noxou itema sou kalakalavoi ne no mine uao uxoxolu 'o la muvikala lexe, voxo tatalusou la anu utulu. 64 La sou laixe lexe nini navikala mo sou iloosou lulu anaxu ne ulai uxali no anu voxo tatalusou. Xo loxo 'o io ta molomolo noxou ine'e ipakalinu vasimolu, ia ilai ikalavoine'i ta mitema lexe Anu mutulu. La sou kalavoi noxi'a ne ua'ulixu kalavoi noxou e anu mu'oxonu tei ne.” 65 Xe Pilato muavuti la muvikalane'i lexe “Ioxe, ngano'a ta mitema sou 'oto'oto, mo ilai iloosou lulu ne, mo ngapaipounu xo ipakalinu.” 66 La sou ane'i milai mipaipounu lulu anaxu ne la mimuxaxu sosovo vile no anu lavo'o no lulu anaxu ne xe mimuxaxa'a ta mitema sou iloosou lulu ne.

Copyright information for `ATA