a3:2Mat 4:17; Mak 1:15
b3:3Ais 40:3
c3:42Ta 1:8
d3:7Mat 12:34, 23:33
e3:9Ioa 8:33, 39; Rom 4:12
f3:10Mat 7:19; Luk 13:6-9
g3:11Ioa 1:26-27, 33; Apo 1:5
h3:16Ioa 1:32
i3:17Lex 2:7; Ais 42:1; Mat 12:18, 17:5; Luk 9:35

Matthew 3

Ioanesi Itema sou U'ulosi'a ta Mitema Xe Ulalaxiinu Vote'i

(Mak 1:1-8; Luk 3:1-18; Ioa 1:19-28)

No voxo ane no mine Iesu muxoxolu ne Naseleti ne Ioanesi itema sou u'ulosi'a ta mitema anu muxali. Anu mune'e mu'ava'ava no xalee lia vitanisi ne Iutaia, la muvikala aloxo 'o. a  “Ngingi ngaxiu opongengi. Xo saxisaxila'u teitexi no opo loxotolo anu a 'ala'alai mukalu.” b Ioanesi anu itema e Lataua muvikalanu no anaxu itemasou palomatana Aisaia, anu muvikala aloxo 'o,

“Ngalomu sou itema vile u'ava'ava no xalee lia vitanisi lexe
ngalalaxiinu vote'i mo ngamomosou vote'i sou Tila.”
c Ioanesi ne musakii kameli laxusou sou mutaluxu vasimolu, xe muutupokoxu bulumakau sosou. 'Ani'anixu ane musia'e taula ilou unuxu. Ta mitema mutelo ne Ielusalemu mo ne Iutaia mo tuatuala e 'alai no lexa Ioridani ane'i mine'e noxou Ioanesi, la ane'i mipa'alixu lamana 'ili'ilixo masumasua noxi'a, la sou anu mu'ulosi'a no lexa ne Ioridani. d Ia mumaisi'a ta Palisaio ilo'a ta Sadokaio mine'e sou lexe u'ulosi'a la anu muvikalane'i aloxo 'o. “Ngingi loxo lasile molosila ta 'olu, Lataua la'iaxuinge ia 'ei muvikalangengi lexe nga'ume sou ngapolopepeenu lai'a noxou.” Lexe ngingi ngaxiu opongengi manina, la 'ili'ilixomengi ne umaxa'inge, lexe ngingi ngexiu opongengi. e Ia mamu sou tangengi uvikalangengi, “lexe ngingi Avalaamu ta 'ilu'ilusunu.” Eni avikalangengi aloxo. Lataua umomomo sou u'oxonu lavo'o la uxali Avalaamu ta 'ilu'ilusunu. 10  f Lapemu a mulalaxii muai no ovu tava'u. Lexe ovu ane unene'a laixe uasi la ixetau loxo itema vile uxetau ovu sou uleanu no navu. 11  g La sou eni avikalangengi lexe eni a'ulosinge no anu lexa vitanisi loxo sosovo, sou ngingi ngexiunu opongengi, la ili'i la itema vile xaviinu une'e la u'ulosinge no anu Uleenu Tavuna mo navu, la xavi noxou ne uaulixu xavi noxilo. Mo eni amomomosou alulusou lamotasou siove sou tava'u uasi. 12 Anu une'e loxo itema vile, utetelisou silapa no avolu sou ukalipalanu uiti sosou sou u'elaxu no anu navu e ukalu uasi. Ia temanu la uai no taasou la'ilali.

Ioanesi Mu'ulosou Iesu

(Mak 1:9-11; Luk 3:21-22)

13 No voxo vile la Iesu molu ne Xalilaia mune'e no lexa ne Ioridani, sou umasaxa lexe Ioanesi u'ulosou. 14 Ia Ioanesi mumulesou la muvikalanu aloxo 'o, “umomomo lexe nini na'ulosilo ia loxovaa ane nini nene'e noxilo 'o?” 15 La sou Iesu mukolinu vaikalau aloxo, “Na'oxo loxo ne uasi. Nenge ta'oxonu mimii tavu'alo ne umomomo ukalusi ulai noxou Lataua aloxo ne.” La sou Ioanesi mumulinu vaikala noxou. 16  h No mine Iesu mu'ulo mukalu, la sou mulaa no lexa sou mulai no ale. La sou opo loxotolo mukisi la Iesu mumaisou Uleenu Tavuna mulu'e loxo ngiala kuau muvava mulu'e muxolu no kisou. 17  i La sou vaikala vile molu teitexi no opo loxotolo mu'ava aloxo. “Eni 'alixeni ane, eni amasaxau mo opoleli u'osasou misevile.”

Copyright information for `ATA