a5:3Ais 57:15
b5:4Ais 61:2-3; Pal 7:17
c5:5Lex 37:11
d5:6Ais 55:1-2
e5:101Pi 3:14
f5:111Pi 4:14
g5:122A'a 36:16; Apo 7:52
h5:14Ioa 8:12, 9:5
i5:15Mak 4:21; Luk 8:16, 11:33
j5:16Ep 5:8-9; 1Pi 2:12
k5:17Rom 3:31
l5:18Luk 16:17, 21:33
m5:19Iak 2:10
n5:21Mul 20:13; Lap 5:17
o5:221Ioa 3:15
p5:23Mak 11:25
q5:27Mul 20:14; Lap 5:18
r5:29Mat 18:9; Mak 9:47
s5:30Mat 18:8; Mak 9:43
t5:31Lap 24:1-4; Mak 10:4
u5:321Ko 7:10-11
v5:33Liv 19:12; Iti 30:2; Lap 23:21
w5:34Ais 66:1; Mat 23:22; Iak 5:12
x5:35Lex 48:2; Ais 66:1
y5:38Mul 21:24; Liv 24:20; Lap 19:21
z5:43Liv 19:18
aa5:44Mul 23:4-5; Luk 23:34; Apo 7:60; Rom 12:14, 20
ab5:48Liv 19:2; Lap 18:13

Matthew 5

Iesu Mua'alo Teitexi no Laxa'ilu

(Luk 6:20-23)

Iesu mumaisi'a ta mitema tavu'alo mine'e la Anu mutelai muxolu teitexi no laxa'ilu vainu la sou ta molomolo noxou mine'e noxou. La sou Anu musokosou mua'aloi'a aloxo 'o.

a  “Ane'i ane ulene'i iu lavuluti uasi la ane'i i'osa ili'i la Anu ualusi'a
xo ili'i la ane'i ixolu no anu saxisaxila'u noxou Lataua teitexi no opo loxotolo.
b Ane'i ane itatama la ane'i i'osa
xo ili'i la Anu ualusi'a mo uxolixoline'i.
c Ane'i ane italoxolixa'a ilu'elai la ane'i i'osa
xo ili'i la Anu ualusi'a la lia ane 'o ne ane'i na'a.
d Ane'i ane isoisolixa'a sou imulinu 'ili'ilixo mulapu la ane'i i'osa
xo Anu ualusi'a ili'i la ane'i i'ana'ana,
no anu 'ilixo sou imulinu masaxa noxou Lataua utotomu.
Ane'i ane i'oxo alauna la ane'i i'osa
xo Anu ualusi'a mo u'oxo alauna noxi'a ili'i.
Ane'i ane opone'i malemalenga la ane'i i'osa
xo Anu ualusi'a mo ili'i la ane'i imaisou Lataua.
Ane'i ane ixolixoline'i ta mitema no anu 'oto'oto sou ukalu la ane'i i'osa
xo Lataua ualusi'a la nenge tamoxo'a lexe ane'i Lataua ta 'olu.
10  e Ane'i ane mi'oxo masuane'i xo mi'oxonu 'ili'ilixo mulapu la ane'i i'osa
xo ili'i la Anu ualusi'a mo ane'i ixolu no anu saxisaxila'u noxou Lataua
teitexi no opo loxotolo.
11  f Ngingi ane ta mitema ilevetesinge mo i'oxomasuangengi mo ivikalasinge masumasua mo ikalavoisinge xo ngemulinu Itema 'Olu ne, la ngingi nga'osa. 12  g Ia ngingi na'osa mo ngalei xo ulumengi ne tatila a uai teitexi no opo loxotolo xo 'ilixo ane ane'i mi'oxonu noxine ne anu iou vilesisi aloxo ane'i mi'oxo masuane'i ta mitema sou palomatana tei.

Ngingi loxo Au Xe Lamana

(Mak 9:50; Luk 8:16; 14:34-35)

13 Ngingi loxo au si'a ta mitema iouiou no tuala xalexalee ukalusi ia lexe au ne tu'axu ukalu la nenge talivu noxu tu'axu a loxovaa, xo au ane loxo ne la xaixai vile no anu uasi ta mitema isu'anusi ka imalamalaxo'u no tava'a. 14  h Ngingi loxo teelu si'a ta mitema iouiou no tuala xalexalee ukalusi tuala vile uxolu teitexi no laxa'ilu la anu utalume uasi. 15  i Ta mitema ilavusou itoisou lalamo ka itaa u'unalai no nano no ti'a uasi, ia ane'i imulaxu teitexi no valovalosi sou ukaa si'a ta mitema tavu'alo e ixolu no nano no tani. 16  j La sou anu iou vilesisi aloxo nini ne loxo teelu sou ukaa la lamanaxu ne uieisi'a ta mitema mo ane'i imaisou 'ili'ilixo laixe ngingi nge'oxonu la sou ane'i i'itinu ualasou Maminge e muxolu teitexi no opo loxotolo.

Iesu Mumomomosou Lapuloto

17  k Mamu ngingi ngaxavutala lexe eni exali sou axexeenu lapuloto mo vaikala noxi'a ta mitema sou palomatana, uasi. Eni ene'e 'o sou axexeenu uasi eni ene'e 'o sou a'oxo pekia'u sou. 18  l Eni avikalanengi manina lexe umomomo no voxo ane loxotolo ilou lialia ukalu la vaikala mautunu vile mo kaukavu vile ane'i mikaukavunu no nano no lapuloto tasiauxu uasi uxolu aloxo ne ulai utalo lexe mimii tavu'alo ne uxali ukalusi. 19  m Lexe itema vile umaisou lapuloto xalenu vile aloxo mii vile vitanisi, ia anu ulapune'i ta mitema sou i'oxonu aloxo ne la ualasou itema ne uxali kitu'a manina teitexi no opo loxotolo. Ia itema ne umulinu lapuloto ne sou ulosie'i ta mitema sou imulinu la sou anu ualasou tila no a saxisaxila'u noxou Lataua teitexi no opo loxotolo. 20 Eni avikalangengi manina lexe ngamulinu masaxa noxou Lataua mo 'ili'ilixo mengi ulapu laixe uasi loxo 'ili'ilixo mulapu noxi'a ta mitema sou lavulavu no 'a lapuloto ilo'a ta Palisaio la ngingi ngamomomosou nga'u nalai no a saxisaxila'u noxou Lataua teitexi no opo loxotolo uasi.

Iesu Uvikalasou 'Ilixosou Imomosou Vaikala

21  n Ngingi ngalomusou vaikala noxi'a ta 'ilusungengi mino'u mukalu lexe, ‘Ngingi ngave'a ta mitema isoli uasi, itema vile uva'u itema vile usoli la anu utulu no 'a vaivaikala.’ 22  o Ia eni avikalangengi aloxo 'o, lexe itema vile la'iaxuu vimou la anu utulu no anu vaivaikala. Mo 'ena'ei ane uvikalanu vimou lexe ‘Kisine muxovulaulau 'o.’ la anu uxali noxou tatananu lapuloto te'i, ia itema vile uvikalanu itema va'axu aloxo ‘nini itema ne nexovulaulau manina.’ la anu ulai no taxa e navu u'ani'ani no anu kaluxu uasi. 23  p La sou lexe nini nane'enu lolovolo noxine sou naelaxu no valovalo ia naxavutalanu mii vile ngamomosou noxou vivine uao la, 24 namulaxu lolovolo noxine ne uai 'alai no valovalo ne ia nalai mo namomosou tei 'o. Lexe ngingi ngongou ngexali no anu opo vilesisi ukalu la sou nini nalai naelaxu lolovolo noxine ne. 25 Ia itema vile umasaxa sou utulusine no anu vaivaikala, la ngingi ngongou ngamuamua'i no vote'i sou ngalai no tanixu vaivaikala la nini napalea mo ngongou ngamomosou vaivaikala tei. Xo masua sou itema ne ulailixene no avolu itema sou ulomu sou vaivaikala la ulailixene no avolu polisi, la sou polisi umuxaxene no tani sou navunavu. 26 Eni avikalaneni manina lexe nini naxolu no nano no tani sou navunavu ulai utalo lexe nini nalotonu ulu ane ane'i misosovosou noxine.”

Iesu Muvivikala no Anu 'Ilixosou Vote'i

27  q Iesu muvikala la aloxo 'o, “Ngingi ngelomusou tei lexe, ‘Mamu sou ngingi nga'oxonu 'ili'ilixo sou vote'i.’ 28 Ia eni avikalangengi aloxo, lexe itema vile umaisie sema vile ia iou uisuxe xe tanu umulimuline la loxo anu mu'oxonu 'ilixo sou vote'i mukalu ne. 29  r La sou lexe ieni tema ususulixene sou na'oxonu 'ilixo masua la laixe lexe nini naluvunu mo nasuanu. Anu laixe lexe vasimene xalee vilesisi ne usua loxo io ili'i la vasimenge ukalusi ulai no navu ane kaluxu uasi. 30  s Mo lexe avonge tema ususulixene sou na'oxonu 'ilixo masua no anu, la laixe lexe nini naxotonu mo nasuanu. Anu laixe lexe vasimene xalee vilesisi ne usu'a loxo io ili'i la vasimene ukalusi ulai no navu ane kaluxu uasi.”

Itema Usuane Semau

(Mat 19:9; Mak 10:11-12; Luk 16:18)

31  t Iesu muvikala la aloxo 'o, “Ngingi ngelomusou tei lexe, ‘itema vile umasaxa lexe usu'ane semau la ulosie la pepasou ixotonu taula'ixa'a.’” 32  u Ia Iesu musolonu vaikala noxou la, la muvikala aloxo 'o, “Lexe itema vile uxalisie semau i'oxonu 'ilixosou vote'i la anu usu'ane. Ia lexe anu usuane vitanisi xe ilai iuluxu mulu vile la, la ane'i ilou mi'oxonu 'ili'ilixo sou vote'i. 33  v Mo ngingi ngelomu sou kalumo lexe ane'i mivikalane'i ta mitema tatei aloxo, ‘Mamu sou ngingi ngasakiinu vaikala vitanisi, ia ngingi nga'oxo manina sou uasi. Lexe ngingi ngesakiinu vaikala la nga'oxonu manina sou ulai noxou Tila.’ 34  w Ia lexe ngingi ngasakiinu vaikala sou mivile, la mamu sou ngavikala lexe manina teitexi. Xo anu Lataua puloulousou sou uxoxolu no anu. 35  x Mo mamu sou ngavikala lexe manina no lia 'o, xo lialia 'o ne Lataua tava'u tanixu sou ututulu no anu ane. Xe mamu sou ngavikala lexe manina ne Ielusalemu, xo Ielusalemu ne anu tuala tila noxou tatananu tuala e tatila manina ane. 36 Mo mamu sou ngavikala lexe manina teitexi no kisilo, xo nini namomomo sou nakoinu laxusine vile uxali kea xe muximuxi uasi. 37 La sou laixe lexe vaikala mengi ne manina, la nini navikalasi lexe manina xe uasi la nini navikalasi lexe uasi. Xo vaikala se'i la utelo no latanu ne molu noxou itema masua.

Mamu sou Nakolinu Masua

(Luk 6:29-30)

38  y Mo ngingi ngalomu sou ane'i mivikala aloxo 'o, ‘Lexe itema vile uvene no ieni la nini nakolinu mo navau no iou xe uvene no anaxene la nini nakolinu mo navau no anaxu.’ 39 Ia eni avikalangengi aloxo 'o. Lexe itema vile u'oxo masuaneni la nini nakolinu uasi. Mo lexe usavaline no xaleneni tema la natolosou xaleneni ae la ulai mo anu usavaline la. 40 Mo lexe itema vile utulusinge no anu vaivaikala sou lexe nini nalosou tokolomo la nalosou tokolomo ane veveeni noxine kalumo. 41 Mo itema vile xaviinu sou lexe nini natavulenu la'ilalixu ulai uxali loxo lova (1,500m) la nini natavulenu ulai utalo loxo lova tamei (3,000m). 42 Mo lexe itema vile umasaxau mivile noxine la nini nalosousi, mo lexe itema vile ulingau mivile noxine lexe uno'u 'o xe ili'i la ukolinu la nini nalosousi.

'Ili'ilixo sou Namasaxai'a ta Uluameni

(Luk 6:27-28, 32-36)

43  z Mo ngingi ngelomusou vaikala tei lexe, ‘Ngamasaxai'a ta menexinge ia nga'oxonu masua noxi'a ta uluamengi.’ 44  aa Ia eni avikalangengi aloxo 'o, ngamasaxai'a ta uluamengi mo ngakilakasi'a ane'i ane i'oxonu masuangengi. 45 Aloxo ne la sou ngingi ngaxali loxo Maminge ta 'olu teitexi no opo loxotolo. Anu u'oxonu aso uiei teitexi noxi'a ta mitema ta masua xe ta mitema ta laixe kalumo. Mo Anu ulavusou u'oxonu la'iua usili noxi'a ta mitema milapu mo ane'i ane ilapu uasi kalumo. 46 Ia lexe ngingi ngamasaxai'a ta mitema e imasaxaingesi la ngingi ngano'u ulu ane loxovaa? Male uasi. Ta mitema e itaxusou lamoli noxixe ne ane'i kalumo ilavusou i'oxonu 'ilixo aloxo ne. 47 Ngingi nga'oxonu aso laixe si'a ta vivinge, la ngingi ngauualixa'a ta mitema va'axu no 'a mii ma'ia? Male uasi. Tamitema ane ane'i ta Iutaia uasi ne ane'i i'oxonu aloxo ne kalumo. 48  ab Ngingi ta mitema ngaxolu ngalapu manina loxo Maminge muxolu no loxotolo ne Anu mulapu manina.”

Copyright information for `ATA