a8:4Liv 14:1-32; Mat 9:30; Luk 17:14
b8:11Luk 13:29
c8:12Mat 22:13, 25:30; Luk 13:28
d8:17Ais 53:4
e8:202Ko 8:9
f8:211Ta 19:20
g8:24Lex 4:8
h8:26Mat 14:31; Lex 89:9
i8:29Mak 1:24; Luk 4:41

Matthew 8

Iesu Mupamaulinu Itema E Vulukali Mu'oxonu

(Mak 1:40-45; Luk 5:12-16)

Iesu molu no laxa'ilu sou mulu'e, la ta mitema tavu'alo mimulinu. Xe ili'i la itema vile vulukali mu'oxonu ne mune'e noxou Iesu. La muxola'u tava'u vo'oxu mo mutangatulu no talaxu la muvikalanu sou lexe upamaulinu. La sou muvikalanu aloxo 'o, “Lexe nini namasaxa la napamaulileli mo eni axali malemalenga.” La Iesu mukasivaxa no vasimolu la muvikalanu aloxo 'o, “Eni emasaxa lexe nini naxali malemalenga.” Xe alaxu vilesisi o la vulukali ne muxexee avile mole anu mumalemalenga. a Xe Iesu muavuti la mupalusou mulai. La mulosou vaikala pekia'u aloxo 'o, “Nalai ia umomomo sou naa'alou evile no anu mii ane eni e'oxonu noxine o uasi manina. Ia nalai namaxainesi noxi'a ta aili'i mo nalosi'a mii ane i'elaxu ulai noxou Lataua loxo Mosesi mulemolu sou napala'alixu lexe nini nexali malemalenga no iou Lataua mukalu mo sou ta mitema imaisou la ilavu lexe nini vasimene laixe mukalu.”

Iesu Mupamaulinu Itema sou Uulaxune'i ta Mitema Itemaxu Ta'uve sou 'Oto'oto

(Luk 7:1-10)

Iesu mu'unalai no tuala tila ne Kapenaumu, la itemasou usaxila'a ta mitema itemaxu ta'uve sou 'oto'oto ne Romu mune'e la mutali'isou Iesu sou usu'ulinu, “Tila, itemasou xaixai noxilo mupipiena mo anu vasimolu usoisoli xe navunavu mu'oxonu mo a uai no tani.” La sou Iesu muvikalanu aloxo 'o, “Eni alai mo apamaulinu.” Ia itema sou usaxila'a ta mitema itemaxu ta'uve sou 'oto'oto mukolinu vaikalau aloxo 'o, “Tila eni amitema a laixe sou nini na'una no taasilo uasi, nini navikalasi la sou itema sou xaixai noxilo ne anu umauli la.” Eni evikala loxo ne, xo eni exolu no laxa'a ta mitema e ane'i mino'u sosovo sou isaxilailo, mo ta mitema sou 'oto'oto ane eni esaxila'a mixolu no laaxo kalumo. La sou lexe eni apalusou vile lexe nalai la anu ulai, mo avikalanu vile lexe nane'e la anu une'e. Xe avikalanu itema sou xaixai noxilo lexe na'oxonu mii 'o la anu u'oxonusi. 10 Xe Iesu mulomu vaxa noxou la mukuluke. La sou Anu muvikalane'i ta mitema e mimulinu ne aloxo 'o, “Eni avikalangengi manina lexe eni amaisou itema vile nonixi noxinge ta Isilaeli ne umuxaxu taanu, loxo itema o uasi. 11  b La sou eni avikalangengi aloxo 'o. Ta mitema ane ane'i ta Iutaia uasi tavu'alo me'a no aso uxali xe no aso u'una ilai ino'u tanixa'a sou ilo'a Avalaamu mo Aisaki xe Iakovo ixolu ipita la i'ani no anu la'ilali tatila teitexi no opo loxotolo. 12  c Ia ta Iutaia e Lataua musosovosi'a tei sou lexe ixolu no anu saxisaxila'u noxou ne Anu ukusai'a ilai no tuala sou isivoxo no 'a xalee a ne itatama mo anaxa'a ukalakikiki no anu.” 13 La Iesu muvikalanu itema sou uulaxune'i ta mitema sou 'oto'oto lexe “Nini nalai, la sou mimii uxali noxine aloxo nini nemulaxu taneni no anu mukalu.” La muisalili no voxo ane ne la itema sou xaixai noxou ne anu mumauli.

Iesu Mupamauline Pita Leuanu

(Mak 1:29-34; Luk 4:38-41)

14 Xe Iesu mulai muxali no tani noxou Pita, la mumaisie Pita leuanu ne iai no luu, xo pipiena mu'oxone mo vasimele ialuxu. 15 Xe Anu muavuti la mulai noxie la mukasi vaxa no avole la pipiena ne muxexesie la sou ane mitulu sou mixutuxuxa'a la'ilali. 16 Xe no 'olovoxo la ta mitema mino'a ane'i ane ta uleenu ta masumasua mixoo noxi'a sou mine'e noxou, la Anu mukusai'a ta uleenu ta masumasua sou mixexesi'a ta mitema ne. Xe mupamauline'i ane'i ane mipipiena. 17  d Anu mu'oxonu aloxo ne sou umomosou vaikala noxou Lataua mulaa no anaxu itemasou palomatana noxou Aisaia muvikala aloxo 'o, “Anusisi uxexeenu vovolea iouiou noxinge mo utavulenu tu'umaxu noxinge.”

Iesu Muvikala no Anu 'Ili'ilixo sou Imulinu no Anu

(Luk 9:57-62)

18 Ioxe Iesu mumaisi'a ta mitema tavu'alo mitulu mixaliliu, la muvikalane'i ta molomolo noxou aloxo 'o, “Nenge talai no kupa xalee vile.” 19 Ia itema vile sou lavulavu no 'a lapuloto mune'e la muvikala Iesu aloxo 'o, “Tila eni emasaxa lexe amulineni mo nini nalai ne'ei ne la eni amulinenisi.” 20  e La sou Iesu mukolinu aloxo 'o, “Ta a'aa ta vova ne si'a taxa no 'a lialia sou iai no anu, mo ta ngiala kalumo ne si'a iomu sou iai no anu, ia Itema 'Olu ne sou tani sou uai no anu uasi.” 21  f Itema vile sou xaixai noxou muvikalanu Iesu aloxo 'o. “Tila eni amasaxa lexe amulineni ia eni alai a'asixu mamilo tei o.” 22 La Iesu muvikalanu lexe, “Nini nane'e mo namulileli, ia ta mitema ane misoisoli ne ane'i me'a i'asixa'a la.”

Iesu Mukaitolonu Atume Toxoxa'a Ilou Luaki

(Mak 4:35-41; Luk 8:22-25)

23 Xe Iesu mutelo no 'a uaxa la ta molomolo noxou mimulinu, 24  g ilo'a milai nonixi no kupa la sivo tatila xe xasi tatila muavuti la muxiuxiunu uaxa la luaki mupei mu'una no uaxa, ia Iesu ne Anu muai. 25 Ia ane'i milai sou mitulusou la mivikalanu lexe, “Tila nasu'ulinenge, xo nenge 'ala'alai sou ta'uo'uo.” 26  h La sou Anu muvikalane'i aloxo 'o, “Muxamuxaxu tangengi noxinge ne anu kitu'a manina, loxovaa la sou ngingi nge'ume 'o?” Xe Anu muavuti la mukaitolonu atume ilou xasi ne la atume mukalu la lexa kalumo ne muai se'isisi manina. 27 La sou ane'i mikuluke no anu, la mivikala lexe “Itema ma'ia 'o, e mukaitolonu atume ilou lexa la milomuxu 'o?”

Iesu Mukusai'a ta Uleenu ta Masumasua Noxi'a ta Mitema ta Tamei

(Mak 5:1-20; Luk 8:26-39)

28 Iesu muxali no xalee lia tila ne Xadala, la muxalisi'a ta mitema ta tamei ta uleenu ta masumasua mixolu noxi'a. Ane'i mimaisou Iesu la me'a no lousi'a ta mitema misoisoli mine'e noxou. Ta mitema ta tamei ne ta uleenu ta masumasua mi'oxone'i ilou la ilou mivova manina la ta mitema imuamua'i no vote'i mautunu ane ne uasi. 29  i Ane'i mimaisou Iesu, la ilou mi'ava mulai noxou aloxo 'o “Nini Lataua 'Olu, loxovaa, voxo a uao, ia nini nene'e sou na'oxo masuanexi io?” 30 Mo miavuti la mivikalanu aloxo 'o, “Lexe nini namasaxa sou nakusaixe la napalusixe talai ta'unalai noxi'a ta memee e laoluxa'a iuveuve 'alai no laxa'ilu 'olele.” 32 La sou Anu muvikalane'i lexe, “Ioxe ta uleenu ta masua ngalai mo nga'unalai noxi'a ta memee.” La sou ane'i milai mi'unalai noxi'a ta memee la miiave milai no kisou maea la mitalotaloxo milu'elai no kupaxu la mi'uo'uo la misoisoli. 33 Xe ta mitema sou isaxila'a ta memee ne mimaisou mii ane ne la mi'ume la milai mia'alo no anu mii ane muxali noxi'a ta mitema ta tamei e ta uleenu ta masumasua mixolu noxi'a ilou ne no tuala. 34 La sou ta mitema tavu'alo no tuala tila ne mine'e noxou Iesu, mimaisou la ane'i mivikala pekia'u noxou lexe usukusou lia xalee tila ne mo ulai.

Copyright information for `ATA