a1:1Apo 16:12-40
b1:61Ko 1:8
c1:101Te 5:23
d1:13Apo 28:30
e1:192Ko 1:11
f1:21Xal 2:20
g1:232Ko 5:8
h1:27Ep 4:1; 1Te 2:12
i1:29Apo 16:19-40

Philippians 1

a Eni Paulo, nexi noxou Timoti ta mitema sou xaixai noxou Kalisito Iesu, tekaukavunu vaivaikala ane 'o ulai noxinge ngingi ta mitema ane Kalisito Iesu ta na'u mo ta tatila sou isaxila'inge ilo'a ta mitema sou xaixai no 'a lalotu ne Pilipai.

Nexi noxou takilaka lexe alauna mo opo se'isisi noxou Lataua Maminge mo Tila Iesu Kalisito uxolu noxinge.

Lakilaka Noxou Paulo

Eni alemo laixe musuku ulai noxou Lataua utotomu, no mine eni axavutalangengi. No mine eni akilakasinge ngingi latala, la no voxovoxo ne eni a'osa manina. Xo musoko no mine nenge nenge'a tea'aloxu a'alo laixe sou Iesu mo mune'e muxali vaimomo 'o la nenge nenge'a texaxai tepita. b Xo eni elavusou manina aloxo 'o. Lataua musokou xaixai laixe noxinge mo Anu a usosolonu sio xe ukalusou manina no voxo ane Kalisito Iesu ulivu une'e la.

La sou anu laixe manina lexe eni axamulinu aloxo ne singe ukalusi lexe Lataua usolonu xaixai noxou. Xo ngingi latala ne, nenge nenge'a texaxai tepita no anu xaixai laixe ane Lataua mualaunasilo la mulosinge. Mo eni a'osa sou axavutalangengi utotomu no mine ane'i misakisakileli, xe no mine utotomu eni a'oxo latolosou xe a'oxo pekia'usou a'alo laixe noxou Iesu. Lataua mulavusou manina lexe no nano no anu masaxa noxou Kalisito Iesu la eni emasaxainge ngingi latala no nano no taleli manina sou amaisinge.

La sou eni akilakasinge aloxo 'o. Ngingi ngalavusou vaikala maninasou musuku mo ngalavusou mii ma'ia ane laixe xe masua, la sou 'ilixo sou tangengingenge ngatongato'o uxali pekia'u musuku. 10  c Mo eni akilakasinge la aloxo 'o. Ngingi umomomo sou ngatongonu mii ma'ia ane maninasou mo ngaxolu va'axu no anu 'ili'ilixo masumasua xe ixalisou susu vile noxinge uasi ulai uxali no voxo ane Kalisito ulivu une'e. 11 Mo maulingenge u'ana'ana no anu 'ili'ilixo ane mulapu molu noxou Iesu Kalisito sou ngingi ngalosou uala tila mo nga'itinu ualasou Lataua.

Misakii Paulo La Anu Musu'ulinu A'alo Laixe sou Iesu

12 Ioxe, ta vivilo noxou Iesu. Eni emasaxa lexe ngingi ngalavusou lexe mii ma'ia ane muxali noxilo 'o ne, musu'ulinu a'alo laixe sou musuku mulai no tuatuala. 13  d Anu aloxo ne, la sou ta mitema sou 'oto'oto isaxila'a ta tatila sie Romu mukalusi ilo'a ta mitema latala mose'i milavusou lexe eni exolu no anu sakisaki xo eni amitema sou xaixai noxou Kalisito. 14 Tava'u xo eni exolu no anu sakisaki, la sou mii ane ne mu'oxonu pekia'a ta vivilo latala noxou Tila sou mia'aloxu vaikala noxou Lataua. Ane'i mia'alo la i'ume uasi, ia mitulu pekia'a.

15 Ia anu manina xo se'i ia'aloxu Kalisito ualasou ia ane'i opone'i masuailo, mo i'oxonu sou lexe iuaulixo no anu, xe se'i ia'alo no anu xavutala laixe. 16 Ane'i ane ia'alo no anu xavutala laixe i'oxo aloxo ne xo ane'i tane'ixo mo milavusou lexe Lataua mumulaxo lexe sou a'oxonu latolosou a'alo laixe noxou Iesu. 17 Ia ane'i ane ia'aloxu Kalisito ualasou no anu opo masua ne, i'oxo aloxo xo ane'i mimasaxa lexe ualasi'a uxali tila noxilo la i'oxonu xaixai laixe uasi. Mo mimasaxa lexe ane'i i'oxonu tu'utu'umaxu une'e noxilo no mine eni axoxolu no anu sakisaki 'o. 18 Ta mitema ia'aloxu Kalisito ualasou no anu xavutala iouiou. Se'i ia'alo no anu xavutala masua xe se'i no anu xavutala laixe. Ia anu mii vile uasi! Ia mii tila noxilo ne aloxo 'o. Eni emasaxa lexe ta mitema ilomusou a'alosou Kalisito 'osi. Tava'u aloxo ne, la eni a'osa. Ani, eni a'osa'osa utotomu aloxo ne.

19  e Xo eni elavu lexe no anu lakilaka noxinge mo su'uli noxou Uleenu Tavuna noxou Iesu Kalisito, la anu usu'uli sou upamaulileli. 20 La sou eni emasaxa manina mo eloopala lexe eni umomomo sou amaela no anu mii vile uasi. Ia axolu pekia'ilo mo sou eni a'itinu Kalisito ualasou vaimomo 'o mo utotomu no anu mii ma'ia ane eni a'oxonu mo alemolu. Mo eni a'itinu ualasou no mine eni amauli xe no mine eni asoli. 21  f Xo eni maulixo ne, noxou Kalisito 'osi xe eni asoli la anu mii laixe manina. 22 Ia lexe eni amauli no lia 'o, la eni amomomo sou asolonu xaixai noxilo mo asu'uline'i ta mitema tavu'alo ino'u Kalisito no anu maulixa'a. Ia eni asosovosou vote'i anevaa? Eni alavusou uasi! 23  g La sou mii ta tamei ne muatasilo manina. Ia masaxa tila noxilo ne lexe eni alaisi mo axolu noxou Kalisito. La mii ane ne, anu laixe manina musuku. 24 Ia, xo noxingesi la anu mii tatila lexe eni amauli no lia 'o. 25 Eni elavu manina aloxo ne, la sou eni elavusou lexe eni axolu mo nenge nenge'a taxolu mo tasolonu xaixai mo sou ngingi ngamulaxu tangengi pekia'u musuku noxou Iesu mo nga'osa manina. 26 No mine eni ane'e noxinge la, la ngingi ngatoxoleli manina noxou Kalisito Iesu.

27  h Ioxe, eni avikalangengixu mii vile tatila aloxo 'o. Ngamomosou muamua'ingenge mo maulingenge umomomo no anu a'alo laixe noxou Kalisito. Xe no mine eni ane'e mo amaisinge, mo no mine eni axolu va'axu ia alomusou a'alosinge, la eni alavusou lexe ngingi opongengi vilesisi. Mo ngetulu pekia'inge xe xavutalamengi vilesisi mo ngetulu ngepita sou ngexaxaisou a'alo laixe sou Iesu sou ta mitema imulaxu tane'i no anu. 28 Mo eni elavusou lexe ngingi nga'ume'a ane'i ane ilea anaxa'a une'e noxinge uasi. Ngingi ngamaisou aloxo ne, la anu sosovo lexe Lataua ukalusi'a, ia Anu upamaulingengi. Mii ane ne anu molu noxousi. 29  i Xo Anu mualaunasinge mo mupelemasaxangengi lexe ngingi ngamuxaxu tangengi noxou Kalisito la ngano'u navunavusou kalumo. 30 La sou vaimomo 'o, ngingi ngexalisou tu'utu'umaxu iouvilesisi aloxo ngingi ngemaisou muxali noxilo tei mo ngelomusilo lexe mii ane ne 'a uxoxolu noxilo sio.

Copyright information for `ATA