a1:1Pal 22:6
b1:3Pal 22:7, 10
c1:4Mul 3:14-15; Pal 3:1, 4:5
d1:5Lex 89:27; Kol 1:18
e1:61Pi 2:9; Pal 5:10, 20:6
f1:7Tan 7:13; Sek 12:10; Mat 24:30; Ioa 19:34-37; 1Te 4:17
g1:8Pal 21:6, 22:13
h1:13Tan 7:13, 10:5
i1:14Ese 43:2; Tan 7:9, 10:6; Pal 2:18, 19:12
j1:16Eva 4:12; Pal 2:12, 19:15
k1:17-18Ais 44:6, 48:12; Pal 2:8, 22:13

Revelation of John 1

a Vaivaikala ane 'o, Lataua mulosou Iesu Kalisito tei lexe upala'alixu noxi'a ta mitema sou xaixai vitanisi noxou sou ilavusou mii ma'ia ane 'ala'alasi sou uxali maninasou. La sou anu Iesu muavuti, la mupalusou angelo vile noxou sou mune'e mulosielixu eni itema sou xaixai vitanisi noxou, ualasilo lexe Ioanesi. Angelo mulosielixu mimii mukalu, la eni ekaukavunu mimii latala e eni emaisou. No anu kaukavu noxilo ne, eni ea'aloxu vaivaikala manina noxou Lataua mo vaivaikala manina noxou e anu Iesu mupala'alixu. b Ia Lataua ualusou 'ei ane uitisou vaivaikala e anu mutotokalasou, mo anu ualusi'a ane'i ane ilomusou mii ma'ia ane eni ekaukavunu mo imulaxu no tane'i. Xo 'ala'alaisi sesi sou mimii e eni emaisou ne, uxali manina.

Vaivaikala Noxou Lataua Ulai Noxi'a ta Mitema Noxou ne Asia

c Eni alinga lexe alauna mo opo se'isisi noxou Lataua uxolu noxinge ngingi ta mitema noxou no tuala muxatele tamei no xalee lia tila ne Asia. Ia enisisi alinga aloxo ne uasi. Anu ane muxolu tatei mo muxolu vaimomo 'o mo ili'i la anu une'e ilo'a ta uleenu muxatele tamei e ixoxolu 'alai no pa'umolu, d mo alauna mo opo se'isisi noxou Iesu Kalisito uxolu noxinge. Anu mu'oxonu xaixai laixe sou mua'aloxu a'alo laixe noxou Lataua mo Anu mumauli tei noxi'a ta mitema e misoisoli, xe Anu usaxila'a ta tatanaanu tuatuala no lia 'o kalumo.

Iesu tanunenge, la sou musolisinge mo sialuxu munixi sou mululusinge no anu sakisaki sou 'ili'ilixo masumasua.
e No anu soli noxou ne, la Anu mu'una-lailinenge no anu saxisaxila'u noxou Lataua mo nenge texali loxo ta aili'i sou taxaxai noxou Lataua, anu Maminge. La sou nenge ta'itinu ualasou mo Anu molu usaxila'inge no anu xavi mo lamana noxou no voxovoxo utotomu mo kaluxu uasi! Manina.

f Ngamaisou! Anu a unene'e no anu tamuxala, la ta mitema latala imaisou mine unene'e. Mo ane'i ane mito'omolu kalumo imasiou. La ta mitema latala no lia 'o ne, itama. Ani, mii ne, uxali manina.

g Lataua anu Tila mo xaviinu musuku misevile, muxolu tatei mo muxolu vaimomo 'o mo ili'i la Anu une'e, muvikala lexe, “Eni exolu tatei mo, mo ili'i la eni axolu.”

Eni Emaisou Kalisito

Eni Ioanesi, ea'aloxu vaikala manina noxou Lataua mo eni apala'alixu vaikala noxou Iesu Kalisito, la sou ane'i mikusailo elai exolu no la'olu vile ilemo lexe Patomosi. Eni vivinge, xo nenge nenge'a tamulinu Iesu, la sou nenge taxaxamulinu navunavu, ia taxolu se'isisi mo tatulu pekia'inge no anu tu'utu'umaxu, mo nenge taxomaiou voxo ane Lataua usaxila'inge. 10 Ia no voxo sou lalotu, la Uleenu Tavuna mu'ana'ana noxilo, la elomusou 'ava tatila no tumalilo loxo itema vile mutaunu xoolau. 11 La muvikala aloxo 'o, “Nakaukavunu no anu mipipinu mii ma'ia ane nini namaisou mo nasova ulai noxi'a ta mitema noxou Lataua no tuala muxatele tamei ano, tuala ne Epeso mo ne Sumuna mo ne Peluxamo mo ne Tiatila mo ne Saludesi mo ne Piladelupia xe ne Laodekia.”

12 Eni elomusou aloxo ne, la exiu sou lexe amaisou 'ei ane muvikalaleli ne. La emaisou mii sou itulusou telu xoulu no anu muxatele tamei, ia mulalami manina. 13  h Ia no taiinu, la emaisou itema vile loxo Itema 'Olu mutaa tokolomo veveeni molu teitexi la mulai muxali no lia no tava'u. Mo emaisou utupoko xoulu vile mulamilami no lutunu. 14  i Mo emaisou kisou laxusou ne mukea manina loxo sipsip laxusou xe loxo tamuxala mo iou ne uvaxa loxo navu lamixu. 15 Mo tava'u ne loxo barasi ulamilami e mixutu la mosomoso vile uxolu no anu uasisi. Mo xolunu ne loxo lexa utaloxo no kisou ulu. 16  j Mo utetelisi'a ta oto muxatele tamei no avolu tema, mo lavisou vile anaxu tamei ne anaxu misevile mulaa muuatu no anaxu. Xe iou ne loxo aso e ukaa lailaixe.

17  k Eni emaisou aloxo ne, la elapau loxo itema musoli mulu'e no tava'u. La sou Anu mumulaxu avolu tema noxilo, la muvikalaleli lexe, “Na'ume mamu, xo eni exolu tei mo ili'i la eni axolu, 18 mo eni tava'u mauli, la sou eni esoli. Ia namaisou, eni emauli mo umomomo sou asoli la uasi. Mo eni amomomo sou atulusou itema vile musoli mo alaane'i ane'i ane mixolu no tualasi'a ta mitema misoisoli.

19 Ioxe, nini nakaukavunu mii ma'ia ane nini nemaisou mo mii ma'ia ane nini namaisou vaimomo 'o mo mii ma'ia ane sou uxali ili'i. 20 Ia, laaxu ta oto muxatele tamei e nini nemaisi'a etetelisi'a no avolo tema mo mii sou itulusou telu xoulu no anu muxatele tamei ne, aloxo 'o. Ta oto muxatele tamei ne, musosovosi'a ta angelosi'a ta mitema noxou Lataua no tuala muxatele tamei, xe mii sou itulusou telu no anu muxatele tamei ne, musosovosi'a ta mitema noxou Lataua no tuala muxatele tamei.”

Copyright information for `ATA