a12:2Mai 4:10
b12:3Tan 7:7
c12:4Tan 8:10
d12:5Lex 2:9; Ais 7:14, 66:7; Pal 19:15
e12:7Iud 9
f12:9Tav 3:1, 14; Luk 10:18, 22:31; Pal 20:2
g12:10Iop 1:9‑11; Sek 3:1
h12:12Ais 44:23, 49:13
i12:14Tan 7:25, 12:7
j12:17Pal 11:7

Revelation of John 12

Sema Ilou Iaulu Toxoxa'a

Mo sosovo vile toxoxa'a muxali no opo loxotolo ne aloxo 'o. Sema vile mitokolomo no anu aso xe so'io no laaxu tava'e mo kisivalu xe ta oto mavulovexa mo mulelia tamei mixolu no anu kisie. a Ane opoone mo voxo sou lavulo'o mune'e 'alai, la miungaunga xo mixamuli navunavu toxoxa'a. b Mo sosovo vile la muxali no opo loxotolo la aloxo 'o. Iaulu vile toxoxa'a ia lauolauoinu mo kisou muxatele tamei mo sikilisou mavulovexa xe kisivaluxu muxatele tamei muxolu no kisou. c La anu muvali xela'u, la xalee tatalusi'a ta oto no loxotolo milapalapau milu'e no lia. Ia anu muavuti la mulai mutulu no talaxe sema 'ala'alai sou ivo'o sou lexe ane ivo'onu keakea ne la anu u'ou. d Ia sema ne mivo'o, la 'ilie mulu. Anu sou usaxila'a ta mitema no lia ukalusi no anu vilaxoxu mi'oxonu no anu aeni. La no mine ane mivo'onusi ka mitokinu mulai noxou Lataua sou muxolu no luusou. Ia sema ne, mi'ume milai mixolu no xalee lia vitanisi. Xalee lia ane ne, Lataua mulalaxiinu sou ane ilai ixolu no anu mo anu usaxila'e voxo 1,260.

e Ia teitexi no opo loxotolo, la 'oto'oto toxoxa'a muxali no taiine'i Mikaeli ilo'a ta angelo noxou xe iaulu toxoxa'a ilo'a ta angelo noxou. Ia anu xaviinu uasi, la mi'umesou tualasi'a teitexi no opo loxotolo. f La iaulu toxoxa'a ilo'a ta angelo noxou ne, mileane'i milu'e no lia 'o. La sou anu uxovulaulaulixa'a ta mitema latala mukalusi no lia 'o. Anu sinana veveeni muxolu tatei ne ilemolu lexe ulee masua xe Satani.

10  g La eni elomusou 'ava toxoxa'a molu teitexi no opo loxotolo aloxo 'o,

“vaimomo 'o, voxo sou pamauli mo xavi mo saxisaxila'u noxou Lataua noxinge.
Xe xavi noxou Kalisito noxou a muxali.
Xo itema sou ukaitolone'i ta vivinge noxou Iesu no iou Lataua
no aso xe no 'olovoxo ne, mileanu mulu'e.
11 Ia ane'i mitaloxolixu no anu sialuxu Sipsip 'Olu
mo no anu vaikala noxou Lataua ane ane'i mia'aloxu.
Mo ane'i ixavutala no anu maulixa'a malaxo uasi
mo i'ume uasi ulai utalo no mine soli uxalisi'a.
12  h Aloxo ne, la sou ngingi ane ngexolu no opo loxotolo ne nga'osa!
Ia tu'umaxu ulai noxi'a ane'i ane mixolu no lia mo no luaki,
xo ulee masua mulu'elai noxinge.
Anu maasi, la la'iaxu misevile xo anu mulavusou lexe voxo noxou asou ukalu.”
13 La sou no mine anu mulavusou lexe ane'i mileanu mulu'e no lia, la anu mumulimuline sema e mivo'onu keakea mulu sou lexe uvee. 14  i Ia sema ne, milosie suluvi nenu toxoxa'a vivisou tamei sou lexe ane ivava no anu la ilai ixolu no xalee lia vitanisi ane Lataua mulalaxiinu. Ane ilai ixolu ne no Anu usaxilae, umomomo loxo tauu ie tatalu mo so'io muxatele vilesi, mo sou ane ixolu va'axu noxou sinana veveeni ne. 15 Ioxe anu iaulu toxoxa'a ne muavuti la mu'exinu lexa mulaa no anaxu loxo lexa mu'ani sou lexe utavulene sema ne ulailixe. 16 Ia lialia musu'uline sema ne la mu'a'a sou mumalukusou lexa e iaulu toxoxa'a mu'exinu ne mu'una no lia tanu mukalusi. 17  j Anu mumaisou aloxo ne la la'iaxuie sema ne misevile la sou anu muavuti la mulutu sou mulai u'oto noxie sema ne ta 'ili'ilie ilo'a ta minemine. Ane'i ane milomuxu mo mimulimulinu lapuloto noxou Lataua mo mimuxaxu tane'i no anu vaikala manina noxou Iesu. La anu iaulu toxoxa'a mulai mutulu no tasi'i.

Copyright information for `ATA