a13:1Pal 12:3, 17:3, 7-12
b13:2Tan 7:4-6
c13:3Pal 17:8
d13:5Tan 7:8, 25, 11:36; Pal 11:2
e13:7Pal 11:7
f13:8Lex 69:28; Pal 17:8, 20:12, 15, 21:27
g13:10Iel 15:2, 43:11; Pal 14:12
h13:13-141Ta 18:24-39; Mat 24:24; Pal 19:20
i13:16-17Pal 14:9‑11, 16:2, 20:4

Revelation of John 13

Ta Mimii ta Vova Tamei

a Ioxe, eni emaisou mimii ne mukalu xe emalei, la emaisou mi vova vile muxali muatu no luaki. Anu kisou muxatele ta tamei mo sikilinu mavulovexa xe kisivalu mavulovexa muxolu teitexi no anu sikiliu 'ole. Mo kaukavu muxolu no kisou vilevilesi. Kaukavu ne anu vaivaikala masumasua sou Latauasi. b Mo eni emaisou mi vova ne, iou loxo pusi vova toxoxa'a (ta mii kea ilemolu lexe leopard) mo tava'u loxo mii vile ilemolu lexe bea xe anaxu loxo laeoni. Anu muatu la iaulu toxoxa'a ne mulosou xavi mo mulosou puloulou noxou xe xavi tatila sou anu uxaxai loxo anu. c No anu kisou muxatele tamei 'ole la vile iou loxo mivau musoli mo xavaxavanu xe velavelamolusi ia muvesa. Xe ta mitema tavu'alo mimaisou aloxo ne la mikuluke, la mimulinu mukalusi. Mo ane'i tavu'alo milotu noxou iaulu toxoxa'a ne xo anu mulosou mii vova ne xavi tatila, la ta mitema milotu noxou kalumo, la ivivikala lexe, “'Ena'ei anu aloxo mii vova ne? Mo 'ena'ei umomomo sou u'oto noxou?”

d La anu mii vova ne mipelemasaxanu sou utilatila anaxu mo uvivikala sou Lataua masumasua. Anu muno'u xavi ne sou uxaxai umomomo loxo so'io itemaxu ta tamei mo ta tamei (42). Aloxo ne la sou anu utilatila anaxu mo uvivikala sou Lataua masumasua mo ualasou mo taasou e anu uxoxolu no anu xe ane'i mixolu teitexi no opo loxotolo kalumo. e Mo anu mipelemasaxanu kalumo sou u'oto noxi'a ta mitema noxou Lataua la ua'ulixa'a. Mo anu muno'u xavi sou usaxila'a ta mitema vasime'a kaukavuxunu iouiou mo matamata iouiou mo vaikalai'a iouiou xe xalexalee tuatuala no lia 'o ukalusi. f La ta mitema tavu'alo e mixolu mimauli no lia 'o ukalusi e tei no mine Lataua musokou mukoinu mimii la, ukaukavunu ualasi'a uai uasi no nano no anu lavuku sou mauli noxou Sipsip 'Olu e mivau ne ane'i ilotu noxou mii vova ne. 'Ei ane sangalou la ulomusou vaikala ane 'o laixe. 10  g Lexe 'ei ane sou imulaxu no taasou navunavu, la anu umulaxu ulaisi, mo 'ei ane sou ivau usoli no anu laviso la anu ivau usoli no anu laviso. La sou lexe mimii ane 'o uxali la ta mitema noxou Lataua itulu pekia'u no anu muxamuxaxu tane'i.

11 Ioxe eni emaisou mimii ane ne mukalu la emaisou mii vova vile la muxali mutelo no lia. Mii vova ne sikilinu ta tamei mutulu no kisou loxo Sipsip 'Olu mo uvivikala loxo iaulu toxoxa'a. 12 Anu mii vova ne muxali la muno'u tanixu mii vova tei sou muxaxai no anu xavi noxou. La mu'oxonu lia mo ta mimii mixolu no lia 'o milotu noxou mii vova e iou loxo mivau musoli mo xavaxavanu xe velavelamolusi ia muvesa ne. 13  h La mu'oxonu sosovo se'i toxotoxoxa'a no ie'i ta mitema. Sosovo vile toxoxa'a mu'oxonu no ie'i ta mitema ane mu'oxonu navu molu teitexi no loxotolo mulu'e no lia 'o. 14 Xo no anu xavi anu muno'u ne, la mu'oxonu sosovo toxotoxoxa'a no anu sou muno'u tanixu mii vova ane tei. La mu'oxo loloxa'a ta mitema e mixoxolu no lia 'o. Anu muavuti la muvikalane'i lexe ipuinu mii vile iouvilesisi aloxo mii vova tei ne mo itulusou. Anu mii vova ne mivau no anu laviso la xavaxavanu xe velavelamolu mo muvesa ia usoli uasi. 15 Mo anu milosou xavi sou mutaunu tauuxu mulai no anu mii e mipuinu iou loxo mii vova tei mo sou u'oxonu uvivikala, mo sou lexe ane'i ane imasaxa sou ilotu no anu mii ne uasi, la ive'ave'a isoisoli. 16  i Mo anu muavuti la muvikalane'i ta mitema tavu'alo sou imulaxu sosovo vile no avo'a tema xe no 'alaie'i. Ane'i ta mitema ane ualasi'a uasi mo ane'i ane ualasi'a mo ane'i anei'a lavuluti xe ane'i anei'a lavuluti uasi mo ta mitema ixoxolusi ia mivile usakisakine'i uasi xe ta mitema sou ipalupalusi'a tavu'alo ne ino'u ukalusi. 17 Mo sou anu ane uno'u sosovo sou ualasou mii vova ne xe itiiti noxou uasi la umomomo sou ulotoloto xe usovanu mimii uasi. 18 La sou lexe 'ei ane mulavu manina la utovo uxaxaisou itiiti ne anu musosovo sou itema itiiti noxou. Anu itiiti noxou itema ne aloxo 'o itemaxu mavulovexa tatalu mo itemaxu tatalu xe muxatele vile (666).

Copyright information for `ATA