a17:1Iel 51:12-13
b17:2Ais 23:17; Iel 51:7; Pal 14:8
c17:3Pal 13:1
d17:4Iel 51:7; Pal 18:16
e17:6Pal 18:24, 19:2
f17:7Pal 13:1
g17:8Tan 12:1; Pal 11:7, 13:7
h17:12Tan 7:7, 24
i17:16Pal 18:8

Revelation of John 17

Sema sou Vote'i Ilou Mii Vova

a Ioxe eni emaisou tu'utu'umaxu e muxali noxi'a ta mitema ne mukalu la, emaisou angelo vile noxi'a ta angelo muxatele tamei e muno'u tavulu no anu latotope muxatele tamei ne mune'e la muvikalaleli aloxo 'o, “Nane'e mo alosienixu tu'utu'umaxu e sema sou vote'i ino'u. Ane mixolu no lexa tavu'alo pa'umolu. b Ta tatanaanu tuatuala no lia 'o mi'oxonu 'ilixo sou vote'i noxie mo ta mitema e mixolu no lia 'o milai mi'oxonu 'ilixo sou vote'i noxie kalumo. Ane'i mi'una no anu 'ilixo masua sou vote'i noxie ne la mu'oxone'i mixovulaulau loxo miiexu uaini.” c Mo Uleenu Tavuna mu'ana'ana noxilo manina la elai no anu Uleenu, la angelo vile muno'ilo noxou telai no xalee lia vitanisi. Xe nexi noxou telai texali la emaisie sema vile ixoxolu no latanu mii vova vile. Mii vova ne lauolauoinu ia kisou muxatele tamei mo sikilinu mavulovexa xe kaukavu ne mikaukavunu vaivaikala masumasua sou Lataua. d Mo emaisie sema ne mitokolomo no anu tokolomo kaukavuxu malivololoonu xe lauo-lauoinu mo xoulu ulamilami mo lasala manina xe xapo iouiou mi'ainu no xolane. Mo no avole la mitetelisou paku vile mi'oxonu no anu xoulu, ia no nano no anu paku ne la 'ili'ilixo mu'ui e tuma'u masumasua mo 'ili'ilixo sou vote'i nuninuni'u no iou Lataua mu'ana'ana no anu. Xe ualasie mikaukavunu muxolu no 'alaiei ne laaxu mutalume. Ualasie ne laaxu aloxo 'o, “Tuala tatila ne Vaviloni ane neni'a ta sema sou vote'i mo 'ili'ilixo iouiou e tuma'u masumasua no lia 'o.” e Eni emaisie sema ne la ekuluke manina, xo ane mive'ave'a ta mitema noxou Lataua ilo'a ane'i ane mia'aloxu a'alo laixe noxou Iesu misoisoli la miiexu sialuxa'a. Ane miiexu sialuxa'a la mu'oxone mixovulaulau loxo miiexu uaini.

f La angelo muvikalaleli aloxo 'o, “Nini nemaisou mimii ne la nekuluke? Nini naxolu mo eni avikalanenixe sema ne xe mii vova e ane mixolu no latanu e kisou muxatele tamei xe sikiliu mavulovexa ne laaxu. Xo laaxu ne mutalume ia vaimomo 'o la eni avikalanenixu. g Mii vova e nemaisou ne tei la anu muxolu ia vaimomo 'o la anu uxolu uasi. Xe ili'i la anu uxali utelo no anu taxa e mulai no lia manina ne la ulai uulua a vile. La sou ta mitema e ixoxolu no lia 'o e ualasi'a uai no nano no anu lavuku sou mauli uasi no mine Lataua usokou ukoinu mimii uao imaisou mii vova ne la ikuluke manina. Xo tei la anu muxolu ia vaimomo 'o la anu uxolu uasi xe ili'i la anu uxali. La sou itema e mulavu manina la anu ulavusou laaxu. Anu laaxu aloxo 'o, mii vova kisou muxatele tamei ne musosovo sou laxa'ilu muxatele tamei e sema mixolu no anu mo musosovosi'a ta tatanaanu tuatuala muxatele tamei. 10 Ta tatanaanu tuala ta'uve a mikalukalu ia muxatele vilesi'a uxoxolu vaimomo 'o xe ili'i la muxatele tameisi'a uxali, ia anu uxali la uxolu maxuveeni uasi. 11 Xe mii vova e tei la anu muxolu xe vaimomo 'o la anu uxolu uasi, ia ili'i la anu uxali tatanaanu tuala muxatele tatalusi'a. Anu vile noxi'a ane'i ta tatanaanu tuatuala muxatele tamei ne ane e ulai la uulua avile. 12  h Mo mii vova sikilinu mavulovexa e nini nemaisou no kisou ne musosovosi'a ta tatanaanu tuatuala mavulovexa, ia ane'i ixali uao. Lexe ixali, la ane'i ino'u xavi sou ilo'a mii vova ne ixaxai aso iou maxuvee uasi. 13 Ane'i ta tatanaanu tuatuala mavulovexa ne xavutalai'a vilesisi manina sou ilosou mii vova ne xavi mo xaixai noxi'a sou anu uxaxaisou. 14 Mo ane'i ipita la ilo'a Sipsip 'Olu i'oto, la anu Sipsip 'Olu ilo'a ane'i ta mitema noxou e anu mu'avali'a mo musosovosi'a lexe anu ta na'u xe ane'i ane mimulimulinu vaikala noxou iua'ulixa'a no anu 'oto'oto ne. Xo anu Sipsip 'Olu ne anu Tila noxi'a ta tatila xe tatanaanu tuala noxi'a ta tatanaanu tuatuala.” 15 Mo angelo muvikalaleli la aloxo 'o, “Lexa tavu'alo e nini nemaisie sema sou vote'i mixolu no anu ne anu musosovosi'a ta mitema vasime'a kaukavuxu iouiou mo tuatuala ta tatila no xalexalee lia 'o mukalusi xe vaivaikalai'a iouiou no lia 'o ukalusi. 16  i Mo mii vova xe sikilinu mavulovexa e nini nemaisou ne ulai la i'oxo masuane sema sou vote'i ne. Ane'i iavuti la i'oxonu masuane manina mo ikalanu tokolomoxe la ixolu pangapanga'esi mo ii'eu xiaxiasine xe i'elaxe no navu ukalusi. 17 Xo Lataua mulosi'a ne'i ta tatanaanu tuatuala xavutala sou i'oxonu mimii ne uxali manina sou umomomosou mii ma'ia Anu mulemolu tei. Ane'i xavutalai'a vilesisi sou milosou mii vova ne xavi sou Anu usaxila'a ulai uxali no mine Lataua u'oxonu maninasou vaikala noxou. 18 Xe sema e nini nemaisie ne misosovo sou tuala ta tila manina e musaxila'a ta tatanaanu tuatuala no lia 'o.”

Copyright information for `ATA