a19:2Lap 32:43; Pal 6:10
b19:6Pal 14:2
c19:7-8Ais 61:10; Pal 21:2
d19:9Mat 22:2
e19:10Apo 10:25-26; Pal 22:8-9
f19:11Lex 96:13; Ais 11:4; Pal 1:5, 6:2
g19:12Tan 10:6; Pal 1:14, 2:17
h19:13Ais 63:1-3; Ioa 1:1, 14
i19:15Lex 2:9; Pal 1:16, 14:20
j19:16Pal 17:14
k19:17Ese 39:17-20
l19:20Pal 13:12-17, 20:10

Revelation of John 19

Ta Mitema Noxou Lataua Mi'osa Xo Vaviloni Mimamulo

Ioxe mimii ne mukalu la eni elomusou mivile luluxu toxoxa'a loxo ta mitema xulumu toxoxa'a ipita teitexi no loxotolo la mi'ava'ava aloxo 'o,

“Ta'itinu IAUE ualasou.
Anusisi mulivulinenge mo Anu xaviinu musuku
la taitinu ualasou Lataua, noxinge.
a Xo vaikala noxou manina mo mulapu
mo Anu utulusi'a ta mitema no anu vaivaikala noxou
la Anu utilovosou 'ili'ilixo noxie sema sou vote'i
la mulosie tu'utu'umaxu sou lakolisou 'ili'ilixo masumasua noxie sou vote'i e
mi'oxonu masuane'i ta mitema no anu mo sialuxa'a ta mitema sou xaixai noxou e
ane mive'ave'a misoisoli.”
Mo ane'i mi'ava la aloxo 'o,

“Ta'itinu IAUE ualasou.
Mo navusie mielaxe no ano ne umuxu muavuti
la mulai teitexi e teitexi avile.”
La ta tatila itemaxu vile mo tami'a ilo'a ta mii tami'a e imaumauli milapau milu'e mo mixola'u tava'u vo'uxu sou milotu mulai noxou Lataua e muxolu no puloulou noxou 'ole. La mi'ava aloxo 'o,

“Manina. Ta'itinu ualasou IAUE.”
Mo 'ava vile molu no puloulou noxou Lataua muatu aloxo 'o,

“Ngingi ta mitema sou xaixai noxou Lataua
mo ngingi ane nga'ume noxi'a
ta mitema ualasi'a uasi xe ta tatila nga'itinu Lataua noxinge ualasou.”
b Xe elomu la elomusou mii vile luluxu loxo ta mitema xulumu toxoxa'a xolune'i mo aloxo lexa luluxu xe aloxo lele'e upaupau la luluxu toxoxa'a mo uvalivalixumu mi'ava aloxo 'o,

“Ta'itinu IAUE ualasou xo anu Lataua Tila noxinge xaviinu musuku.
Anu usaxila'u mimii ukalusi.
c Mo nenge'a ta'osa manina mo ta'itinu Lataua ualasou.
Xo voxo sou Sipsip 'Olu utaula'i a muxali vaimomo 'o.
Mo semau a mixolu sou ixoxomaiou.
Lataua mulosie tokolomo ne mukea manina mo ulamilami
la ane mitokolomo no anu.”
[Tokolomo kea manina ne musosovo sou 'ili'ilixo mulapu noxi'a ta mitema noxou Lataua.]

d Mo angelo muvikalaleli la aloxo 'o, “Nakaukavunu vaivaikala ane 'o aloxo 'o, ane'i ane Lataua mu'avali'a mine'e no anu la'ilali sou taula'i noxou Sipsip 'Olu la ane'i i'osa xo Lataua ualusi'a.” Mo anu musolonu vaivaikala noxou manina la aloxo 'o, “Vaivaikala ane 'o ne anu vaivaikala manina noxou Lataua.” 10  e Eni emaisou aloxo ne la elapau mulu'e no tava'u sou lexe alotu noxou, ia anu muavuti la muvikalaleli aloxo 'o. “Mamu nalotu noxilo uasi xo eni amitema sou xaixai noxou Lataua aloxo nini ne mo ta vivine e mimuxaxu tane'i no anu vaivaikala manina noxou Iesu. La sou nalotu noxou Lataua anusisi xo a'alo manina noxou Iesu ne anu Uleenu Tavuna muxalilixu noxi'a ta mitema sou palomatana la ane'i milemolu.”

Itema Muxolu no Latanu Oosi Vile Kea

11  f Mo eni emalei la emaisou loxotolo mukisi mo emaisou oosi kea vile, xe itema e muxolu no latanu ne ualasou lexe, itema sou umulimulinu vaikala noxou Lataua laixe xe itema mulapu manina. Mo utulusi'a ta mitema no anu vaivaikala mo u'oto la umulinu 'ilixo laixe. 12  g Anu iou loxo navu lamixu mo kisivalu tavu'alo muxolu no kisou xe mikaukavunu uala vile noxou. Ualasou ne Anusisi mulavusou ia evile la uasisi manina. 13  h Mo tokolomoxu veveeni e mutaanu ne sialu mutomu no anu. Mo ualasou ilemo lexe Vaikala noxou Lataua. 14 Mo ta mitema sou 'oto'oto teitexi no loxotolo kalumo ne mixolu no latane'i ta oosi ta kea la miiave mimulinu. Ane'i mitokolomoxu tokolomo ne malemalenga mo mukea manina. 15  i Mo no anaxu itema e mulaxune'i ne la Anu mualavevenu laviso vile anaxu manina e sou ukalusi'a ta mitema no xalexalee tuatuala ukalusi no anu mo usaxila'a no anu vilaxoxu aeni. Mo Anu umalamalaxo'u uaini no nano no lavo'o taxaanu sou imalamalaxo'u uaini no anu ne musosovo sou la'ia masua manina noxou Lataua e Anu xaviinu musuku. 16  j Xe no anu tokolomoxu veveeni ne mo no poxo'u la mikaukavunu uala aloxo 'o, Tatanaanu tuala noxi'a ta tatanaanu tuatuala mo tila noxi'a ta tatila.

17  k Mo ieli mulai la emaisou angelo vile mutulu no nano no aso iou la mu'ava toxoxa'a mulai noxi'a ta ngiangiala iouiou mukalusi ivavava teitexi no va'a vitanisi aloxo 'o, “Ngane'e ngapita mo ngaxomaiou la'ilali toxoxa'a noxou Lataua, 18 mo sou ngingi nga'ou xiasine'i ta tatanaanu tuatuala mo ta mitema e iulaxune'i ta mitema sou 'oto'oto mo ta mitema e xavine'i musuku mo ta oosi ilo'a ta mitema e ixolu no latane'i ta oosi ne xe nga'ou xiasine'i ta mitema no lia 'o ukalusi. Ane'i ane mixolu laixe mo mii vile usakisakine'i uasi mo ane'i ane ipalupalusi'a mo ane'i ane ualasi'a uasi xe ane'i ta mitema ta tatila.”

19 Xe emalei la, la mii vova ilo'a ta tatanaanu tuatuala mo ta mitema sou 'oto'oto no lia 'o mukalusi mipita la itema uxolu no latanu oosi ilo'a ta mitema noxou sou 'oto'oto i'oto. 20  l Ia no anu 'oto'oto ne la ane'i mitetelisi'a mii vova ne ilou itema sou palomatana sosovo iouiou noxou ne la ane'i imauli la mileane'i ilou milu'e no anu kupaxu navu mo taupea. Xo anu mu'oxonu sosovo iouiou la mu'oxonu loloxa'a ta mitema sou mino'u sosovo noxou mii vova ne mo milotu no anu mii e mipuinu iou loxo mii vova ne. 21 Ia ane'i latala ne mive'ave'a misoisoli mukalusi no anu laviso e itema muiave no anu oosi kea mualavevenu 'ole. La ta ngiala iouiou mukalusi mine'e mi'ou xiasine'i xo mole mi'ana'ana manina.

Copyright information for `ATA