a3:1Pal 1:4, 16
b3:3Mat 24:43-44; 1Te 5:2; Pal 2:5, 16:15
c3:4Iud 23
d3:5Mul 32:32-33; Mat 10:32; Luk 12:8
e3:7Ais 22:22
f3:81Ko 16:9
g3:9Ais 45:14, 49:23, 60:14; Pal 2:9
h3:10Luk 21:19; 2Ti 2:12
i3:12Ais 62:2, 65:15; Pal 14:1, 21:2
j3:15Rom 12:11
k3:17Luk 12:21; 1Ko 4:8
l3:18Ais 55:1
m3:191Ko 11:32; Eva 12:6; Pal 2:5
n3:20Ioa 14:23

Revelation of John 3

Vaivaikala Ane 'o Ulai Noxi'a ta Saludesi

a  “Nini nakaukavu vaivaikala ane 'o ulai noxou angelo noxi'a ta mitema noxou Lataua ne Saludesi. Itema ane mutetelisi'a ta ulee muxatele tamei noxou Lataua mo ta oto muxatele tamei uvikala aloxo 'o, ‘Eni elavusou 'ili'ilixomengi. Ta mitema ivikala lexe ngingi loxo ngemauli, ia uasi to ngingi loxo ngesoisoli. Ngingi ngatulu mo ngaavutunoxou mii ma'ia ane uxoxolu noxinge sio ia 'ala'alaisou ukalu. Xo eni amaisou 'ili'ilixomenge uxali laixe mo umomomo no iou Lataua noxilo uasi. b La sou ngaxavutalanu mii ma'ia ane ngingi ngelomusou mo ngeno'u. La sou ngamulinu mo ngaxiu tumalingeu 'ili'ilixo masumasua. Ia lexe ngingi ngatulu uasi, la eni ane'e akulukengengi loxo itema sou pakali une'e. Ia ngingi ngalavusou aso iou ane eni ene'e no anu uasisi manina.

c Ia ta mitema mose'i no taiingengi ne Saludesi ne, ane'i mitaanu tokolomo nuni'u uasi. Nexi noxi'a tatokolomoxu tokolomo kea mo noxi'a tamuamua'i takei, xo ane'i mimomomo. d Anu ane muuaulixu 'oto'oto ne, la anu utokolomoxu tokolomo kea loxo ane'i. La sou eni umomomo sou aiasou ualasou no anu lavuku sou mauli uasisi manina. Ia eni amoxo'u ualasou no iou Mamilo ilo'a ta angelo noxou.’ 'Ei ane sangalou, la ulomusou vaikala ane Uleenu Tavuna muvikalane'i ta mitema noxou Lataua no anu laixe.”

Vaivaikala Ane 'o Ulai Noxi'a ta Piladelupia

e  “Nini nakaukavunu vaivaikala ane 'o ulai noxou angelo noxi'a ta mitema noxou Lataua ne Piladelupia. Vaivaikala ane 'o ne, noxou ane noxou Lataua mo uvikala lexe u'oxonu ma'ia la Anu umulinu. Anu utetelisou xavi sou usaxila'u siliko sou aitenga. Loxo Deviti la sou Anu ukisiinu aitenga, la umomomo sou evile utatusou uasi. Xe Anu utatusou aitenga, la umomomo sou evile ukisiinu uasi. f Eni elavusou 'ili'ilixomengi, la sou ngamaisou eni ekisiinu aitengasinge mo a ututulu no laxungengi. Aitengasinge ne, umomomosou evile utatusou uasi. Mo eni elavusou lexe ngingi xavi sevile a uxoxolu, la ngingi ngemulinu vaivaikala noxilo mo ngatalume noxilo uasi. g Ia ngamaisou, ta mitema ane ipita noxou Satani ane'i me'a imoxo'a lexe ane'i ta Iutaia ia uasi, ane'i ta mitema sou kalakalavoi. La eni a'oxone'i ine'e itangatulu no tavainge mo ilavusou lexe eni emasaxainge. 10  h Ngingi ngemulinu vaivaikala noxilo mo tu'utu'umaxu muxalisinge la ngexolu se'isisi, la sou eni asaxila'inge no anu voxo sou tovotovo. Voxo sou tovotovo ne, anu 'ala'alai sou uxali no xalexalee tuatuala no lia 'o ukalusi sou utovone'i ane'i ane mixolu no lia 'o.

11 Eni 'ala'alai sou alivu ane'e, la sou ngingi ngatetelisou pekia'u mii ma'ia ane ngingi ngeno'u, mo sou evile umomomo sou u'umenu kisivalu no kisinge muxamuxaxu uasi. 12  i Anu ane muaulixu 'oto'oto ne, la eni a'oxonu loxo atulusou tani tila noxou Lataua noxilo. Anu umomomo sou uxexee uasi mo eni akaukavunu ualasou Lataua noxilo no anu. Mo eni akaukavunu ualasou tuala noxou Lataua noxilo, anu Ielusalemu alavua. Ielusalemu alavua ne, anu molu teitexi noxou Lataua noxilo ulu'e. Mo eni akaukavunu ualasilo alavua no anu kalumo. 13 'Ei ane sangalou, la ulomusou vaikala ane Uleenu Tavuna muvikalane'i ta mitema noxou Lataua no anu laixe.”

Vaivaikala Ane 'o Ulai Noxi'a ta Laodekia

14 “Nini nakaukavunu vaivaikala ane 'o ulai noxou angelo noxi'a ta mitema noxou Lataua ne Laodekia. Vaivaikala ane 'o ne, noxou itemasou Manina, Anu uvikala lexe u'oxonu mii ma'ia la Anu umulinu vaikala noxou mo Anu mua'aloxu a'alo laixe noxou Lataua mo Anu usaxila'u mimii latala ane Lataua mukoinu mukalusi. 15  j Ia eni elavusou 'ili'ilixomengi. Ngingi xavingengi malaxo uasi sou ngamulinu vaivaikala noxilo loxo lexa lelemesou xe ialuxu uasi. La sou eni emasaxa lexe ngingi ngaxali loxo lexa ialuxu, xe uasi la ngaxali loxo lexa lelemesou. 16 Tava'u xo ngingi loxo lexa ialuxu mo lexa lelemesou uasi, ia ngingi loxo lexa ialuxu malaxo uasi, la eni 'ala'alai sou aexingengi uuatu no anaxo. 17  k Ia ngingi ngavikala lexe. ‘Eni amitema sou lavuluti. Eni eno'u mimii iouiou mukalu, la sou eni emasaxau mii vile la uasi.’ Ia ngingi ngalavusou lexe xoluxolungengi ne masumasua uasi. Ta maula moso ngalavusou lexe ngingi ngexolu vitanisi mo iengi seleveenu xe paxapaxainge uasi. 18  l La sou eni apeletotosinge lexe ngingi ngalotonu xoulu noxilo ane mielaxu no navu mo muxali alavua la sou ngingi ngaxali itema sou lavuluti, la sou ngingi ngalotonu tokolomo kea noxilo mo ngataanu sou utaluxu vasimenge e paxapaxa'u, la ngamaela uasi. Mo ngalotonu lamalasile noxilo sou iengi, mo sou ngamalei. 19  m Ane'i ane eni emasaxai'a, la eni akaitolone'i mo apuasi'a. La sou xavingengi mo ngaxiu 'ili'ilixomengi. 20  n Ngamaisou! Eni a atutulu no aitenga mo apolopolo. Lexe 'ei ane ulomusilo mo ukisiinu aitenga, la eni a'unalai mo nexi noxou ta'ani tapita.

21 Noxou anu ane muaulixu 'oto'oto ane ne, la eni apamatolanu sou nexi noxou taxolu no xavi muxolu no anu, loxo eni euaulixu 'oto'oto ne la nexi noxou mamilo texolu no luusou. 22 'Ei ane sangalou, la ulomusou vaikala ane Uleenu Tavuna muvikalane'i ta mitema noxou Lataua no anu laixe.”

Copyright information for `ATA