a5:1Ais 29:11; Ese 2:9-10
b5:5Tav 49:9; Ais 11:1, 10; Pal 22:16
c5:6Sek 4:10; Ioa 1:36; Pal 13:8
d5:8Lex 141:2; Pal 8:3-4
e5:9Lex 33:3, 40:3, 96:1, 98:1
f5:10Mul 19:6; Ais 61:6; Pal 1:6, 20:6
g5:11Tan 7:10; Eva 12:22

Revelation of John 5

Kaukavu Ane Mipipinu Xe Sipsip 'Olu

a Mo itema uxolu no luu ne ia no avo tema, la eni emaisou kaukavu vile mipipinu muai. Kaukavu ne, mikaukavunu xalee vile xe xalee vile mo misakiinu no anu sakisaki muxatele tamei. Mo eni emaisou angelo vile xavi misevile mu'ava tatila aloxo 'o, “'Ei umomomosou ululusou sakisaki mo uxavulalanu kaukavu ne?” Ia evile uxolu teitexi no opo loxotolo mo no lia 'o xe no nano no lia umomomo sou uxavulalanu kaukavu ne mo umaisou uasi. Eni atatama xo ixalisou evile umomomo sou uxavulalanu kaukavu ne mo umaisou uasi. b La vile noxi'a ta tatila muavuti la muvikalaleli aloxo 'o, “Natama uasi. Namaisou! Laeoni molu no anu mata Iudasi mo Anu Deviti uli'u muaulixu Satani. La sou Anu mumomomosou ululusou sakisaki muxatele tamei xe uxavulalanu kaukavu ne.”

c Anu muvikalaleli mukalu, la eni emaisou Sipsip 'Olu ututulu no nixi no luu. La ta mii tami'a ilo'a ta tatila mixixaonu. Sipsip 'Olu ne, anu loxo mivau mo sikilinu muxatele tamei xe iou muxatele tamei. Iou muxatele tamei ne, anu ta ulee noxou Lataua muxatele tamei ane mipalusi'a milu'e no lia 'o mukalusi. Anu muavuti la mune'e noxou itema e uxoxolu no luu ne sou muno'u kaukavu ane mipipinu muai no avolu tema. d Anu muno'u mukalu, la ta mii tami'a ilo'a ta tatila itemaxu vile mo tami'a mixola'u tava'u sou milotu noxou. Ane'i vilevilesi mitetelisou susapu xe paku mi'oxo no anu xoulu ia mii i'elaxu la tuma'u lailaixe mu'ana'ana no anu. Tuma'u lailaixe ne, anu lakilaka noxi'a ta mitema noxou Lataua. e La ane'i milexe lexe vile alavua aloxo 'o,

“Nini nemomomo sou nano'u kaukavu ne mo nalulusou sakisaki,
xo nini neuluasi'a mo no anu sialuxene,
la nini neno'u ulusi'a ta mitema noxou Lataua ane mata noxi'a iouiou
mo vaikalai'a iouiou mo vasime'a kaukavunu iouiou no xalee xalee tuatuala mukalusi.
10  f Mo nini nesosovosi'a mo mixali ta tatanaanu tuala
xe ta aili'i sou ixaxai noxou Lataua noxinge.
La sou ane'i isaxila'a ta mitema latala no lia 'o ukalusi.”
11  g Milexe mukalu, la emaisi'a ta angelo tavu'alo mo elomusou xoline'i. Ia itiitisi'a tavu'alo musuku mo umomomosou ta'itisi'a uasi. Ane'i mixixaonu luu ilo'a ta mii tami'a xe ta tatila. 12 La milexe tatila manina aloxo 'o,

“Sipsip 'Olu anu muulua ne,
umomomosou uno'u xavi mo lavuluti mo lavulavu noxou Lataua
xo Anu xaviinu.
Xe nenge tataxaanu mo ta'iti ualasou mo ta'osasou.”
13 Mo elomusi'a ta mimii latala mukalusi no opo loxotolo mo no lia 'o mo no laaxu lia mo no luaki milexe. Ane'i latala mukalusi mixolu no anu ne, milexe aloxo 'o.

“Itema ane muxolu no luu mo Sipsip 'Olu ne,
nenge ta'osasi'a mo ta tataxane'i
xe ta'itinu ualasi'a no voxovoxo utotomu mo kaluxu uasi,
xo ane'i xavine'i sou isaxila'u mimii latala ukalusi.”
14 Ane'i milexe mukalu, la ta mii tami'a mivikala lexe “Manina,” xe ta tatila mixola'u tava'a sou milotu noxi'a.

Copyright information for `ATA