a8:3Mul 30:1-3; Pal 5:8
b8:5Mul 19:16-19; Liv 16:12; Pal 11:19, 16:18
c8:7Mul 9:23-26; Ese 38:22; Ioe 2:30
d8:11Iel 9:15
e8:12Ese 32:7; Pal 6:12-13
f8:13Pal 9:12, 11:14

Revelation of John 8

Sakisaki Muxatele Tameisou

Xe no mine Sipsip 'Olu mululusou sakisaki muxatele tameisou, la teitexi no opo loxotolo ne tani mukii maxuvee sevele.

La eni emaisi'a ta angelo muxatele tamei mitulu no talaxu Lataua. Ane'i mitulu mukalu, la anu mulosi'a xoolau muxatele tamei.

a Xe eni emalei, la angelo vile la muno'u mii e tuma'u lailaixe vexasou mi'oxo no anu xoulu mune'e mutulu no anu valovalo. La Lataua mulosou mii tuma'u lailaixe tavu'alo manina sou u'elaxu ulai noxou ilou lakilaka noxi'a ta mitema noxou no anu valovalo e mi'oxonu no anu xoulu mutulu no talaxu itema muxolu no luu. No avolu angelo ne, la mii tuma'u lailaixe iauxuxu ilou lakilaka noxi'a ta mitema noxou Lataua mutelai noxou Lataua. b La angelo muno'u navu no valovalo ne sou mutaa mu'una no anu mii tuma'u lailaixe vexasou la mu'ana'ana. Mukalu, la anu muno'u sou muleanu mulu'e no lia 'o. La lele'e ulamilami mo luluxu uvalivalixumu xe laliua ukunikuni.

Xoolau

Angelo mu'oxonu mimii ne mukalu, la ta angelo muxatele tamei e mite-telisou xoolau muxatele tamei ne 'alai sou itaunu. c Angelo vile noxi'a mutaunu xoolau noxou, la aesi lavolavonu mo navu mupita ilou sialu muxali mulapalapau mulu'e no lia 'o. La sou ta mitema mo ovuovu no anu xalee tatalusou lia 'o mo ia'eia'e latala mukalusi mu'ela.

Xe angelo tameisou noxi'a mutaunu xoolau noxou, la mii vile loxo laxa'ilu toxoxa'a u'e'ela ia meleanu mulu'elai no luaki. La xalee tatalusou luaki sialu mukalusi. Mo ta mimii no luaki xalee tatalusi'a misoisoli xe xalee tatalusi'a lasipi tavu'alo ne mumamumamulo mukalu.

10 Xe angelo tatalusou noxi'a mutaunu xoolau noxou, la oto tatila vile u'e'ela loxo telu molu teitexi no loxotolo mulapau mulu'e no xalee tatalusou lexalexa mo pupupulu. 11  d Oto ne ulasou lexe sixula. La sou xalee tatalusou lexalexa ne muxali sixula mukalusi xe ta mitema tavu'alo miiexu la misoisoli.

12  e Xe angelo tami'asou noxi'a mutaunu xoolau noxou, la xalee tatalusou aso ilou so'io mo ta oto ne mivau la muxali isivoxo. La sou xalee tatalusou aso ilou 'olovoxo ne lamanasou uasi.

13  f Xe eni emalei, la emaisou suluvi nenu vile uvavava teitexi nonixi manina mo elomusou u'ava'ava tatila aloxo 'o, “Tu'utu'umaxu uxali manina noxinge ngingi ane ngaxolu no lia ne. Xo 'ala'alaisou ta angelo tatalu e itaunu xoolau noxi'a uao itaunu.”

Copyright information for `ATA