a1:1Apo 9:15
b1:2Rom 16:25-26
c1:5Apo 26:16-18; Xal 2:7-9
d1:7Iti 6:25-26
e1:10Apo 19:21; Rom 15:23
f1:13Apo 19:21
g1:16Mak 8:38; Apo 13:46; 1Ko 1:18-24
h1:17Ava 2:4; Rom 3:21-22
i1:19Apo 14:15-17, 17:24-28
j1:20Iop 12:7-9; Lex 19:1
k1:21Ep 4:17-18
l1:22Iel 10:14; 1Ko 1:20
m1:23Lap 4:15-19; Lex 106:20
n1:27Liv 18:22, 20:13; 1Ko 6:9

Romans 1

a Eni Paulo, amitema sou xaixai noxou Kalisito Iesu. Anu musosovosilo mo mu'avalilo, sou exali aposeli noxou, sou a'aloxu a'alo laixe noxou Lataua. b A'alo laixe ne, Lataua muvikalane'i ta mitema sou palomatana tei la sou ane'i mikaukavunu muai no nano no anu Lavuku Tavuna teinu noxou Lataua. Anu a'alo laixe ne sou 'Olu Iesu, anu muxali loxo itema, xo anu mutu'u ovuxu Deviti. Xe no mine Lataua mutulusou no anu soli, la Uleenu Tavuna noxou Lataua mulosienge lexe anu Lataua 'Olu ne xaviinu musuku. Anu Iesu Kalisito Tila noxinge. c Mo noxousi la Lataua mualaunasixe, mo no anu ualasou, la sou eni exali aposeli noxou. Anu mu'oxonu aloxo ne mo sou noxixesi la sou ane'i ane ta Iutaia uasi imuxaxu tane'i noxou Iesu, xe imulinu vaivaikala noxou. Mo ngingi kalumo ngelomusou 'ava noxou Iesu Kalisito xe ngemulinu vaivaikala noxou la ngingi kalumo ngexali ta mitema se'i noxou ane.

d La sou eni ekaukavunu vaivaikala ane 'o ulai noxinge ngingi tavu'alo e Lataua mumasaxainge misevile mo mu'avalinge la ngexali ta mitema noxou ne Romu ukalusi. Eni akilaka lexe alauna mo opo se'isisi noxou Lataua Maminge mo Tila Iesu Kalisito uxolu noxinge.

Paulo Umasaxa Lexe Uxaxasi'a ta Romu

Tei la eni alemolu laixe noxou Lataua noxilo no ualasou Iesu Kalisito noxinge ukalusi, xo ta mitema tavu'alo no xalexalee tuatuala mukalusi 'o milomusou a'alosinge lexe ngingi ngemuxaxu tangengi noxou Iesu Kalisito. Xo Lataua e eni a'oxonu xaixai noxou sou a'aloxu a'alo laixe sou 'Olu mulavusou taleli mukalusi. Anusi mulavusou lexe eni axavutalangengi utotomu. 10  e La sou no anu lakilaka noxilo. Mo utotomu la eni akilaka aloxo 'o, lexe no anu masaxa noxou la anu molu u'oxonu vote'isilo ukisi, la sou eni ane'e noxinge.

11 Xo eni emasaxa lexe amaisinge manina, la sou aalusinge no anu alualu mose'i no anu Uleenu Tavuna sou uxolu noxinge mo u'oxonu pekia'inge. 12 Ia xavutala noxilo aloxo, eni emasaxa lexe muxamuxaxu tangengi noxinge usu'ulileli xe eni noxilo usu'ulingengi aloxo ne la sou anu usu'ulinenge nenge'a ngatongato'o. 13  f Mo ta vivilo, eni emasaxa lexe ngalavu laixe lexe eni alaxu tapiena exavutala sou ane'e noxinge, ia mimii tavu'alo u'au'ausilo la alai noxinge uasi mo a muxali vaimomo 'o. Eni amasaxa lexe ane'e asu'ulingengi mo sou ngaxali ta mitema noxou Iesu Kalisito loxo ane'i ta mitema ane'i ane ta Iutaia uasi no tuatuala mose'i 'o.

14 Xo eni xaixai noxilo sou asu'uline'i ta Xiliki xe ane'i ane ta Xiliki uasi mo ane'i ane milavu xe ane'i ane ilavu uasi kalumo. 15 Aloxo ne la sou eni opoleli muavuti lexe ane'e noxinge ne Romu mo a'alomengi no anu a'alo laixe sou Iesu Kalisito kalumo.

Xavi sou A'alo Laixe Noxou Iesu

16  g Eni amaela sou a'aloxu a'alo laixe sou Iesu Kalisito uasi, xo anu xavi noxou Lataua ane, mo anu xaviinu sou ulivulixa'a ta mitema e mimuxaxu tane'i. Ane'i ta Iutaia tei xe ukalu la sou ane'i ane ta Iutaia uasi kalumo. 17  h Xo no anu a'alo laixe ne la Lataua mulosienge no anu 'ilixo lailaixe noxou e Anu muxali lamana noxi'a ta mitema. Lexe nenge tamuxaxu tanenge no 'a soko ulai utalo no 'a kaluxusou la sou anu umoxo'inge lexe nenge ta mitema telapu no iou. Aloxo vaikala mikaukavunu muai no nano no anu Lavuku Tavuna teinu noxou Lataua muvikala aloxo 'o. “Ta mitema ane imuxaxu tane'i, la Lataua umoxo'a lexe ane'i ta mitema milapu mo ane'i ixolu imauli.”

La'ia Noxou Lataua Mulai Noxi'a ta Mitema sou Susu.

18 Xo Lataua e muxolu teitexi no opo loxotolo ne la'ia noxou muxali lamana noxi'a ta mitema mukalusi e mixiunu tumali'a noxou xe i'oxonu 'ili'ilixo masumasua. No anu 'ili'ilixo masumasua noxi'a ne la mutatusou vaikala manina. 19  i La sou ta mitema ne milavusou 'ili'ilixo tavu'alo noxou Lataua ne xo Anu molu mulamanalixu noxi'a. 20  j Ioxe, musoko no mine Lataua mukoinu mimii latala mukalusi mo mune'e muxali vaimomo 'o, la ta mitema mimaisou mimii tavu'alo e Lataua mu'oxonu ne. No anu mimii nesi la ta mitema mimaisou 'ili'ilixo talume se'i noxou Lataua mo mimaisou xaviinu kaluxu uasi mo ane'i milavusou Lataua lexe Anu a loxovaa. La sou itema vile umomomo sou uvikala lexe eni alavusou Lataua uasi, uasi, xo mimii tavu'alo ne muai lamana no ie'i ta mitema mo milavusou lexe Lataua mukoinu mimii latala mukalusi ne. 21  k Aloxo ne la sou ane'i milavusou Lataua manina, io ane'i i'itinu ualasou mo ilemolu laixe noxou loxo anu Lataua uasi. Ia xavutalai'a mo tane'i ne isivoxo mutomu la i'oxovulaulausi loxo ilavu uasi. 22  l La sou ane'i itooxa'a la i'oxo lexe ane'i ta mitema sou lavulavu, ia uasi, ane'i mixovulaulau mukalu. 23  m Mo mixiunu tumali'a noxou Lataua e umauli kaluxu uasi la ilotu noxou la uasi, ia ilotu noxi'a ta mimii ane ane'i me'a mipuine'i e ixolu maxuveeni uasi loxo itema mo ta ngiala mo ta mimii iouiou no lialia xe ta sinana veveeni.

24 La sou ta mitema mixiunu tumali'a noxou Lataua aloxo ne la Lataua muxiunu tumalou noxi'a la ane'i mimulinu masaxa masua sou vasime'a, sou i'oxonu masuanu vasime'a no anu 'ili'ilixo masumasua sou vote'i. 25 Mo ane'i ne mixiunu vaikala manina noxou Lataua la muxali loxo vaikala kalavoi, mo ilotu noxou Lataua e mukoinu mimii latala mukalusi ne uasi, ia ilotu noxi'a ta mimii e anu mukoine'i. Latauasi anu tava'u mimii latala mukalusi la sou laixe lexe nenge ta mitema ta'itinu ualasou utotomu mo kaluxu uasi. Manina.

26 Xo ane'i mi'oxonu aloxo ne, la Lataua mutautalone'i mixolu mimulinu masaxa masumasua sou vasime'a ne. Aloxo ne la ta semasi'a imulinu 'ilixo laixe sou taula'i la uasi, ane'i me'a ixiui'a la, la sou i'oxonu 'ilixo sou vote'i. 27  n Mo anu iouvilesisi aloxo ne noxi'a ta mulu kalumo, imulinu 'ilixo laixe sou taula'i la uasi, ia opone'i uavuti loxo navu sou ixiui'a ta menexi'a la, la sou i'oxonu 'ilixo sou vote'i. Ta mulu ane i'oxonu 'ili'ilixo sou maela noxi'a ta menexi'a ne ane'i me'a mino'u lakolisou 'ilixo masua noxi'a ne.

28 Aloxo ne la sou ane'i ixavutala sou ixolu no laaxu Lataua uasi, la anu mu'italone'i milai mimulinu xavutala masumasua noxi'a sou i'oxo'oxonu 'ili'ilixo masumasua e lexe i'oxo'oxonu uasi ne. 29 La maulixa'a ne mu'ana'ana no anu 'ili'ilixo masumasua, la i'oxo'oxonu 'ili'ilixo masumasua aloxo 'o, imulinu 'ilixo laixe uasi, mo iisuxu ta menexi'a mi'ami'a mo i'oxonu loloxa'a ta menexi'a la ino'u mi'ami'a. Mo opone'i masuai'a ta menexi'a e mi'ami'a tavu'alo mo ilavilavi ilou i'oto'oto xe xavutala sou isaxila'u mii vile uasi imamumamulonusi. Xo ane'i ta mitema sou munumunu. 30 'Ili'ilixo ne mu'ana'ana noxi'a mo imunumunuxa'a ngatongato'o mo ikalavoisi'a ta mitema sou i'oxonu ualasi'a masuasi. Mo mixali ta uluau Lataua, mo ipulipulinu anaxa'a iouiou mo itootooxa'a xe i'iti'itinu ualasi'asi. Mo ixoxolu la ixavutala vote'i mose'i sou 'ili'ilixo masumasua alaalavua la sou i'oxonu, la ilomuxa'a ta mami'a ilo'a ta neni'a uasi. 31 Mo xavutala vile laixe uxolu noxi'a la uasi, mo ivikala lexe i'oxonu mii vile la imulinu vaikalai'a mo i'oxonu uasi, xe i'oxonu laixe noxi'a ta mitema uasi i'oxoo masuane'isi. 32 Ane'i milavusou lapuloto lailaixe noxou Lataua e, lexe ta mitema ane i'oxonu 'ili'ilixo aloxo ne, laixe lexe ive'a isoisoli. Xo ane'i isolonu sou i'oxo'oxonu 'ili'lixonesi uasi, ane'i i'itinu ualasi'a ane'i ane i'oxo'oxonu 'ili'ilixo ne kalumo.

Copyright information for `ATA