a12:1Rom 6:11, 13; 1Pi 2:5
b12:31Ko 12:11; Ep 4:7; Pil 2:3
c12:4-51Ko 12:12, 27
d12:6-81Ko 12:4-11; 1Pi 4:10-11
e12:101Pi 1:22
f12:121Te 5:16-18
g12:13Eva 13:2
h12:14Mat 5:44; 1Ko 4:12
i12:16Xav 3:7
j12:171Te 5:15
k12:19Lap 32:35; Mat 5:39
l12:20Xav 25:21-22; Mat 5:44

Romans 12

Nenge Maasi Talosou Lataua Maulinenge Ukalusi Ulai Noxou loxo Anu Mii Na'u

a La sou ta vivilo, eni axavutala xo Lataua mualaunasinge lailaixe manina, la sou eni avikalangengi pekia'u aloxo 'o. Laixe lexe ngingi ngalosou Lataua vasimenge ukalusi loxo Anu mii na'u uisalili. Mo no mine ngingi ngaxoxolu o la ngingi ngaxali loxo Anu ta na'u uisalili, mo nga'oxonu 'ili'ilixo lailaixesi e Anu umasaxau. Ngingi nga'oxonu aloxo ne, loxo anu 'ilixo sou lalotu maninasou ulai noxou no anu ulengengi. Mo mamu sou ngamulinu 'ili'ilixo masumasua noxi'a ta mitema no lialia 'o. Ia nga'italongengi ulai noxou Latauasi mo Anu molu uxiunu xavutalamengi uxali alavua, mo 'ilixomengi uxali alavua kalumo. La sou ngingi ngamomomo sou ngalavu laixe no anu masaxa noxou Lataua. La ngingi ngalvusou 'ilixo laixe, mo 'ili'ilixo e Lataua umasaxau, mo 'ilixo e mumomomo laixe manina.

b Xo Lataua mualaunasilo la mulosilo xaixai noxou sou axaxaisou, la sou eni amasaxa lexe avikalangengi vilevilesi lamana aloxo 'o. Mamu sou ngingi ngaxavutala lexe ngingisi lavulavumengi mo 'ili'ilixo noxingesi anu laixe mua'alixa'a ane'i mose'i. Uasi. Ia anu laixe lexe ngingi ngaxolu se'isisi mo tangengi umulimulinu 'ili'ilixomengi mo ngaxavutala laixe umomomo no anu sosovo sou muxamuxaxu tangengi e Lataua mulosinge. c Nenge telavusou lexe nenge vilevilesi ne vasimenge vilesisi, ia mineminenge tavu'alo mupita la sou anu muxalixu vasimenge ne ia mineminenge vilevilesi xaixaiiou iouvilemo. Anu iouvilesisi aloxo nenge ta mitema tavu'alo, ia noxou Kalisito, la nenge texali vilesisi. Mo nenge texali tangatanganenge mo tasu'usu'ulinenge ngatongato'o. d No anu alauna noxou Lataua mu'oxonu mune'e noxinge, la Anu mulosinge vilevilesi lavulavu sou xaixai iouvilesisi uasi, loxo mii lailaixe Anu mulosinge vitanisi. Lexe Anu mulosou itema vile lavulavu sou upalomatanane'i ta mitema, la anu u'oxonu mo uvivikala, umomomo no anu sosovo sou muxamuxaxu tanu noxou. Mo lexe itema vile Anu mulosou lavulavu sou usu'uline'i ta mitema, la anu laixe lexe anu u'oxonu maninasou mo usu'uline'i ta mitema laixe, mo lexe vile Anu mulosou lavulavu sou uxaxai loxo tisa sou ulosiexa'a ta mitema no anu vaikalau Lataua, la anu laixe sou anu u'oxonu maninasou xaixai loxo anu tisa. Mo lexe itema vile muno'u lavulavu sou upeletoto mo mamaatola, la anu laixe lexe anu u'oxonu maninasou sou umamaatolane'i ta mitema. Mo lexe vile uno'u lavulavu sou usu'uline'i ta mitema e pa'usi'a no anu mimii mose'i, la anu laixe lexe anu u'oxonu aloxo ne, mo ulosi'a mimii ukalusi. Mo lexe vile uno'u lavulavu sou uulaxune'i ta mitema, la anu laixe lexe anu u'oxonu xaixai noxou sou usaxila'a ta mitema laixe. Mo lexe itema vile ulavusou tanuxa'a ta mitema, la anu u'oxonu ilou 'osa'ilasi.

Nenge Tamasaxai'a ta Menexinge Mo Tanengexa'a

No mine tangengixa'a ta menexinge, la anu laixe lexe ngingi tanengengixa'a maninasou, ia ngakalakalavoi uasi. Nga'umolu 'ilixo masumasua ia ngetetelisou 'ilixo laixe. 10  e Anu laixe lexe ngingi ngamasaxai'a ta menexinge maninasou no tangengi loxo ta vivinge maninasou. Mo anu laixe lexe ngingi utotomu ne nga'itinu ta menexinge ualasi'asi, ia ngingi uasi. 11 Ngingi xavingengi mo ngaxaxai utotomu, ia ngatotosa uasi, la sou Uleenu Tavuna uavutilingenge no anu masaxa sou nga'oxonu xaixai noxou Tila. 12  f Mo ngingi ngaxolu ngaloloopalasi la ngingi nga'osa, lexe tu'umaxu uxali noxinge, la ngatulu pekia'inge mo ngakilaka utotomu. 13  g Lexe ta mitema noxou Lataua mose'i i'a mimii xe xa'a 'ani uasi, la ngingi ngasu'uline'i. Mo lexe taasila ine'e noxinge, la ngasaxila'a laixe. 14  h Mo lexe ta mitema i'oxonu masuangengi, la ngakilakasi'a sou Lataua usu'uline'i, ia ngakilakaxa'a sou Lataua u'oxo masuaneni mamu. 15 No mine ta mitema i'osa, la ngalai mo ngongi'a nga'osa, xe itama la ngalai mo ngongi'a ngatama. 16  i Mo nga'oxonu opongengi iouvilesisi aloxo ne noxi'a ta mitema ukalusi, mo nga'itingengi mamu, ia utotomu ne nga'osa sou ngalai ngongi'a ta mitema e ilavusou i'oxonu tilasi'a uasi ne ngaxolu ngapita. Mo nga'itingengi lexe ngingisi ngelavusou mimii latala mukalusi mamu.

17  j Lexe ta mitema i'oxonu masua noxinge la ngakolinu no anu masua mamu. Ngalaxa'ingengi laixe mo sou nga'oxonu 'ilixo laixesi no ie'i ta mitema. 18 Mo anu laixe lexe ngingi ngatovonu sou ngakamuli votevote'i mose'i sou ngaxalixu xoluxolu se'isisi no taingengi, ia 'oto'oto ilou lavilavi uxolu no taingengi mamu. 19  k Ta menexilo e eni emasaxainge musuku, lexe i'oxonu masuangengi, la la'iangenge mo ngakolinu mamu, ia ngalosou Lataua taiinu sou Anu molu ukolinu no anu la'ia noxou. Aloxo kaukavu muai no nano no anu Lavuku Tavuna teinu noxou Lataua, muvikala aloxo 'o. “'Ilixo sou lakoli ne, Eni xaixai noxilo ane, Eni melo akolinu 'ilixo noxi'a ne, mo sou a'oxonu masuane'i manina.” 20  l Aloxo ne la sou, “Lexe itema mu'oxonu masua noxinge ne usolixu, la nga'a'anu, xe usoliu lexa la ngaienu. No mine ngingi nga'oxonu aloxo ne, la ngapamaelanu manina.” 21 Mamu sou iengi uvaxau 'ilixo masua utaloxolingenge, ia ngingi ngataloxolixu no anu 'ilixo laixe noxinge.

Copyright information for `ATA