a14:1Rom 15:7
b14:2Tav 9:3-4
c14:3Kol 2:16
d14:4Mat 7:1; Iak 4:11-12
e14:5Xal 4:10-11
f14:8Xal 2:20
g14:102Ko 5:10
h14:11Ais 45:23; Pil 2:10-11
i14:14Apo 10:15; Tit 1:15
j14:151Ko 8:11-13
k14:19Rom 12:18, 15:2
l14:201Ko 8:13

Romans 14

Tatilovosou 'Ilixo Noxi'a ta Menexinge Mamu

a Itema vile umuxaxu tanu ia loopala noxou ne pekia'u uao, la laixe sou ngano'u u'una no anu lalotu, ia ngatovonu sou nga'otoxu no anu vaivaikala sou mimii iouiou mo nga'oto'oto no ananenge uasi. b Itema vile mumuxaxu tanu manina, la sou no anu muxamuxaxu tanu noxou ne, la anu u'ou la'ilali iouiou ne ukalusi, ia itema vile ane umuxaxu tanu pekia'u uasi la anu u'ou kamakalasi. c Ia itema e ulavusou u'ou la'ilali iouiou ukalusi ne, laixe lexe upupuiou menexu e u'ou la'ilali iouiou uasi ne mamu. Mo itema e ulavusou u'ou la'ilali ukalusi uasi ne, laixe lexe upupuiou itema e ulavusou u'ou la'ilali ukalusi ne mamu, mo uvavaaxu mamu. Xo itema ne Lataua muno'u mulivunoxu kalumo. d Nini 'ena'ei sou natilovosou 'ilixo noxou itema sou xaixai noxou itema vilemo ne? Lexe anu utulu pekia'u no anu xaixai noxou xe lexe ulapau no anu xaixai noxou, la anu mii noxou tilasou. Ia anu utulu pekia'u no anu xaixai noxou xo Tila anusi mumomomo sou u'oxonu utulu pekia'u.

e No anu xavutala noxou itema vile, la anu u'oxo lexe voxo vile ne anu tila no anu voxo mose'i. Xe no anu xavutala noxou itema vile, la anu u'oxo lexe voxo tavu'alo ne anu iouvilesisi. Ia ta mitema vilevilesi ilavusou no nano no tane'i manina mu'oki lexe xavutala anevaa anu manina. Lexe itema vile usosovosou voxo vile loxo anu voxo tatila sou ulotu no anu, la anu u'oxonu aloxo ne sou uxavutalanu Tila sou uvikala laixe ulai noxou. Mo itema vile ulavusou u'ani la'ilali la anu u'ani ulai noxou Lataua. Mo itema e ulavusou u'ou la'ilali ukalusi uasi ne anu u'oxonu aloxo ne sou uxavutalanu Tila, la sou anu uata ne. Mo anu kalumo ulemolu laixe ulai noxou Lataua. Nenge telavusou lexe no tainenge 'o ne itema vile maulixu ne anu molu usaxila'u uasi mo solixu, ne anu molu usoli no anu masaxa noxou uasi. f Lexe nenge taxolu tamaumauli la anu mii noxou Tila. Mo lexe nenge tasoli la anu mii noxou Tila kalumo. La sou lexe nenge taxoxolu ta maumauli mo lexe nenge tasoli kalumo ne, la anu mii noxou Tilasi.

Tava'u aloxo nesi, la sou Kalisito musoli xe mutulu kalumo, aloxo ne la sou uxali Tila noxi'a ane'i ane misoisoli xe ane'i ane imaumauli kalumo. 10  g Ia nini 'ena'ei manina la sou nini namomomo sou natilovosou 'ili'ilixou vivine, xe natalotaloxolixu vivine 'o? Nenge telavusou lexe nenge latala ne ili'i la taxali tatulu no anu vaivaikala no iou Lataua. 11  h Xo kaukavu muai no nano no anu Lavuku Tavuna teinu noxou Lataua muvikala aloxo 'o.

“Eni Tila, eni axolu amauli utotomu, eni evikala manina.
Ta mitema tavu'alo no lia 'o ine'e noxilo la ixola'u tava'a sou ilotu noxilo,
la ivikala lamana lexe eni Lataua maninasou.”
12 La sou nenge vilevilesi tatulu sou tapala'alixu 'ili'ilixo menge noxou Lataua.

13 Aloxo ne la sou anu laixe lexe nenge takalu no anu 'ilixo sou tatilovosou 'ilixo noxi'a ta vivinge. Ia taxavutala laixe mo tatovo tamulinu xavutala vileli, mo sou tatovo sou ta'oxonu mii vile uxolu sou utaluxu vote'isi'a xe ta'oxonu uai sou itulakisou la u'oxone'i ilapau no anu susu mamu. 14  i Tila Iesu mu'oxonu xavutala noxilo lamana, la eni elavusou manina lexe, la'ilali mii vile anu masua no iou Lataua uasi. Ia lexe itema vile uxavutala lexe mii vile anu masua no anu xavutalau, la anu laixe lexe anu mii ne uxolu masua avile. 15  j Mo lexe nini na'ou mii vile no iou vivine vile, ia anu vivine ne mulavusou lexe mii ne masua no iou Lataua, la nini na'oxonu masuanu opoonusi, ia tanenixu uasi Kalisito musoli la mulivunoxu vivine ne, la sou nini navila'isou opoonu no anu la'ilalixene ne mamu. 16 Lexe ngingi ngexavutala lexe mimii se'i ne laixe, la ngasaxila'inge laixe, loxo 'o io no anu 'ilixomengisi la u'oxone'i ane'i mose'i la ivikala masua no anu mii ne. 17 Xo saxisaxila'u noxou Lataua ne anu mii sou la'ilali xe mii sou lexa e taiexu 'o uasi. Ia 'ilixo maninasou sou saxisaxila'u noxou Lataua ne, ane 'ilixo mulapu, mo opo se'isisi, xe 'osa'ila e Uleenu Tavuna uxalixu no anu maulingenge. 18 Xo itema e umulinu 'ilixo aloxo ne, mo u'oxonu xaixai noxou Kalisito, la Lataua umasaxau no anu 'ilixo noxou, mo ta mitema kalumo ivikalasou laixe.

19  k La sou anu laixe lexe nenge tatovonu xavinenge mo ta'oxonu 'ili'ilixo e umomomo sou uxalixu opo vilesisi no tainenge, mo 'ili'ilixo sou u'oxonu pekia'u loopala noxi'a ta menexinge la u'oxone'i ileme no anu uleene'i. 20  l Nini naxavutala no anu la'ilalisi la sou uvila'isou xaixai noxou Lataua uasi. La'ilali latala ne anu laixe sou 'ani'ani, ia lexe nini na'ou la'ilali vile e menexine vile uo'ou uasi xe u'oxonu ulapau, la nini ne'oxonu 'ilixo masua. 21 Lexe nini na'ou mimii iouiou mo naiexu lexa pekia'u mo na'oxonu mimii mose'i la e anu umomomo sou u'oxonu vivine ulapau, la anu laixe lexe nini na'oxonu mamu. 22 Aloxo ne la sou lexe nini nemuxaxu taneni no anu mimii e nini na'oxo'oxonu ne a loxovaa, la anu mii noxinge ngongou Latauasi. Mo itema e uxavutala lexe mimii e sou 'ani'ani ne anu laixe mukalusi ia mii vile sou u'oxonu masuanu uasi, la anu u'osa manina. 23 Ia itema e u'ou mimii ne ia uxavutala tametamei no anu 'ilixo e anu mu'oxonu ne, la anu mu'oxo masuanu. Xo anu u'ani umulinu loopala noxou uasi, la sou mimii e nenge ta'oxonu umulinu loopala noxinge uasi, la nenge tesusu.

Copyright information for `ATA