a15:21Ko 10:24, 33
b15:3Lex 69:9
c15:42Ti 3:16
d15:7Rom 14:1
e15:8Mat 15:24
f15:9Lex 18:49; Apo 3:25
g15:10Lap 32:43
h15:11Lex 117:1
i15:12Ais 11:10; Pal 5:5
j15:16Rom 1:5, 11:13
k15:202Ko 10:15-16
l15:21Ais 52:15
m15:22Rom 1:13
n15:25-261Ko 16:1-4
o15:26Apo 24:17; 1Ko 16:1; 2Ko 8:1, 9:2, 12
p15:271Ko 9:11
q15:29Rom 1:11
r15:302Ko 1:11; Kol 4:3; 2Te 3:1

Romans 15

Nenge ane loopala noxinge pekia'u la xaixai noxinge sou tasu'uline'i ane'i ane loopala noxi'a pekia'u uasi no anu tu'utu'umaxu noxi'a. Ia taxavutalanengesi sou tasu'usu'ulinengesi uasi. a Ia anu laixe lexe nenge vilevilesi taxavutalane'i ta vivinge kalumo, sou tasu'uline'i sou i'oxonu 'ilixo laixe mo tasu'uline'i sou ta'oxonu loopala noxi'a utulu pekia'u. b Xo nenge telavusou lexe Kalisito kalumo mune'e la uxavutala sou usu'ulinusi uasi. Ia aloxo vaikala muai no nano no anu Lavuku Tavuna teinu noxou Lataua muvikala aloxo 'o, “Ta mitema mivikalasine masumasua, la vaikala masumasua noxi'a ne misu'anu mutelo noxilo.” c Xo vaikala tavu'alo e mikaukavunu muai no nano no anu Lavuku Tavuna teinu noxou Lataua tei ne, ane'i mikaukavunu sou talomusou la usu'ulinenge sou tano'u lavulavu no anu. Vaivaikala ne sou upelapela'inge mo u'oxonu tanenge pekia'u sou tamuxaxu tanenge noxou Latauasi.

Eni akilakasinge lexe Lataua anusisi upelapela'inge mo Anu anusisi ulosinge xavi sou ngaxaxai ngapita mo opo vilesisi uxolu no taingengi, mo Anu usu'ulingengi sou ngamulinu 'ilixo noxou Kalisito Iesu. La sou ngingi ukalusi ne ngapita ngaxali no anu xavutala vilesisi, mo ngapitanu anangenge sou nga'itinu Lataua ualasou. Anu Lataua xe anu Tila noxinge Iesu Kalisito Momu.

d Mo ngasexelangenge ngatongato'o mo ngano'a ta mitema ine'e ngongi'a ngaxolu ngapita, aloxo Kalisito mu'oxonu noxinge tei, la musexelangenge sou muno'inge ngene'e ngexolu noxou. No anu 'ilixo ne la sou ngingi nga'itinu Lataua ualasou. e Mo eni avikalangengi aloxo 'o, Kalisito muxali itema sou xaixai sou usu'uline'i ta Iutaia, Anu mu'oxonu aloxo ne, mo sou ulamana lexe vaikala noxou Lataua ne anu manina, mo no anu 'ilixo ne, la anu umomosou vaikala e Lataua musakiinu noxi'a ta xaixasi'a tatei. f Anu aloxo ne, la sou ta mitema ane ta Iutaia uasi, la i'itinu Lataua ualasou no anu alauna noxou ne. Aloxo vaikala mikaukavunu muai no nano no anu Lavuku Tavuna teinu noxou Lataua muvikala aloxo 'o,

“Tava'u aloxo ne, la sou eni a'itinu ualasine no taine'i ta mitema ane ta Iutaia uasi.
Mo alexe lexesou a'itinu ualasine.”
10  g Mo vaikala vile la mikaukavunu muai no nano no anu Lavuku Tavuna teinu noxou Lataua muvikala kalumo aloxo 'o,

“Ngingi ta mitema ane ngaxali no anu mata noxi'a ta Isilaeli uasi ne,
ngingi ngongi'a ta mitema noxou Lataua nga'osa ukei.”
11  h Mo muvikala vile la aloxo 'o,

“Ngingi ta mitema ane ta Iutaia uasi ne nga'itinu Tila ualasou,
mo ta mitema latala ukalusi no lia 'o ilexe mo i'itinu ualasou.”
12  i Mo Aisaia kalumo muvikala aloxo 'o,

“Iesi xasou vile uxali ili'i la usaxila'a ta mitema latala no xalexalee tuatuala no lia 'o ukalusi.
Ta mitema ane ta Iutaia uasi ne mixolu sou imolomolo tane'i noxousi sou une'e la usu'uline'i.”
13 Eni akilaka lexe Lataua e nenge taxolu taloloopala noxou sou ulosinge mii lailaixe ne, Anu molu u'ana'analingenge no anu 'osa'ila tatila xe opo se'isisi loxo ngingi ngemuxaxu tangengi noxou sou u'oxonu ne, mo no anu xavi Uleenu Tavuna la u'ana'analingenge la ngaxolu sou ngaloopalasi.

Paulo Mulai Mua'aloxu A'alo Laixe Noxi'a ta Mitema E Ilavusou Lataua Uasi

14 Ta vivilo, eni no anu xavutalaxeni, la eni elavusou manina lexe ngingi ngalavusou nga'oxonu 'ilixo laixe utotomu. Mo ngingi ngeno'u lavulavu no anu mimii iouiou mukalusi, la sou ngingi vilevilesi ne ngamomomo sou ngalosiengi ngatongato'o. 15 Ia vaikala noxilo se'i e eni ekaukavunu 'o ne anu pekia'u sevile, ia eni amama'u sou akaukavunu uasi. La eni emasaxa lexe alivunoxu xavutalamengi no anu mimii mose'i sou ngaxavutala no anu la. Xo Lataua mualaunasilo. 16  j Ia musosovosilo sou exali itema sou xaixai noxou Kalisito Iesu sou alai a'aloxu a'alo laixe sou Kalisito Iesu noxi'a ta mitema ane ane'i ta Iutaia uasi. Mo no anu xaixai noxilo ne, la eni axaxai loxo ta mitema sou ielaxa'a ta sipsip, sou a'aloxu a'alo laixe noxou Lataua. Eni exali loxo ta mitema sou i'elaxa'a ta sipsip, mo emasaxa lexe ano'a ine'e sou alosou Lataua loxo anu mii na'u sou talosou la Anu u'osasi'a manina. Mo Uleenu Tavuna mu'oxone'i mixali Anu ta na'u muisalili.

17 Nexi noxou Kalisito Iesu texaxai tepita la sou eni a'osasou xaixai noxou Lataua sou a'oxonu. 18 Eni maasi la avikalangengi no anu mii vile la uasi, ia emasaxa lexe a'alomengi no anu mii ma'ia Kalisito mu'oxonu mukalu no anu maulixo, sou eulaxune'i ta mitema ane'i ane ta Iutaia uasi mine'e sou mimulinu vaikala noxou Lataua. Anu musu'ulinu vaivaikala noxilo la mu'oxonu mimii mose'i lailaixe muxali no avolo. 19 Mo no anu xavi no anu Uleenu Tavuna, la mulosilo xavi sou e'oxonu sosovo iouiou muxali. La esokou exaxai ne, ne Ielusalemu mo exixaoxao sou ea'aloxu a'alo laixe sou Kalisito mulai noxi'a ta mitema mukalusi no tuatuala no paxapaxa, la elai exali avile no xalee lia tila ne Ililikumu. 20  k Eni no anu masaxa tatila noxilo aloxo 'o, eni amasaxa sou a'aloxu a'alo laixe sou Kalisito ulai noxi'a ta mitema ane milavusou mukalu uasi, ia a'aloi'a ane'i ane ilavusou uao. Xo eni amasaxa sou atulusou tani teitexi no anu kokovu itema vile mumulaxu tei uasi. 21  l Ia aloxo kaukavu vile mikaukavunu muai no nano no anu Lavuku Tavuna teinu noxou Lataua muvikala aloxo 'o,

“Ta mitema e ilomusou a'alosou tei uasisi manina ne ane'i ilomusou,
la ane'i imaisou.
Xe ane'i ane ilomusou vaikala noxou uasi ne,
ilomusou la ilavusou.”
22  m Xaixai nesi mu'au'ausilo no anu voxo tapiena la alai axali noxinge uasi.

Paulo Umasaxa Lexe Ulai Umaisi'a ta Romu

23 Ioxe aloxo eni elemolu tei lexe xaixai mu'au'ausilo la ane'e axali noxinge uasi. Ia vaimomo 'o xaixai no xalee ane 'o ne mukalu, la sou eni xavutalaxeni mutulu sou ane'e noxinge. Xo xavutalaxeni mutulu sou lexe ane amaisinge ne muxolu tatei mo mo mune'e muxali vaimomo 'o. 24 La sou lexe eni alai no xalee lia tila ne Sipeini la eni exavutala lexe apolo une'e loxo noxinge mo amaisinge tei o, ukalu la sou eni alai. Mo eni a'osa sou amaisinge mo taxolu tasexelanenge ngatongato'o xe nenge'a taxolu sevile ukalu, la sou ngingi ngasu'ulileli sou alai ne Sipeini. 25  n Ia vaimomo 'o eni alai ne Ielusalemu mo asu'uline'i ta mitema noxou Lataua ne tei o. 26  o Xo ta mitema mose'i mixolu no taine'i ta mitema noxou Lataua no xalee lia tila ne Makedonia xe ne Akaia mipitanu su'uli se'i sou ulai usu'uline'i ne Ielusalemu. 27  p Xo xavutala sou su'uli ne ane'i me'a mi'osa sou mi'oxonu, la sou no anu 'ilixo e ane'i mi'oxonu ne anu laixe, xo ane'i mii vile ta Iutaia mi'oxonu mulai noxi'a ia ikolinu uasi. Mii e ikolinu uasi ne aloxo 'o, ane'i ta mitema ane ane'i ta Iutaia uasi ne, vote'i sou su'uli sou uleene'i ne a noxi'a ta Iutaiasi ne. La sou anu laixe sou ane'i mikolinu sou misu'uline'i no anu mimii sou vasimenge. 28 La sou eni alailixu su'uli 'o, mo lexe melo alai a'italonu noxi'a ukalu xe ili'i lexe eni alai ne Sipeini, la sou eni apolo une'e loxo noxinge mo amaisinge tei o, xe ukalu la sou eni alai. 29  q La eni elavusou lexe eni ane'e noxinge, la alualu e noxou Kalisito muxolu noxilo 'o ne u'ana'ana noxinge manina.

30  r La sou vaikala pekia'u noxilo ulai noxinge ngingi ta vivilo aloxo 'o, ngasu'ulileli mo nenge'a tapita sou takilaka pekia'u silo ulai noxou Lataua sou usu'ulileli. Xo nenge temuxaxu tanenge noxou Tila noxinge Iesu Kalisito mo Uleenu Tavuna muxalixu 'ilixo sou tanengexa'a ta menexinge muxolu no nano no oponenge. 31 Ngakilakasilo mo sou eni alai ne Ielusalemu, la ta mitema noxou Lataua ane mixolu ne i'osa sou ino'u su'uli ma'ia noxilo. Mo ngakilakasilo sou Lataua u'umeleli no avo'a ta Iutaia mose'i e ilavusou imuxaxu tane'i noxou Lataua uasi. 32 Mo lexe masaxa noxou Lataua, la eni a'osa manina no mine eni ane'e amaisinge, la nenge'a taxolu sevile mo ama'ila mo ano'u xavi la. 33 Eni akilaka lexe opo se'isisi noxou Lataua uxolu noxinge latala ukalusi utotomu mo kaluxu uasi. Manina.

Copyright information for `ATA