a2:1Mat 7:1-2; Ioa 8:7
b2:4Ep 1:7; 2Pi 3:15
c2:6Lex 62:12; Xav 24:12; Mat 16:27; 2Ko 5:10
d2:82Te 1:8
e2:14Apo 10:35
f2:19-202Ti 3:5
g2:21Mat 23:3-4
h2:24Ais 52:5
i2:26Xal 5:6
j2:29Lap 30:6; Kol 2:11

Romans 2

Lataua Utulusi'a ta Mitema no Anu Vaivaikala

a Aloxo ne la sou ngingi nga'oxonu masuangengi sou ngasu'anu anangenge ulai noxou menexinge no anu susu noxou. Ngingi nga'oxonu aloxo ne, la ngingi menge ngavivikalasinge la ane, mo ngingi menge nga'oxonu masuangengi la, xo ngingi nga'oxonu 'ili'ilixo iouvilesisi aloxo menexinge ne u'oxo'oxonu ne. Xo nenge telavusou lexe ta mitema ane i'oxonu 'ili'ilixo aloxo ne, la Lataua u'oxonu 'ilixo laixe la ulosi'a ulusou 'ilixo ma'ia ane ane'i mi'oxonu ne. La sou nini namitema vitanisi no lia 'o natilovosi'a ta menexine ne no anu 'ili'ilixone'i ne ia nini kalumo na'oxo'oxonu ne. La sou nini nexavutala a loxovaa? La sou nini namomomo sou na'ume no anu la'ia noxou Lataua? b Mo Lataua mu'oxonu 'ilixo laixe manina la ukolinu susu noxine ne palea uasi, muxolu se'isisi mo mulosine voxo maxuveeni sou lexe nini naxiu tumalineu 'ilixo masua. La sou 'ilixo laixe noxou Lataua e mu'oxonu noxine ne, nini nemaisou a loxovaa? Nini nemaisou loxo mii vitanisi, ne? La sou nini netatusou oponeni xe naxiunu tumalineu 'ilixo masua uasi, la anu loxo nini mene natetelonu tu'umaxu utelo noxine la. No anu voxo mine la'ia noxou Lataua uxali lamana no anu voxo mine Anu utulusi'a ta mitema no anu vaivaikala. c La Lataua ulosi'a ta mitema vilevilesi ulusou umomomo no anu 'ili'ilixo ma'ia ane ane'i mi'oxonu. Noxi'a ane'i ane xavine'i sou i'oxo'oxonu 'ilixo laixe mo ikakamuli vote'i sou ilo'a Lataua ixolu teitexi no opo loxotolo, mo ino'u uala tila, xe ino'u mauli ane ukalu uasi, la Lataua ulosi'a mauli ane kaluxu uasi. d Ia noxi'a ane'i ane ixavutala noxi'asi mo ixiunu tumali'a no anu vaikala manina xe imulinu 'ili'ilixo masumasuasi, la la'ia noxou Lataua uxolu noxi'a la ino'u navunavu tatila manina. Tu'utu'umaxu mo navunavu uxali noxi'a ta mitema tavu'alo e i'oxo'oxonu 'ili'ilixo masumasua aloxo ne. Ta Iutaia tei xe ili'i la noxi'a ane'i ane ta Iutaia uasi. 10 Ia Lataua ulosi'a ta mitema ane mi'oxo'oxonu 'ili'ilixo laixe opo se'isisi xe uala tila. Usoko noxi'a ta Iutaia tei xe ili'i la noxi'a ane'i ane ta Iutaia uasi. 11 Xo Lataua umomomo sou u'oxonu tulatula noxou evile uasi.

12 La sou ta mitema e ilavusou lapuloto uasi la i'oxonu 'ili'ilixo masumasua ne iulua mo ane'i ane milavusou lapuloto ia i'oxo'oxonu susu ne ane'i iulua kalumo. 13 Xo ta mitema e milomusou lapuloto vitanisi la imulimulinu uasi ne ane'i ilapu no iou Lataua uasi. Ia ane'i ane milomusou lapuloto xe imulimulinu la Lataua uleme'a lexe ane'i ta mitema mulapu. 14  e Ta mitema e ta Iutaia uasi ane'i va'axu mo ne, ane'i i'a lapuloto sou imulinu uasi, ia no anu xavutalai'asi la imulimulinu 'ili'ilixo loxo lapuloto mulemolu ne. Manina ane'i i'a lapuloto uasi, ia xavutalai'a uulaxune'i sou imulimulinu lapuloto ne, la xavutala noxi'asi ne muxali loxo lapuloto noxi'a. 15 Musoko no mine ane'i mi'oxonu aloxo ne, la 'ilixone'i mumaxau lexe mii ma'ia lapuloto mulemolu lexe imulimulinu ne Lataua mukaukavunu muxolu no nano no tane'i. Mo no anu 'ili'ilixo muxali muatu no anu xavutalai'a ne mumaxa'u lexe lapuloto muxolu no nano no opone'i ne, manina mo voxo mose'i la xavutalai'a uvikalane'i lexe ngingi ngesusu xe uvikalane'i lamana lexe ngingi ngasusu uasi. 16 Anu uxali no anu voxo e Lataua musosovosou sou utulusi'a ta mitema no anu vaivaikala sou 'ili'ilixo talume mo xavutala talume noxi'a e mixolu la mi'oxo'oxonu. Aloxo no anu a'alo laixe eni ea'aloxu lexe Lataua u'italonu xaixai sou utilovosi'a ta mitema ukalusi ne no avolu Iesu Kalisito.

Ta Iutaia Ivikala Lexe Ane'i Ixali Laixe no Anu Lapuloto

17 Ia vaimomo 'o eni avikalangengi ta Iutaia lamana aloxo 'o, ngingi ngexavutala lexe no anu vote'i sou ngamulinu lapuloto laixe, la anu umomomo sou usu'ulingengi. Mo mamu sou nga'itinu ualasinge la ngavikala lexe nexi ta mitema noxou Lataua. 18 Ngingi ne ngelavusou masaxa noxou Lataua ne, mo ngeno'u lavulavu no anu lapuloto ne mukalusi sou ngamulinu 'ili'ilixo ma'ia mulapu. 19  f Ngingi ngexavutala manina lexe no anu maulingenge la ngingi ngeno'u lavulavu manina no anu lapuloto, mo ngelavusou mimii mukalusi la mii ma'ia ngalemolu ne anu manina Lataua nexi temomomo sou talosie'i ane'i ane ie'i seleselevenu vote'i, mo taxolu loxo telu sou ukaasi'a ane'i ane ixoxolu no isivoxo mo taxali ta mitema sou talosie'i ta mitema ane ixovulaulau no anu lavulavu, xe taxali ta tisa noxi'a ta molomolo ta kitukitu. 21  g Laixe, sou lexe ngingi ngapotone'i ta mitema, ia loxovaa ngingi umomomo sou ngapotongengi tei o uasi? Ngingi ngavikalane'i ta mitema lexe ngapakali mamu, ia male ngingisi ngapakali? 22 Mo ngingi ngavikalane'i ta mitema lexe ngongie menexine semau ngaai mamu mo sema kalumo aloxo ne, ia ngingisi ngalavusou nga'oxo'oxonu 'ilixo ane ne? Mo ngingi ngamasaxai'a ta lataua kalakalavoi uasi, ia male ngingi ngalavusou ngalai ngapakali no nano no taasou lalotu noxi'a? 23 Ngingi nga'itinu ualasinge la ngavikala lexe, “Nexi telavusou lapuloto noxou Lataua.” Ia ngamulinu uasi, la ngingi ngelavusou lexe ngingi nga'oxonu Lataua ualasou masua uasi? 24  h Anu aloxo mikaukavunu muai no nano no anu Lavuku Tavuna muvikala aloxo 'o, “Xo no anu 'ilixo noxinge ta Iutaiasi la ta mitema va'axu ivikala masua noxou Lataua.”

25 Lexe ngingi ngamulinu lapuloto laixe la 'ilixo sou xooxoo ungasinge ne anu maninasou, ia loxo ngingi ngamulinu lapuloto ne laixe uasi, la anu loxo xooxoo ungasinge uasi. 26  i Ia lexe ane'i ane xooxoo ungasi'a uasi ia imulimulinu 'ili'ilixo laixe e lapuloto muvikalane'i sou imulinu, la ane'i mixali loxo xooxoo mungasi'a. 27 La sou ngingi ne mikaukavunu lapuloto a muxolu sou ngamulinu mo xooxoo mungasinge ia ngamulinu lapuloto laixe uasi, la ane'i ane xooxoo ungasi'a uasi ipupuiengi xo ane'i mimulinu lapuloto ia ngingi uasi.

28 Ia itema e muxolu Iutaia no anu ualasi ne anu Iutaia maninasou uasi, 'ilixo sou xooxoo ungasinge ne, anu mii sou vasimengesi uasi. 29  j Xo itema e uxali Iutaia no anu opoonu xe xavutalau la anu Iutaia maninasou. Mo 'ilixo sou xooxoo ungasou ne uxolu kalumo no nano no anu opoonu xe xavutalau, mo uxali no anu 'ilixo sou umulinu lapuloto e mikaukavunu ne uasi, anu mii Uleenu Tavuna uxalilixu noxou itema maulixu. Itema aloxo ne no ie'i ta mitema la i'itinu ualasou uasi, ia noxou Lataua, la Anu u'itinu ualasou.

Copyright information for `ATA