a5:3Iak 1:2-3; 1Pi 1:5-7
b5:8Ioa 3:16; 1Ioa 4:10
c5:9Rom 1:18, 2:5; Ep 2:3-5
d5:12Tav 3:6; Rom 6:23
e5:13Rom 4:15
f5:181Ko 15:22
g5:19Ais 53:11
h5:21Rom 6:23

Romans 5

Opo Se'isisi Xe 'Osa'ila

La sou no mine nenge tamuxaxu tanenge noxou Lataua la anu mumoxo'inge lexe nenge ta mitema telapu. Mo noxou Tila noxinge Iesu Kalisitosi la Anu muxalixu opo se'isisi no tainenge nenge nenge'a Lataua. Noxou Iesusi la Anu mukisiinu vote'isinge ta mitema ane temuxaxu tanenge noxou Lataua. La sou vaimomo 'o nenge texolu no nano no anu alauna noxou, mo texolu teloopalasi noxou Lataua sou uno'inge la nenge'a taxolu ta'osa'osa teitexi no opo loxotolo. a La sou nenge ta'osasou ane nesi uasi, nenge ta'osasou tu'utu'umaxu ane muxali noxinge kalumo, xo nenge telavusou lexe no anu tu'utu'umaxu ne la anu u'oxonu pekia'inge. Mo tatulu pekia'inge no 'a tu'utu'umaxu, xe lexe taua'alixu tu'utu'umaxu ne, la nenge taxolu sou taloopalasi. Mo nenge taxolu taloloopalasi, la nenge tamomomo sou tamaela uasi, xo Lataua mulosinge Uleenu Tavuna mune'e muxolu noxinge, la mu'ana'analinenge no anu 'ilixo sou tanengexa'a ta menexinge.

La sou ngamaisou, no mine nenge xavinenge sou menge tasu'ulinenge la uasi, la Lataua musosovosou voxo sou Kalisito mune'e musolisinge nenge ta mitema sou susu, la mulivulinenge. Mo anu umomomo sou itema vile usoli sou usu'ulinu itema vile 'ilixonu mulapu uasi, ia lexe anu mumaisou itema ne mu'oxonu 'ilixo laixe la sou anu male umomomo sou ulai usoli sou usu'ulinu. b La nenge texolu loxo ta mitema sou susu ia Kalisito mune'e musolisinge. No anu 'ilixo e Lataua mu'oxonu ne, la mumaxa'u lamana lexe anu tanunenge misevile.

c La sou no mine Kalisito musoli xe sialuxu mu'uinenge, la sou Lataua mumoxo'inge lexe nenge ta mitema telapu. La sou nenge telavusou lexe Anu usu'ulinenge laixe no anu voxo sou la'ia noxou Lataua uxali. 10 Xo no mine nenge texolu tauluau Latauasio, la 'Olu mune'e musoli, la sou no anu soli noxou ne la muxalixu opo vilesisi muxolu no tainenge nenge'a Lataua. Vaimomo 'o Lataua 'Olu muno'u mauli kaluxu uasi, mo nenge ane opo vilesisi muxolu no tainenge nenge'a Lataua, talavu laixe lexe nenge tano'u mauli no anu maulixu kalumo. 11 Mo no anu anenesi uasi, ia nenge ta'osa toxoxa'a manina noxou Lataua kalumo no anu xaixai noxou Tila noxinge Iesu Kalisito mu'oxonu, la sou muxalixu opo vilesisi no tainenge nenge'a Lataua la.

Adamu Muxalixu Soli Ia Kalisito Muxalixu Mauli

12  d La sou nenge telavusou lexe itema vilesisi e Adamu mu'oxonu susu, la sou susu muxali no lia 'o, la susu muxalixu soli, mo no anu vote'i ane nesi la soli muno'a ta mitema mukalusi, xo ane'i latala ne misusu mukalusi. 13  e Xo no mine lapuloto uxali no lia 'o uao, la susu muxolu tei. Ia lexe lapuloto uxolu uasi, la Lataua umomomo sou uxavutalanu susu vilevilesi noxi'a ta mitema uasi. 14 Ia musoko no anu voxo noxou Adamu mune'e muxali no anu voxo noxou Mosesi ne soli muno'a mo mulai muxali noxi'a ane'i ane i'oxonu susu iouvilesisi loxo Adamu mu'oxonu uasi ne soli muno'a kalumo.

Adamu Musosovosou Itema Vile Ane sou Uxali Ili'i Anu Iesu Kalisito

15 Ia susu noxou Adamu ne iouvilesisi loxo mii lailaixe Lataua mulosinge vitanisi uasi. Susu noxou itema vilesisi la sou mu'oxone'i ta mitema tavu'alo la isoisoli. Ia alauna noxou Lataua ne xavi musuku, la mutaasi'a ta mitema tavu'alo mukalusi. No anu alauna noxou itema vilesisi Iesu Kalisitosi, la Lataua mumoxo'inge lexe nenge ta mitema telapu, la sou anu loxo mii lailaixe Lataua mulosinge vitanisi. 16 Mo anu aloxo ne la, mii lailaixe e Lataua mulosinge vitanisi ne mua'ulixu mii ma'ia ane susu noxou itema vilesisi muxalixu ne. Mo no anu susu noxou itema vilesisi nesi, la Lataua utilovosou 'ilixo noxi'a ta mitema la sou iulua. Ia mii lailaixe e Lataua mu'oxonu noxinge vitanisi ne aloxo 'o, no mine ta mitema mi'oxonu susu tavu'alo ia Lataua mumoxo'a lexe ane'i ta mitema milapu. 17 Xo itema vilesisi mu'oxonu susu, la sou no anu susu noxousi ne la soli muxali musaxila'u maulixa'a ta mitema. Ia alauna noxou Lataua xe mii lailaixe noxou e mulosinge vitanisi ne mua'ulixu soli ne mo xavi musuku. Aloxo ne la sou nenge talavusou manina aloxo 'o, ta mitema e Lataua mualaunasi'a laixe xe mumoxo'a lexe ane'i ta mitema milapu ne ixolu imauli utotomu no anu xaixai noxou itema vilesisi, Iesu Kalisito.

18  f Anu aloxo ne la sou anu muxali aloxo 'o, itema vile mususu mo no anu susu noxousi ne, la sou Lataua utulusi'a ta mitema ukalusi no anu vaivaikala. Mo anu aloxo itema vilesisi mu'oxonu 'ilixo mulapu mo no anu 'ilixo noxousi ne, la sou Lataua umoxo'inge lexe nenge ta mitema telapu mo ulosinge mauli. 19  g Xo anu iouvilesisi aloxo 'o, itema vilesisi ulomuxu Lataua uasi, la sou no anu susu noxousi ne la mu'oxone'i ta mitema tavu'alo mixali ta mitema sou susu. Mo anu kalumo aloxo, itema vilesisi mulomuxu vaikala noxou Lataua la sou no anu 'ilixo noxousi ne, la u'oxone'i ta mitema tavu'alo la ixali ta mitema milapu. 20 La sou no mine ta mitema mino'u lapuloto ia imulinu uasi, la susu muxali mu'oki. Ia no mine susu uxali u'oki la alauna noxou Lataua uxali u'oki manina. 21  h Anu aloxo susu muxolu musaxila'a ta mitema la muxalixu soli xe no anu alauna noxou Lataua, la anu uxolu usaxila'a ta mitema. No anu xaixai noxou Tila noxinge Iesu Kalisito, la sou Lataua mualaunasinge, mo mumoxo'inge lexe nenge ta mitema telapu xe tano'u mauli ane kaluxu uasisi.

Copyright information for `ATA