1 Timothy 2

Maníkómpáꞌá inaimó sen-ááí.

Maarán-ááí simátimiyo séꞌa simámune. Maníkómpáꞌó inaimó sembá óraa-tantaaꞌan-iye. Mindásafesa inaimó sembá Maníkó seyaafáꞌ-wáásí túwaꞌnai ínkwae sésa áísai esa súwi wésewe. Maníkó óraaꞌ-waasiye kenkáꞌó káráwiyaan-kwaasiye túwaꞌnai ínasa inaí síyamba faru úmaisa moóráfinta méta Maníkóntáféta imáyáa éta arupíse úmaisa méranaumne. Miyán-ínáímó sembá Maníkón-aúrankaꞌa kaweꞌ-úmai sewaná póna aamoí éna wemá sáwí-imayaafinkembo faúsínkáiwaisa póna aamoí wéiye. Maníkó seyaafáꞌnánká sáwí-imayaafinkemba faútinkainasa wení éraiꞌ-aaimo isáíyantafena aráái wétaiye. Miyásáfésamo seyaafáꞌ-wáásísáfésamo imáyáa ésamo Maníkómpáꞌó inaimó sembá kaweꞌán-iye. Maníkó mimbóráwígó méraisana Maníkówé wení waásiseti afufumpimbó méraimba mimbóráwígó ména minkwáásígón-áwíꞌa Ísu Káráísiti ména waási Maníkóntéꞌa kááísatinkena seyaafáꞌ-wáásí sáwí-imayaafinkemba faútinkanaumne séna aaraa-táíyáꞌá pukáiye. Maníkó seyaafáꞌ-wáásí kentí sáwí-imayaafinkemba faútinkanaumne séna miyán-kánáá tíníye siyáimba póna Ísu Káráísitimba aiꞌmarówana kumpukáiye. Miyáumai Maníkó simásimena séna aantá-waasi-iꞌa éma fíꞌonkaa-waasi simátímaꞌmae núwo séna siꞌmarówaꞌa wení éraiꞌ-aaisafesa timankúnkúmba íyantafeꞌa simátímaꞌmaeꞌa iyúne. Minááímó súnda ímba karoꞌ-ááí súmpo éraiꞌa súne.

Naaóꞌ-naoken-kwaasi túwaandu ésa Maníkóntáfésa imáyáa ésa ímba aaisambá sésa ímba mósimesi-aai síyamba inaimó síyantafeꞌa miyán-oro súne. Túwaandu ésamo Maníkón-ímáyáámó mósá maráíyamba aaremá maarámó íyantafena sirááíma wétaiye. Ímba túma maimaé iyésa kaweꞌ-úmai unáánkwátói ésa waási súfífáefo sésa ímba toꞌwaaí ésa 10 ímba miyá-sáwíꞌó íyamba kawe-kísáú aantemba maíyasa tuwánánááwe. Aaremó kesáfésamo sésa Maníkóntáféꞌa imáyáa úne sen-ínímbó kawe-kísáúmó máéntemba miyán-oro. 11 Aaré ímba túma maimaé iyésa aáno úmai mésa Maníkón-aaimo sen-kwáásí táái isánááwe. 12 Aaremá ímba waaiyáꞌá káráwiyaawi mésa waai túrankaꞌa ímba komésa aaimó simátimiyamba aáno úmai méranaawe súne. 13 Naaófáꞌá Maníkó Ándámumba aifaꞌá úmarena ánaaemba awaainínkómbá Ífimbo úmakaintafeꞌa minááí súne. 14 Waántáwanko ímba Ándámuntafena siyáifo Ífintafena karoꞌ-ááí simámuwana éraiꞌe séna aifaꞌá Maníkón-aai taráíyaiye. 15 Énifo aaremá iyámpóímo matinkáíyambo éna sáwíꞌa úmai méraampinkemba Maníkó tiyáíníye. Aaremó Maníkómpáꞌó timankúnkúmbo ésamo wen-ímáyáámó ésamo arupíse úmaimo aáno úmaimo maéꞌmaeꞌo úmae iyésamo miyámó íyanamo éna Maníkó sáwíꞌo úmaimo méraampinkemba tiyáíníye.

Copyright information for `AUY