Isaiah 20

1בשנת בא תרתן אשדודה בשלח אתו סרגון מלך אשור וילחם באשדוד וילכדה
2בעת ההיא דבר יהוה ביד ישעיהו בן אמוץ לאמר לך ופתחת השק מעל מתניך ונעלך תחלץ מעל רגלך ויעש כן הלך ערום ויחף  {ס}

3ויאמר יהוה כאשר הלך עבדי ישעיהו ערום ויחף—שלש שנים אות ומופת על מצרים ועל כוש
4כן ינהג מלך אשור את שבי מצרים ואת גלות כוש נערים וזקנים—ערום ויחף וחשופי שת ערות מצרים
5וחתו ובשו—מכוש מבטם ומן מצרים תפארתם
6ואמר ישב האי הזה ביום ההוא הנה כה מבטנו אשר נסנו שם לעזרה להנצל מפני מלך אשור ואיך נמלט אנחנו  {פ}

Copyright information for Alep