Psalms 11

  למנצח לדוד

ביהוה חסיתי—איך תאמרו לנפשי    נודו (נודי) הרכם צפור

  כי הנה הרשעים ידרכון קשת    כוננו חצם על-יתר—

לירות במו-אפל    לישרי-לב

  כי השתות יהרסון—    צדיק מה-פעל

  יהוה בהיכל קדשו—    יהוה בשמים כסאו

עיניו יחזו—    עפעפיו יבחנו בני אדם

  יהוה צדיק יבחן    ורשע ואהב חמס—שנאה נפשו

  ימטר על-רשעים פחים    אש וגפרית ורוח זלעפות—מנת כוסם

  כי-צדיק יהוה צדקות אהב    ישר יחזו פנימו

Copyright information for Alep