Psalms 47

  למנצח לבני-קרח מזמור

  כל-העמים תקעו-כף    הריעו לאלהים בקול רנה

  כי-יהוה עליון נורא    מלך גדול על-כל-הארץ

  ידבר עמים תחתינו    ולאמים תחת רגלינו

  יבחר-לנו את-נחלתנו    את גאון יעקב אשר-אהב סלה

  עלה אלהים בתרועה    יהוה בקול שופר

  זמרו אלהים זמרו    זמרו למלכנו זמרו

  כי מלך כל-הארץ אלהים—    זמרו משכיל

  מלך אלהים על-גוים    אלהים ישב על-כסא קדשו

10   נדיבי עמים נאספו—    עם אלהי אברהם

כי לאלהים מגני-ארץ—    מאד נעלה

Copyright information for Alep