Psalms 109

በጠላት ላይ የቀረበ ጸሎት

ለመዘምራን አለቃ፤ የዳዊት መዝሙር

1የምስጋናዬ ምንጭ የሆንህ አምላክ ሆይ፤ ዝም አትበል፤

2 ክፉዎችና አታላዮች፣
አፋቸውን ከፍተውብኛልና፤
በውሸተኛ አንደበት ተናግረውብኛል።

3 በጥላቻ ቃል ከበውኛል፤
ያለ ምክንያትም ጥቃት አድርሰውብኛል።

4 ስወዳቸው ይወነጅሉኛል፤
እኔ ግን እጸልያለሁ።

5 በበጎ ፈንታ ክፋትን፣
በወደድኋቸው ፈንታ ጥላቻን ይመልሱልኛል።


6 ክፉ ሰው
ወይም ክፉው
በላዩ ሹም፤
ከሳሽም
ወይም ሰይጣንን
በቀኙ ይቁም።

7 ፍርድ ፊት ሲቆም በደለኛ ሆኖ ይገኝ፤
ጸሎቱም ለፍርድ ትሁንበት።

8 ዕድሜው ይጠር፤
ሹመቱንም ሌላ ይውሰደው።

9 ልጆቹ ድኻ አደጎች ይሁኑ፤
ሚስቱም መበለት ትሁን።

10 ልጆቹ ይንከራተቱ፤ ለማኞችም ይሁኑ፤
ከፈረሰው ቤታቸውም ይሰደዱ።

11 ያለውን ሁሉ ዕዳ ጠያቂ ይውረሰው፤
የድካሙንም ዋጋ ባዕዳን ይቀሙት።

12 ማንም ሰው ምሕረት አያድርግለት፤
ለድኻ አደግ ልጆቹም የሚራራ አይኑር።

13 ዘሩ ተለይቶ ይጥፋ፤
ስማቸውም በሚቀጥለው ትውልድ ይደምሰስ።

14 የአባቶቹ በደል  በእግዚአብሔር ፊት ይታሰብ፤
የእናቱም ኀጢአት አይደምሰስ።

15 መታሰቢያቸውን ከምድር ያጠፉ ዘንድ፣
ኀጢአታቸው ሁል ጊዜ  በእግዚአብሔር ፊት ይኑር፤


16 ችግረኛውንና ምስኪኑን፣ ልቡም የቈሰለውን፣
እስከ ሞት አሳደደ እንጂ፣
ምሕረት ያደርግ ዘንድ አላሰበምና።

17 መራገምን ወደደ፤ ወደ እርሱም መጣች፤
በመባረክ ደስ አልተሰኘም፤
በረከትም ከእርሱ ራቀች።

18 መርገምን እንደ ልብስ ለበሳት፤
እርሷም እንደ ውሃ ወደ ውስጥ ሰውነቱ፤
እንደ ዘይትም ወደ ዐጥንቱ ዘለቀች።

19 ገላውን እንደሚሸፍንበት ልብስ፣
ዘወትር እንደሚታጠቀውም መቀነት ትሁነው።

20  እግዚአብሔር ለሚወነጅሉኝ ሰዎች፣
በነፍሴም ላይ ክፉ ለሚናገሩ የሚከፍላቸው ይኸው ይሁን።


21 አንተ ግን ጌታ  እግዚአብሔር ሆይ፤
ስለ ስምህ በበጎ ተመልከተኝ፤
ምሕረትህም መልካም ናትና አድነኝ።

22 እኔ ድኻና ችግረኛ ነኝና፤
ልቤም በውስጤ ቈስሎአልና።

23 እንደ ምሽት ጥላ ከእይታ ተሰውሬአለሁ፤
እንደ አንበጣም ረግፌአለሁ።

24 ከጾም የተነሣ ጒልበቴ ዛለ፤
ሰውነቴም ከስቶ ዐመድ ለበሰ።

25 ለመሣለቂያ ሆንሁላቸው፤
ሲያዩኝም ራሳቸውን ይነቀንቃሉ።


26  እግዚአብሔር አምላኬ ሆይ፤ ርዳኝ፤
እንደ ምሕረትህም አድነኝ።

27  እግዚአብሔር ሆይ፤ እጅህ ይህን እንዳደረገች፣
አንተም ይህን እንደ ፈጸምህ ይወቁ።

28 እነርሱ ይራገማሉ፤ አንተ ግን ትባርካለህ፤
በሚነሡበት ጊዜ ይዋረዳሉ፤
ባሪያህ ግን ሐሤት ያደርጋል።

29 የሚወነጅሉኝ ውርደትን ይከናነቡ፤
ዕፍረትንም እንደ ሸማ ይልበሱ።


30  እግዚአብሔርን በአንደበቴ እጅግ አመሰግናለሁ፤
በታላቅ ሕዝብም መካከል አወድሰዋለሁ።

31 በነፍሱ ላይ ከሚፈርዱት ያድነው ዘንድ፣
እርሱ በችግረኛው ቀኝ በኩል ይቆማልና።
Copyright information for AmhNASV