Acts 8

1E ije bu Sitivini dabe ijiege rekoga e Soru fu ijia giana oemare areme kuae magoeno kuae.

E Soru fu e Godi ma vierafevo ije kame isekafiaema ijene

Areme e boeje bu maza ijia zinuevena uri e Jesu ma vierafevo Jerusareme sosi ijia afuivo ije kame vame ma ise ijia arafiriavo buka isejavae. Ijadufuo e boeje bune dabe giegisana uri sakae Judiakiro Sameria ijia karija vae. Bu ijiege vakoga e Afasero ije bu buosukua Jerusareme ijia kari.
2Areme e Godi ma vierafevo gue bu uri e Sitivini dabe urukeigia niraefirima areme abe mako rui. 3Ro e Soru fuka e Jesu ma vierafevo ije kame arafiriakiro vierafei. Ijadufuo fu oenoekinu gire besubesu ijia ajiana baru ro bara ije umui karana maniaeru kame dibure uniae.

Godido vua maeje bu abe sakae Sameria ijia kuaenoeva ijene

4Areme e Jesu ma vierafevo ije bu dabe giegisa vaeva ije bune are irore ijia oenoekinu Jesu Kuraesido vua ije dabe e boeje kuarianoe. 5Bu ijiege rekoga e Firifi fu va sidove be aesakae Sameria guove ijia kekena Jesudo vua ije dabe ijia kuariae. 6Areme e boeje ijia kariva ije buka e Firifido vua ije mukoe fiekinu vame sumiki fu kemo ije gae. 7E Firifi fu ijiege remoga e ije kavene ise* nirokiaeva ije bu e ije arena usiae vakoga e vajae gareva ijiakina e ae kirariaeva ije bu una madiae. 8Ijadufuo e boeje sidove ijia kariva ije buka una oemarekinu oenoe.

9Ro sidove ijia e be adame isekuma fiema ive fuone Saemoni. E ije fuka vame sumiki binobino renoeko e Sameriako bu gavo buka oeseradiavo. Ijadufuo e Sameriako ije bu vierafero fuje fuka e anuigiro bu ijiege vierafei. Ijadufuo e mamekanu abero e aeko boeje buka vua fuone ije mukoreigia fievo. Bu ijiege rekinu kuaevo, E ijadufuo daro ije fuka Godido daro ijiekino kuae. 11Ro kuke e ije buka vua fuone mukoreigia fievo ijadufuo maeje fuka maza jiagadogo ire sumiki renoeko bu gavo ijadufuo buka oeseradiavo. 12Rove maza ijia bu Firifido vua ije Godi fu izege e fuone ijiebuo oe ije samuagiamo ijiakiro Jesudo vame iviaeko* ije kuariamoga buka fiena ma vierafei. Ijadufuo Firifi fu uri e ije ma vierafeva bara ro baru ije kaenamiana do* ruoriae. 13Fu ijiege rekoga e Saemoni fudua fuka uri Jesu ma vierafemoga e Firifi fu dabe do ruorae. Areme fu una fuobiki finoekinu vame sumiki ije fu kemo ije giamo fuka oeserei.

14E Sameriako bu Jesudo vua ije fiena ma vierafevoga e Afasero ije Jerusareme kariva ije bu vua ije fie. Ijadufuo bune urina Fitakiro Joni kiavoga bu ijia vae. 15Bune va Sameria ijia usiaena uri e ije bu do ruoriaeva ijiebuo baname isoe. Bu ijiege baname isoega bu Godido Kavene abekuae bu ijiege rei. 16Ijadufuo maeje e ije bu Kavene bu naebe abe ro bume Jesudo ive ijia do ijiaru ruoriae. 17Areme Fitakiro Joni bu uri e ije umui nigofo naejiavoga bu Godido Kavene ije abei.

18Ro e Saemoni fu giake e ije Fitakiro Joni bu umui nigofo naejiaeva ije buka Godido Kavene ije abevoga fu giae. Ijadufuo fu uri Fitakiro Joni kiae, Na moni vajiakono ni na daro miega nadua na e umui nigofo naejiaga bu Godido Kavene abeno kiae. 20Fu ijiege kiamoga Fita fu una kuae, A Godido Kavene ije moni ijia fuaevekiro vierafemo ije fuka ma baki. Ro a ijiege rekuma na vierafe a moni one ijiaki jaka are ise miane naeno ijia vake. 21Ijadufuo maeje na gaga oe one fu Godido nidua ijia fuka ma baki ijadufuo abe noena besu imeke. 22Ijadufuo vierafe one ka ise ije a Godido Kavene ije monido fuaevekiro vierafemo ije nika arekiro Godi kuaga fu ise one ije gana arene. 23Ijadufuo maeje na gaga aka daro ige no abeva ijare riezaga a ije abekiro vierafei. Rove aeje fune ise one ijare dabe utifaremano kuae.

24Bu ijiege kuavoga Saemoni fu una kiae, Ja isekie ni noefuo Godi baname isoega vua ije ja kuarieva ije fube none reno kiae. 25Areme Fitakiro Joni bune uri Godido vua maeje abe e Sameria ijia kariva ije kuariae. Ro kuke bu Godi fu izege vame maeje buone rema ijene nijasiama furinoga bune una Jerusareme vae. Bune una vakinu Jesudo vua maeje abena e are isesina Sameria ijia kariva ije kuariajana vae.

Firifi fu e Itiofiako ijiebuo e ireobo ije biema ijene

26Areme Godido anera* be fu arina e Firifi kuae, Ani urina vame ije bu Jerusareme ijia una gafia Gaza vako ijane vano kuae. Ro vame ije fuka isuiko e bu ijia oenoejo baki. 27Ijadufuo Firifi fune urina vakiro vakuma vame ijia e ireobo be aesakae Itiofiako fu bara Kuini Kedesino kuavo ijadufuo moni samuamo ije bie. E ireobo ije fu are Jerusareme ijia Godido baname isoekiro vaema una romo fu bie. Ro e ije fu fata ije bu ose kena maniaeru oejo ijia ajia fina Asaea* e Godido vua vierafena kuaemo ijadufuo vua fu isoema ije dakinu ruome. 29Ro Godido Kavene fu Firifi kuae, Ni fata gare ose fu meru ruvako ije ivuake ijia ura vano kuae. 30Fu ijiege kuamoga Firifi fu difurina ijia vakinu fieke e ije fu Asaeado vua ije damo fu fie. Ijadufuo fu urina e ije kuae, Vua ije a damo ijadufuo maeje abe fiemano kuae.

31Firifi fu ijiege kuaramoga e ije fu kuae, Na vua ije na naebe fie. Ijadufuo na vierafe fuka e bese vua ige abe mukoreigia kuariekuma na fiekono kuae. E ije fune Firifi ijiege kuara areme kuamoga fu fuobiki fata ijia ajiana fikoga ose ije fu mediruna bune vae. 32Ro buki ije e ireobo fu daema ijia Godido vua ao be fu ijiege kuae,

E be fuka mave-sifi* ije bu kaniaga bu kurivo baki ro jau buone ufuga bu jiekevo baki ijiege bu kanakuva fube vua bino kuariakiro fume mauike itibireke.
33Bu fu farena dabe varaememena vua kufui ije kena fu namana dabe koto rei. Ro fune baronema ijadufuo fu e uifari bakino kuae. (Ro vua ije e ireobo fu daema ije fu e Asaeare ijiege kuaemo bu isoeva fu ije dae).
34Ijadufuo e ireobo fu una Firifi kuae, Ro e ije Godido vua vierafena kuaemo ije fu erado ijiege kuae? Fu fuefuo ke fu e befuo kuaemano kuae? 35Areme Firifi fune ijia uri zinuevena vua fu daema ijiakiro Jesudo vua maeje abe kuarae. 36Bu ijiege kuaekinu vame ijane vako ijia bu do be gae. Ijadufuo e ireobo fu uri Firifi kuae, Do be igi ro fube maredo a iviama na abe do ruoriekono kuae. 37Fu ijiege kuamoga Firifi fu una kuae, A oe one boeje a Godi ma vierafekuma na abe do ruorakono kuae. Ijadufuo e ireobo fu una kuae, Ke, ije na ma vierafega Jesu Kuraesi* fu ma Godido Farino kuae.

38Areme e ireobo ije fune e ije ose abe ruovo ije kiavo bu irekoga Firifi fune ari do ijia kekena e ireobo ije abe do* ruorae. 39Areme bune una ajia duome ijia ruovo ijia Godido Kavene ije fune Firifi mesirina vae. Fu vakoga e ireobo ije fu gake Firifi fu baga fu una fata ijia ajia fina Godido oemarekinu fune vae. 40Areme Godido Kavene fune Firifi mesirina una are Ajotasi ijia vae. Fu mesiri ijia vakoga Firifi fu uri are isesina ijia oenoekinu Jesudo vua maeje kuariaeja ruoma are Sesaria ijia kekei.

Copyright information for `BBB