1 John 4

To widabo꞉ alobana ba꞉da꞉bi.

Ne mili, madalilo꞉ dinali sa꞉lan kaluwo꞉ modo꞉ ko꞉lo꞉ henfelo꞉ amio꞉ dalale siliki mano꞉ wida꞉lab. A꞉la꞉go꞉ko꞉lo꞉ kalu nolba꞉yo꞉ gimo꞉wo꞉ mano꞉ widakiyo꞉, “Godeya꞉ Mamayo꞉ ne amio꞉ dowo꞉” a꞉la꞉liki widab a꞉no꞉ tilida꞉da꞉so꞉bo. Ko꞉sega e Godeya꞉ Mamaleya꞉ sa꞉labele a꞉la꞉likiyo꞉, giliyo꞉ alobana ba꞉da꞉bi. To we Godeya꞉ Mamaleya꞉ gab a꞉la꞉do꞉ alobana asuluma꞉no꞉wo꞉ we. Kalu abeyo꞉ “Ya꞉su Keliso E hende kalule mio꞉” a꞉la꞉sa꞉lalega, Godeya꞉ Mamayo꞉ kalu e amio꞉ dowo꞉. Ko꞉sega kalu abeyo꞉ “Ya꞉su E kalulema” a꞉la꞉sa꞉lalega, kalu a꞉namio꞉ Godeya꞉ Mamayo꞉ aundo꞉ma ko꞉lo꞉, e Ya꞉su Keliso o꞉lia꞉yo꞉ gis diakigab. Man a꞉no꞉ fa꞉la꞉doma꞉ib a꞉la꞉likilo꞉ sio꞉wo꞉ gio꞉ tamin amio꞉ da꞉da꞉len ko꞉lo꞉ o꞉go꞉ o꞉ma henfelo꞉ wena fa꞉la꞉dota꞉ga꞉ a꞉lab.

Ni so꞉wa i, gio꞉ Godeya꞉ Eno꞉ dowo꞉ ko꞉lo꞉ giliyo꞉ madalilo꞉ dinali sa꞉lan kalu a꞉no꞉ o꞉lika tininima꞉ib. Mo꞉wo꞉ Gode gi o꞉lia꞉lo꞉ a꞉lab a꞉no꞉ E Halaido꞉ ko꞉lo꞉ Setene henfelo꞉ wilo꞉ a꞉lab a꞉no꞉ Godeya꞉ tinio꞉. Kalu i a꞉no꞉ henfelo꞉ wena a꞉la꞉ta꞉ga꞉ fa꞉la꞉dowo꞉. A꞉la꞉fo꞉ko꞉lo꞉ ililo꞉ man wida꞉lab a꞉no꞉ henfelo꞉ wilo꞉ dimidan mano꞉ o꞉m. Henfelo꞉ kaluka꞉isaleyo꞉ ililo꞉ man widab a꞉no꞉ tilida꞉da꞉lab. Ko꞉sega nio꞉ Godelo꞉wa a꞉la꞉ta꞉ga꞉ mio꞉ ko꞉lo꞉, kalu abeyo꞉ Godelo꞉ alan asulo꞉ i a꞉ma꞉yo꞉, nililo꞉ to widabo꞉ tilida꞉da꞉lab. Kalu abeyo꞉ Godelo꞉wa a꞉la꞉ta꞉ga꞉lo꞉ mo꞉mio꞉ a꞉no꞉ nili to widabo꞉ mo꞉tilida꞉da꞉lab. Nio꞉ a꞉la꞉asulo꞉ ko꞉lo꞉, Godeya꞉ Mamaya꞉ to hendeleyo꞉ a꞉la꞉ta꞉ga꞉ madali tolo꞉ sa꞉lan man a꞉la꞉bo꞉, niliyo꞉ dinafa alobana ba꞉da꞉sa꞉ga꞉ asuluma꞉no꞉.

Ha꞉fo꞉lo꞉ disa꞉lan man a꞉no꞉ mo꞉wo꞉ Gode E.

Ne mili, negelebo꞉ ha꞉fo꞉wo꞉ disa꞉ma꞉niki. A꞉la꞉do꞉ so꞉lo꞉lo꞉ mo꞉wo꞉ we. Ha꞉fo꞉ disa꞉lan man a꞉no꞉ Godelo꞉wa a꞉la꞉ta꞉ga꞉ mio꞉. Kalu nolbo꞉wo꞉ ha꞉fo꞉lo꞉ disa꞉lab a꞉no꞉, kalu i a꞉no꞉ tambo Godeya꞉ Inso꞉ ko꞉lo꞉, iliyo꞉ Godeyo꞉ asulo꞉ ko꞉lo꞉lab. Kalu nol o꞉lia꞉lo꞉ ha꞉fo꞉ disa꞉ma꞉no꞉ man a꞉no꞉ mo꞉wo꞉ Gode E. A꞉la꞉fo꞉ko꞉lo꞉ kalu nol o꞉lia꞉yo꞉ ha꞉fo꞉wo꞉ mo꞉disa꞉lab a꞉no꞉, e Godeyo꞉ mo꞉asulo꞉ ko꞉lo꞉lab. Godeya꞉yo꞉ ni o꞉lia꞉ ha꞉fo꞉wo꞉ disa꞉ a꞉lakilo꞉ nimo꞉lo꞉ wido꞉wo꞉ we. Ya꞉suwa꞉lo꞉ nanog dimido꞉ a꞉namio꞉, nio꞉ mela꞉no꞉wo꞉ eya dima꞉ki, Godeya꞉yo꞉ Ene So꞉wa wa꞉la꞉b imiliseyo꞉ henfelo꞉ wena iliga꞉fo꞉. 10 Hendele ha꞉fo꞉wo꞉ disa꞉ a꞉lakilo꞉ dimidano꞉ we. Godemo꞉wo꞉ nili ha꞉fo꞉ disa꞉ma. Ko꞉sega Godeya꞉yo꞉ nimo꞉wo꞉ mada ha꞉fo꞉ disa꞉lakiyo꞉, Ene So꞉wayo꞉ nili mogago꞉ dila꞉ma꞉ki iliga꞉fo꞉.

11 Ne mili, Gode Eyo꞉ ni o꞉lia꞉ ha꞉fo꞉ disa꞉ ko꞉lo꞉, niliyo꞉lo꞉ negelebo꞉ ha꞉fo꞉wo꞉ a꞉la꞉disa꞉ma꞉niki. 12 Kaluka꞉isale imilig noma꞉yo꞉ Godeyo꞉ misiyo꞉ mo꞉ba꞉ba꞉. Ko꞉sega niliyo꞉ nolbo꞉wo꞉ ha꞉fo꞉ disa꞉lalega, Godeyo꞉ ni o꞉lia꞉yo꞉ ege dowaliki, Gode Elo꞉ ha꞉fo꞉ disa꞉lan man a꞉no꞉ ni usamio꞉ halaido꞉ko꞉ dofo꞉mela꞉ib.

13 Nio꞉ Gode o꞉lia꞉ ege dota꞉ga꞉, Gode E ni o꞉lia꞉ ege dofo꞉lab a꞉la꞉likiyo꞉ nio꞉ asulo꞉ mo꞉wo꞉, Godeya꞉ Ene Mamayo꞉ nimo꞉ dimi. 14 Godeya꞉yo꞉ Ene So꞉wayo꞉ henfelo꞉ kaluka꞉isale Setene elo꞉ amilo꞉ ane a꞉no꞉ a꞉ma꞉la꞉ gasilima꞉ki, iliga꞉fo꞉ ko꞉lo꞉, niliyo꞉ ba꞉da꞉sa꞉ga꞉, nolbo꞉wo꞉ kalaba wida꞉len. 15 Kalu abeyo꞉ Ya꞉su E, hendele Godeya꞉ So꞉wa a꞉la꞉do꞉ kalab amilo꞉ sa꞉lab a꞉no꞉, Godeyo꞉ e o꞉lia꞉ ege dowab a꞉la꞉ta꞉ga꞉, kalu a꞉no꞉ Godeya ege dowab. 16 Godeya꞉yo꞉ nimo꞉wo꞉ ha꞉fo꞉ disa꞉ a꞉la꞉bo꞉, nio꞉ hendele asula꞉sa꞉ga꞉, tilidabu.

Kalu nol o꞉lia꞉lo꞉ ha꞉fo꞉ disa꞉ma꞉no꞉ man a꞉no꞉ mo꞉wo꞉ Gode E. A꞉la꞉fo꞉ko꞉lo꞉ kalu abeyo꞉ nolbo꞉wo꞉ ha꞉fo꞉ disa꞉lab a꞉no꞉, kalu a꞉no꞉ Godeya ege dowab ko꞉lo꞉, Gode elo꞉ kalu a꞉namio꞉ ege dowab.
17 Nio꞉ a꞉la꞉dimida꞉sa꞉ga꞉ ta꞉fo꞉lab a꞉namio꞉, Gode Elo꞉ ha꞉fo꞉ disa꞉lan man a꞉no꞉ ni amio꞉ halaido꞉ko꞉ dofo꞉lab. Nio꞉ hen wena o꞉silikiyo꞉, nio꞉ Ya꞉su eyo꞉ o꞉ngo꞉ dofo꞉lo꞉l. A꞉la꞉fo꞉ko꞉lo꞉ Godeya꞉lo꞉ kaluka꞉isalelo꞉ mo꞉walilima꞉no꞉ ho꞉len fa꞉la꞉doma꞉nigab a꞉no꞉, nio꞉ mo꞉tagilab. 18 Godeya꞉lo꞉ ha꞉fo꞉wo꞉ disa꞉lab kalu a꞉no꞉, e mo꞉tagilan. Mo꞉wo꞉ Gode Elo꞉ ha꞉fo꞉ disa꞉lan man a꞉no꞉ e amio꞉ halaido꞉ dofo꞉lab a꞉ma꞉yo꞉, tagilan e amilo꞉ delen a꞉no꞉ dila꞉. Kalulo꞉ tagilab a꞉ma꞉ ha꞉go꞉ we. Kaluwa꞉ mogago꞉ dimidab amilo꞉ wa꞉l mia꞉ib a꞉no꞉ asulaki tagilab. Kalu abeyo꞉ e amio꞉ tagio꞉ dowab a꞉no꞉, Gode Elo꞉ ha꞉fo꞉ disa꞉lan man a꞉no꞉ e amio꞉ halaido꞉wo꞉ mo꞉dofo꞉likigab. 19 Godeya꞉yo꞉ nimo꞉wo꞉ ha꞉fo꞉wo꞉ tamina disa꞉ ko꞉lo꞉ niliyo꞉ ha꞉fo꞉wo꞉ disa꞉la꞉mela꞉no꞉. 20 Kalu abeyo꞉ ao nol e o꞉lia꞉lo꞉ sab a꞉no꞉ ba꞉da꞉likiyo꞉, ha꞉fo꞉wo꞉ mo꞉disa꞉lalega, Gode miseyo꞉ mo꞉ba꞉dan o꞉mo꞉wo꞉, ha꞉fo꞉wo꞉ mada hendele mo꞉disa꞉ma꞉ib. A꞉la꞉fo꞉ko꞉lo꞉ kalu a꞉ma꞉ sa꞉laki, “Ne Godemo꞉wo꞉ ha꞉fo꞉ disa꞉” a꞉la꞉sa꞉laki ko꞉sega, ene ao nowo꞉mbo꞉wo꞉ kele asula꞉sa꞉ga꞉ mobea꞉lalega, e madali dikili sa꞉la꞉lab. 21 Gode Elo꞉ nimo꞉lo꞉ to saefa꞉yo꞉ we. Kalu abeyo꞉ Godemo꞉lo꞉ ha꞉fo꞉lo꞉ disa꞉lab a꞉ma꞉yo꞉, ene ao nolbo꞉wo꞉lo꞉ ha꞉fo꞉wo꞉ a꞉la꞉ disa꞉la꞉bi!

Copyright information for `BCO