Acts 16

Timotiyo꞉ Fol dia꞉ Sailas dia꞉yo꞉ gasalia꞉sa꞉ga꞉ ane.

A꞉la꞉yo꞉ ha꞉na꞉sa꞉ga꞉, Debe fa꞉la꞉dota꞉ga꞉, Lista fa꞉la꞉dowakiyo꞉, tilidabu so꞉wa nowo꞉ a꞉na galili. Ene wiyo꞉ Timoti a꞉la꞉ta꞉ga꞉ ene anowo꞉ Yu ka꞉isale Ya꞉su amilo꞉ tilidabuwo꞉ e, ko꞉sega ene iyayo꞉ Gilig kalu. Keliso kaluka꞉isale, Lista a꞉la꞉ta꞉ga꞉ Aikonium amisa꞉n amilo꞉ sen a꞉ma꞉yo꞉ man elo꞉wo꞉ nafa ba꞉ba꞉ ko꞉lo꞉ e digalo꞉ so꞉wa a꞉la꞉sa꞉la꞉sen. Fol eyo꞉ Timotiyo꞉ e tililia꞉ sia꞉mela꞉no꞉ asulo꞉ ko꞉lo꞉ ene do꞉go꞉fo꞉ hege gede alifa꞉. Mo꞉wo꞉ Yu kaluka꞉isale amisa꞉n a꞉namilo꞉ sen a꞉ma꞉yo꞉ Timotiya꞉ iyayo꞉ Gilig kalu a꞉la꞉asulo꞉.
ha꞉go꞉ we, Timotiya꞉ iyayo꞉ Gilig kalu ko꞉lo꞉ Timotiyo꞉ sa꞉la꞉liakiyo꞉, do꞉go꞉fo꞉ mo꞉hege gedeo꞉. A꞉la꞉go꞉ko꞉lo꞉ elo꞉ to man walama꞉no꞉ a꞉no꞉, Yu kaluka꞉isaleya꞉yo꞉ mo꞉tilida꞉ba꞉ib. A꞉la꞉fo꞉ko꞉lo꞉ Fol eyo꞉ Timotiya꞉ do꞉go꞉fo꞉ a꞉na hege gede alifa꞉.
Iyo꞉ amisa꞉n ko꞉li ko꞉lilo꞉wa wida꞉li siakiyo꞉, iliga꞉felo꞉ kalu ililo꞉ Ya꞉lusalem a꞉na nenela꞉la꞉ga꞉lo꞉ saefa꞉ a꞉no꞉ tilidabu kaluka꞉isaleya꞉yo꞉ kudu hamana꞉ki, wida꞉li ane. A꞉la꞉fo꞉ko꞉lo꞉ sa꞉s a꞉namio꞉, kaluka꞉isaleya꞉ tilidabuwo꞉ halaido꞉ fa꞉la꞉dowo꞉ a꞉la꞉ta꞉ga꞉, kaluka꞉isale nolo꞉lo꞉ asugo꞉ nodolaki, modo꞉ fa꞉la꞉dowo꞉.

Fol eyo꞉ Masedonia kalu ofolaki ba꞉ba꞉.

Godeya꞉ Mamaya꞉yo꞉ Fol o꞉lia꞉ e o꞉lia꞉lo꞉ sia꞉sen kalu iyo꞉ Esia hen amio꞉ mano꞉ walama꞉no꞉wo꞉ ka꞉laki go꞉. A꞉la꞉fo꞉ko꞉lo꞉ iyo꞉ ha꞉na꞉siakiyo꞉, Filigia hen o꞉lia꞉ Galesia hen us a꞉namio꞉ tigini ane. Iyo꞉ Misia hen eleya fa꞉la꞉dowakiyo꞉, Bitinia hen amio꞉ ha꞉na꞉no꞉ asulo꞉ ko꞉sega Ya꞉suwa꞉ Mamaya꞉yo꞉ a꞉namilo꞉ ha꞉na꞉no꞉wo꞉ ko꞉lo꞉. A꞉la꞉fo꞉ko꞉lo꞉ iyo꞉ Misia hen a꞉no꞉ da꞉la꞉li ha꞉na꞉sa꞉ga꞉, Toloas amisa꞉na tiane. A꞉na silikiyo꞉, nulu amio꞉ Fol eyo꞉ ho꞉le ba꞉dakiyo꞉, Masedonia kalu nowo꞉ ene hena kagafo꞉liki, Fol e mena꞉ki a꞉la꞉sio꞉, “Ge Masedonia ya꞉sa꞉ga꞉, nio꞉ asuwa꞉fa꞉ni mena” a꞉la꞉liki susiabiki ba꞉ba꞉. 10 Fol elo꞉ ho꞉le ba꞉dab a꞉no꞉ nimo꞉wo꞉ sa꞉labikiyo꞉
16.10Bugo꞉ we Lug e sa꞉sa꞉lo꞉ ko꞉lo꞉ e ‘nimo꞉wo꞉’ a꞉la꞉sa꞉sa꞉lakiyo꞉, elo꞉ us a꞉na tiane.
, Godeya꞉ mano꞉ nio꞉ a꞉na walama꞉ki sa꞉lab a꞉la꞉ asulakiyo꞉, nio꞉ Masedonia ha꞉na꞉niki, wigibo a꞉naka dimadali.

Lidia e Alana tilidabu.

11 Nio꞉ dimidalia꞉sa꞉ga꞉, ho꞉n ko꞉suwo꞉ Toloas a꞉na disa꞉la꞉sa꞉ga꞉, ho꞉na꞉lo꞉ hegefa꞉ hen Samotilas a꞉na fofa꞉sa꞉ dia꞉sa꞉ga꞉ onolo ha꞉nakiyo꞉, ho꞉len imilig nowo꞉ ta꞉ta꞉ga꞉, Neabolis a꞉na fa꞉la꞉dowo꞉. 12 Nio꞉ a꞉na fa꞉la꞉dota꞉ga꞉, hena ha꞉na꞉la꞉ga꞉, Filibai a꞉na fa꞉la꞉dowo꞉. Filibai a꞉no꞉ Masedonia hen amilo꞉ amisa꞉n alano꞉ e. Tamin amio꞉ Lom kaluwa꞉ amisa꞉n a꞉no꞉ bo꞉fo꞉len. Nio꞉ ho꞉len nowo꞉ a꞉na sen. 13 Ha꞉fo꞉lo꞉ Dowan ho꞉leno꞉ fa꞉la꞉dowabiki, nio꞉ Yu kaluwa꞉lo꞉ dulugu sa꞉la꞉sen hen a꞉no꞉ keda꞉i ha꞉nakiyo꞉, amisa꞉no꞉ ta꞉ta꞉ga꞉, ho꞉na꞉ aniba ka꞉isale nolo꞉ a꞉namilo꞉ kegenefo꞉len a꞉no꞉lia꞉ siliki, towo꞉ imo꞉wo꞉ wido꞉. 14 To nililo꞉ widabdo꞉ da꞉da꞉len ka꞉isale nowo꞉ wiyo꞉ Lidia. Ka꞉isale we Taiataila amisa꞉n ga ko꞉lo꞉ helebeso꞉g ho꞉mo꞉solo꞉ nafalelo꞉ kililia꞉seno꞉ o꞉m ko꞉lo꞉ e Godeya꞉ wilo꞉ wabulu sa꞉la꞉seno꞉ e. Alana꞉yo꞉ ga a꞉ma꞉ asugo꞉ kolaitabikiyo꞉, Fol elo꞉ to widab a꞉no꞉ tilidabu. 15 A꞉la꞉fo꞉ko꞉lo꞉ ga a꞉no꞉ a꞉la꞉ta꞉ga꞉ kaluka꞉isale ene a a꞉namilo꞉ sen a꞉no꞉lia꞉yo꞉, tambo ho꞉na to꞉lolo꞉ ko꞉lo꞉ Lidia eyo꞉ nio꞉ e aya mena꞉ki susiakiyo꞉, “Gio꞉ ne hendele Alan amio꞉ tilida꞉dab a꞉la꞉asulalega, ni aya mesa꞉ mena,” a꞉la꞉sa꞉labikiyo꞉, nio꞉ e o꞉lia꞉ ane.

Fol o꞉lia꞉ Sailas o꞉lia꞉yo꞉ dibolo aya to꞉lolo꞉.

16 Ho꞉len no amio꞉, nio꞉ tolo꞉ dulugu sa꞉la꞉sen hena ha꞉na꞉no꞉ ha꞉na꞉len amio꞉, madalilo꞉ nanog dian ga nowo꞉ toga gido꞉. Ga e amio꞉ mama mogago꞉wo꞉ dofo꞉liki, tif amilo꞉ dimidama꞉nigabo꞉ e ho꞉le ba꞉da꞉sa꞉ga꞉, dinali sa꞉la꞉sen. A꞉la꞉fo꞉ko꞉lo꞉, ga o꞉lo꞉ biso꞉wa꞉yo꞉ moleyo꞉ modo꞉ ko꞉lo꞉ dia꞉sen. 17 Ga we Foldo꞉ ni kudu ya꞉ga꞉ yakiyo꞉, towo꞉ halale sa꞉laki, “Kalu i we, Gode Iwalulo꞉ a꞉laba꞉ Ene nanog dian kalu wema꞉yo꞉, gilo꞉ a꞉ma꞉la꞉do꞉ gasilia꞉b man a꞉no꞉ ko꞉lo꞉ wida꞉i yab” a꞉la꞉sio꞉. 18 Ga a꞉ma꞉yo꞉ ho꞉len modo꞉ amio꞉ a꞉la꞉sa꞉la꞉li ya꞉len ko꞉lo꞉, Fol e mo꞉bea꞉sa꞉ga꞉, nodolakiyo꞉ mama mogago꞉mo꞉wo꞉ towo꞉ a꞉la꞉sio꞉, “Niyo꞉ Ya꞉su Kelisowa꞉ wi halaido꞉ a꞉na ilikiyo꞉, ge ga we ta꞉fo꞉ hamana!” A꞉la꞉sa꞉labikiyo꞉, wigibo a꞉naka mama mogago꞉ e amilo꞉ elen a꞉no꞉ ta꞉fo꞉gane.

19 Madali nanogdo꞉ dian ga o꞉lo꞉ biso꞉ a꞉ma꞉yo꞉ wa꞉kabiyo꞉ iliyo꞉ moleyo꞉ mo꞉dia꞉nigo꞉bo꞉lo꞉b a꞉la꞉asulaki, iliyo꞉ Fol dia꞉ Sailas dia꞉yo꞉ ta꞉lia꞉sa꞉ga꞉, amisa꞉n kalulo꞉ kegea꞉sen a꞉na susululia꞉ga꞉, Loma꞉ mo꞉walilabdo꞉ da꞉dan kalulo꞉wa ta꞉takiyo꞉ a꞉la꞉sio꞉, “Kalu a꞉la꞉ we Yu kalu ko꞉lo꞉ nili amisa꞉n wenamio꞉ mogago꞉ dimida꞉lab. 21 Lom kaluka꞉isale nililo꞉ man mo꞉dimidama꞉no꞉ a꞉la꞉likilo꞉ saefa꞉ a꞉no꞉, kalu a꞉la꞉ wema꞉yo꞉ man a꞉no꞉ kudu hamana꞉ki wida꞉lab.” 22 A꞉la꞉sa꞉labiki, kaluka꞉isale kegeo꞉ i a꞉ma꞉yo꞉ elo꞉ sa꞉lab a꞉no꞉ hendele a꞉la꞉asulakiyo꞉, iyo꞉ a꞉no꞉lo꞉ egele dowaki, a꞉la꞉mo꞉wo꞉ gadio꞉ dowo꞉. Loma꞉ mo꞉walilabdo꞉ da꞉dan kaluwa꞉yo꞉ a꞉la꞉ma꞉ so꞉go꞉ kalu nolba꞉ bidila꞉sa꞉ga꞉, bi buluwa꞉ sanama a꞉la꞉sio꞉. 23 Iliyo꞉ a꞉la꞉yo꞉ moma꞉ni sa꞉nda꞉sa꞉ga꞉, dibolo aya to꞉lolo꞉ ko꞉lo꞉, dibolo alo꞉ bo꞉fo꞉lowan kalumo꞉wo꞉ a꞉la꞉yo꞉ dinafa bo꞉fo꞉melea꞉ki salifa꞉. 24 Bo꞉fo꞉lowan kaluwa꞉yo꞉ to a꞉no꞉ da꞉da꞉sa꞉ga꞉, a꞉la꞉yo꞉ dibolo a usamilo꞉ halaido꞉ galaleya to꞉lo alita꞉ga꞉, a꞉la꞉ma꞉ gibo꞉ i ko꞉no꞉ a꞉la꞉ya꞉ diga꞉da꞉sa꞉ga꞉ uludu alifa꞉. 25 Nulu us amio꞉, Fol dia꞉ Sailas dia꞉yo꞉ Godemo꞉ dulugu sa꞉la꞉liki, gisalo꞉wo꞉ mola꞉labiki, dibolo kalu nolo꞉ da꞉da꞉li sen. 26 Wigibo a꞉naka hiniyo꞉ alan silaki, dibolo ayo꞉ ida꞉lakiyo꞉, togo꞉ tambo kolai a꞉taki, dibolo kalu seniya꞉lo꞉ dila꞉ a꞉no꞉ ene asulo꞉ a꞉dufufudo꞉. 27 Bo꞉fo꞉lowan kaluwo꞉ si kagayaki ba꞉ba꞉ amio꞉, dibolo ayo꞉ togo꞉ kolalifelo꞉wa ba꞉da꞉ga꞉, eyo꞉ dibolo kalu tambo dalaido꞉wele a꞉la꞉asulakiyo꞉ e helebesiyo꞉ dia꞉sa꞉ga꞉, enena꞉ma꞉la꞉ sana soma꞉nigabiki, Fol eyo꞉ towo꞉ halale sa꞉lakiyo꞉, “Nio꞉ tambo o꞉so꞉l ko꞉lo꞉, ge go꞉no꞉n a꞉ma꞉la꞉yo꞉ mogagila꞉so꞉bo!” 29 Dibolo alo꞉ bo꞉fo꞉lowan kaluwa꞉yo꞉ deyo꞉ dolia꞉ mena꞉ki ho꞉ida꞉sa꞉ga꞉yo꞉, e bo꞉i ha꞉na꞉sa꞉ga꞉ Fol dia꞉ Sailas dia꞉lo꞉wa bibisoda꞉liki tulu ali. 30 Eyo꞉ a꞉la꞉yo꞉ ha꞉la꞉ya tilili handalowakiyo꞉, a꞉la꞉mo꞉wo꞉ a꞉la꞉ dabuba꞉ba꞉, “Godeya꞉yo꞉ ne gasilima꞉kiyo꞉, waga dimidama꞉no꞉wele?” 31 A꞉la꞉ma꞉ a꞉la꞉sio꞉, “Ge o꞉lia꞉ gi ayamilo꞉ sa꞉sen a꞉no꞉lia꞉yo꞉ Ya꞉su Alana tilida꞉dalikiyo꞉, Godeya꞉yo꞉ gio꞉ a꞉ma꞉la꞉ gasilima꞉ib” a꞉la꞉sio꞉. 32 A꞉la꞉fo꞉ko꞉lo꞉ Fol dia꞉ Sailas dia꞉ma꞉yo꞉ Ya꞉su Alana꞉ mano꞉ e o꞉lia꞉, e ayamilo꞉ sa꞉sen tambo o꞉lia꞉mo꞉wo꞉ wido꞉. 33 Nulu us a꞉naka, bo꞉fo꞉lowan kalu eyo꞉ a꞉la꞉yo꞉ tililia꞉sa꞉ga꞉, a꞉la꞉ma꞉ do꞉mo꞉ amilo꞉ gegede alifelo꞉ a꞉no꞉ ho꞉na꞉ to꞉go꞉de alifelabiki, o꞉g a꞉naka e o꞉lia꞉ e ayamilo꞉ sa꞉sen o꞉lia꞉yo꞉ ho꞉na to꞉lofelo꞉. 34 A꞉la꞉ta꞉ga꞉yo꞉ dibolo alo꞉ bo꞉fo꞉lowan kaluwa꞉yo꞉ a꞉la꞉yo꞉ e aya tililia꞉ ha꞉na꞉sa꞉ga꞉, ma꞉no꞉wo꞉ maya꞉ki so꞉da꞉sa꞉ga꞉ dime. E o꞉lia꞉ e ayamilo꞉ sa꞉sen tambo o꞉lia꞉yo꞉ Godeyo꞉ tilidabu ko꞉lo꞉ iyo꞉ sagalo꞉wo꞉ mada alan dowo꞉.

35 Kea꞉fo ho꞉le bidabiki, Loma꞉ mo꞉walilabdo꞉ da꞉dan kalu iliyo꞉ dibololo꞉ bo꞉fo꞉len o꞉mo꞉wo꞉ to saga꞉takiyo꞉, “Kalu a꞉la꞉ko꞉ sili alifoma” a꞉la꞉liki, da꞉la꞉di kalumo꞉ saga꞉fo꞉. 36 A꞉la꞉fo꞉ko꞉lo꞉ dibolo alo꞉ bo꞉fo꞉lowan kaluwa꞉yo꞉ Fo꞉lbo꞉wo꞉ towo꞉ saga꞉takiyo꞉ a꞉la꞉sio꞉, “Ga꞉go꞉ sili alita꞉bika꞉ a꞉la꞉li saga꞉fo꞉ ko꞉lo꞉ ga꞉go꞉ sagala꞉liki hamana.” 37 Ko꞉sega Fola꞉yo꞉ a꞉ma꞉la꞉bo꞉ a꞉la꞉sio꞉, “Na꞉no꞉ Lom kalu ko꞉sega iliyo꞉ mo꞉mo꞉walilaki, na꞉no꞉ kaluka꞉isale siwa꞉la yame tanda꞉ya꞉sa꞉ga꞉, dibolowa to꞉lolo꞉ ko꞉lo꞉ o꞉go꞉ na꞉no꞉ iliyo꞉ wo꞉no꞉le sili alifa꞉no꞉ asulab ko꞉sega na꞉no꞉ a꞉la꞉bo꞉ mo꞉dimidama꞉no꞉. Inino꞉ ya꞉sa꞉ga꞉, na꞉no꞉ ha꞉sa tililia꞉ga꞉ ha꞉la꞉ ta꞉talega, na꞉no꞉ a꞉na ha꞉na꞉no꞉.”

38 Da꞉la꞉di kaluwa꞉yo꞉ ha꞉na꞉sa꞉ga꞉, Fol elo꞉ to sa꞉lab a꞉no꞉ Loma꞉ mo꞉walilabdo꞉ da꞉dan kalu imo꞉wo꞉ sa꞉labikiyo꞉, a꞉la꞉yo꞉ Lom kaluka꞉ a꞉la꞉do꞉ sio꞉ a꞉no꞉ iyo꞉ da꞉da꞉sa꞉ga꞉, tagi dowo꞉. 39 Iyo꞉ dibolo aya ha꞉na꞉sa꞉ga꞉, hala dimido꞉ a꞉no꞉ foga꞉le sa꞉la꞉sa꞉ga꞉, a꞉la꞉yo꞉ ha꞉la꞉ya tililia꞉ ha꞉na꞉ga꞉, ili amisa꞉no꞉ ta꞉ta꞉ga꞉ hamana꞉ki, towo꞉ halaido꞉ sio꞉. 40 A꞉la꞉go꞉ko꞉lo꞉, a꞉la꞉yo꞉ ha꞉na꞉nikiyo꞉, Lidia ene aya ha꞉na꞉sa꞉ga꞉yo꞉, Keliso kaluka꞉isale nolo꞉ a꞉na galilia꞉sa꞉ga꞉yo꞉, ili asulo꞉wo꞉ halale alitakiyo꞉, towo꞉ salita꞉ga꞉, a꞉la꞉yo꞉ a꞉na ane.

Copyright information for `BCO