Acts 23

Fol eyo꞉ Kanisol kalu a꞉no꞉ko꞉ si kudu ba꞉da꞉ga꞉yo꞉, a꞉la꞉sio꞉, “Ni nao, ne Godeya꞉ nanog dimida꞉ilo꞉ mio꞉ a꞉namio꞉ mela꞉no꞉ nilo꞉ we, Godeya꞉ siwa꞉l amio꞉ no꞉no꞉no꞉ digalo꞉le dimida꞉i mio꞉ a꞉la꞉asulo꞉l.” A꞉la꞉sa꞉labiki, Bobalo꞉ so꞉mia꞉sen misa꞉ kalu, Ananaias eyo꞉ Fol e anib amilo꞉ kagafo꞉lab o꞉mo꞉wo꞉ Fola꞉ mego꞉fa bolema a꞉la꞉liki sio꞉. A꞉la꞉sa꞉labiki Fol eyo꞉ a꞉la꞉sio꞉, “Ge a o꞉fo꞉f amilo꞉ ho꞉lo꞉ nafa mulu o꞉leo꞉ngo꞉ dowo꞉
23.2-3Fol eyo꞉ to sio꞉ a꞉no꞉, e ko꞉lo꞉ dio꞉ge sio꞉. To a꞉ma꞉ ha꞉go꞉ nio꞉ mo꞉dinafa asulo꞉, ko꞉sega nolba꞉yo꞉ to a꞉ma꞉ ha꞉go꞉ a꞉la꞉asulab. Kaluwa꞉ do꞉mo꞉ ba꞉ba꞉ a꞉no꞉ nafa ko꞉sega asulo꞉ usamilo꞉ da꞉labo꞉ mogago꞉ delen. A꞉no꞉ ko꞉lo꞉ sa꞉lab.
ko꞉lo꞉ Godeya꞉yo꞉ gelo꞉ bolelema꞉ib. Gio꞉ Mosesa꞉ ele difa꞉ a꞉na ilikiyo꞉ ne mo꞉walilima꞉niki sab ko꞉sega, giyo꞉ ne bolema a꞉la꞉do꞉ sa꞉lab a꞉ma꞉yo꞉ ele saefa꞉ a꞉no꞉ o꞉go꞉sab.”
Fol eyo꞉ a꞉la꞉sa꞉labiki, e anib amio꞉lo꞉ kalu kagafo꞉len a꞉ma꞉yo꞉ a꞉la꞉sio꞉, “Ge Godeya꞉ Bobalo꞉ so꞉mia꞉sen misa꞉ kalu ko꞉mo꞉wo꞉ giyo꞉ mogagi mada sa꞉laka꞉!” A꞉la꞉sa꞉labiki, Fol eyo꞉ a꞉ma꞉la꞉ a꞉la꞉sio꞉, “Nao i ha꞉iyo꞉. E Bobalo꞉ so꞉mia꞉sen misa꞉ kalulo꞉b a꞉la꞉bo꞉ ne mo꞉fanda asulo꞉ ko꞉lo꞉ ne a꞉la꞉bo꞉ asulo꞉ kibo꞉bowo꞉, niyo꞉ to a꞉no꞉ mo꞉so꞉mo꞉lo꞉. Mo꞉wo꞉ Godeya꞉ to sa꞉sa꞉lo꞉ amio꞉ a꞉la꞉sio꞉, ‘Gili misa꞉ kalu bo꞉fo꞉lab mo꞉wo꞉ mogago꞉ towo꞉ sa꞉la꞉so꞉bo.’” Fol e kanisol kalu kegeo꞉ amio꞉, kalu nolo꞉ Fa꞉lisi a꞉la꞉ta꞉ga꞉ kalu nolo꞉ Sadusi kalu ko꞉lo꞉ elena ba꞉da꞉ga꞉yo꞉, eyo꞉ imo꞉wo꞉ towo꞉ halale a꞉la꞉sio꞉, “Ni nao i, ne Fa꞉lisi kalu a꞉la꞉ta꞉ga꞉ dowo꞉lo꞉ Fa꞉lisi kalu. Niyo꞉ Godeya꞉lo꞉ sowo꞉ kalu ko꞉lo꞉ a꞉ma꞉la꞉do꞉ a꞉dasi alifa꞉ib a꞉no꞉ hendele dimidama꞉ib a꞉la꞉liki tilidabu ko꞉lo꞉ ne o꞉go꞉ a꞉na mo꞉walilab.” Fol eyo꞉ to a꞉no꞉ sa꞉labikiyo꞉, Fa꞉lisi kalu o꞉lia꞉ Sadusi kalu o꞉lia꞉ towo꞉ egele kegakiyo꞉, kanisol iyo꞉ asulo꞉ a꞉la꞉ dowo꞉. Mo꞉wo꞉ Sadusi iliyo꞉ sowo꞉wo꞉ a꞉ma꞉la꞉yo꞉ mo꞉dasima꞉ib a꞉la꞉tiliasulaki, ma꞉mula꞉ kalu o꞉lia꞉ mama o꞉lia꞉yo꞉ aundo꞉mo꞉ a꞉lab a꞉la꞉ tiliasulo꞉. Ko꞉sega Fa꞉lisi kalu iliyo꞉ a꞉no꞉ ko꞉lo꞉ tambo tili asulab. A꞉no꞉ ko꞉lo꞉ tiliasulakiyo꞉, towo꞉ halaido꞉ halale tandea꞉sa꞉ga꞉yo꞉, elelo꞉ asulo꞉ kalu nolo꞉, Fa꞉lisi ko꞉lo꞉ iyo꞉ dasila꞉sa꞉ga꞉ towo꞉ halaido꞉ kegaki a꞉la꞉sio꞉, “Kalu wenamio꞉ hala dimido꞉ nowo꞉ aundo꞉ma ba꞉ba꞉. A꞉la꞉ta꞉ga꞉ mamayele, ma꞉mula꞉ kaluwele, emo꞉wo꞉ sio꞉wele nio꞉ mo꞉dinafa asulo꞉ ko꞉lo꞉ niliyo꞉ e mo꞉walila꞉so꞉bo” a꞉la꞉sio꞉. 10 To kegakiyo꞉ bubo꞉ a꞉no꞉ mada alan fa꞉la꞉dowabikiyo꞉, da꞉la꞉di misa꞉ kalu e iyo꞉ Folo꞉ ta꞉li siliki susulutandakiyo꞉ gedema꞉ib a꞉la꞉asulaki, ene da꞉la꞉di kaluwo꞉ ho꞉ida꞉sa꞉ga꞉, Folo꞉ gasilia꞉ga꞉, ilo꞉ sa꞉sen aya tililia꞉ hamana꞉ki sio꞉.

11 O꞉g nulu a꞉namio꞉, Alan e ya꞉sa꞉ga꞉, Fola꞉ aniba kagayaki, emo꞉ a꞉la꞉sio꞉, “Gilo꞉ asulo꞉wo꞉ halaido꞉ dowa꞉bi. Giyo꞉ Ya꞉lusalem kaluka꞉isalemo꞉wo꞉ ne wi ko꞉lo꞉ wido꞉ o꞉li aumbo꞉, Lom a꞉namio꞉lo꞉ a꞉la꞉ka wida꞉bi” a꞉la꞉sio꞉.

Yu kaluwa꞉ Folo꞉ sanala꞉ma꞉no꞉ a꞉la꞉li saefa꞉.

12 Kea꞉fowo꞉, Yu kalu iyo꞉ nenela꞉sa꞉ga꞉yo꞉, Folo꞉ sana soma꞉no꞉ a꞉la꞉saefa꞉ ko꞉lo꞉ Folo꞉ semo꞉sana sowo꞉ amio꞉, iliyo꞉ ma꞉no꞉ o꞉lia꞉ ho꞉n o꞉lia꞉yo꞉ mada semo꞉naki elefo꞉ difa꞉ ko꞉lo꞉, Folo꞉ sana sowa꞉sa꞉ga꞉ ami ma꞉no꞉wo꞉ a꞉na ma꞉no꞉ a꞉la꞉ tili saefa꞉. 13 Tolo꞉ saefa꞉ kalu agelo꞉wo꞉ do꞉la꞉fo꞉ fa꞉la꞉da꞉in a꞉no꞉ tinio꞉ a꞉ma꞉ saefa꞉. 14 Iyo꞉ ha꞉na꞉sa꞉ga꞉, bobalo꞉ so꞉mia꞉sen kalu i o꞉lia꞉ Yu ko꞉go꞉do꞉ kalu o꞉lia꞉mo꞉wo꞉ a꞉la꞉sio꞉, “Nio꞉ Folo꞉ semo꞉sanaifa꞉ amio꞉, ho꞉n o꞉lia꞉ ma꞉n o꞉lia꞉yo꞉ elefo꞉ dia꞉to꞉l ko꞉lo꞉ semo꞉ma꞉no꞉ a꞉la꞉liki tili salia꞉ difa꞉. 15 A꞉la꞉fo꞉ko꞉lo꞉ gi o꞉lia꞉ kanisol kalu gio꞉ ha꞉na꞉sa꞉ga꞉, da꞉la꞉di misa꞉ kalumo꞉wo꞉ dikili sa꞉lakiyo꞉, Folbo꞉lo꞉ mo꞉walilo꞉ a꞉no꞉ wa꞉ka a꞉fanda da꞉ba꞉no꞉ ko꞉lo꞉ tililia꞉ mena꞉ki, gio꞉ sa꞉ma꞉ni hamana. Da꞉la꞉di iliyo꞉ Fol e tililia꞉ yalikiyo꞉, gilo꞉ amio꞉ o꞉fa꞉la꞉doma꞉ni yaliki, niliyo꞉ e usa sa꞉mba꞉no꞉. Nio꞉ a꞉la꞉dimidama꞉no꞉ ko꞉lo꞉ gio꞉ to a꞉no꞉ sa꞉ma꞉ni hamana.”

16 To nenelakiyo꞉ saitab a꞉no꞉, Fola꞉ e babo a꞉ma꞉ da꞉da꞉la꞉ga꞉yo꞉, e da꞉la꞉dilo꞉ sa꞉sen aya ha꞉na꞉ga꞉, Folbo꞉wo꞉ to a꞉no꞉ malolo꞉ me. 17 Fol e to a꞉no꞉ da꞉da꞉ga꞉yo꞉, da꞉la꞉dilo꞉ bo꞉fo꞉lowan kalu nowo꞉ ho꞉lelia꞉sa꞉ga꞉, emo꞉wo꞉ a꞉la꞉sio꞉, “So꞉wa wema꞉yo꞉ da꞉la꞉diya꞉ misa꞉ kalumo꞉wo꞉ to nowo꞉ sama꞉ mio꞉ ko꞉lo꞉ e a꞉na tililia꞉ hamana” a꞉la꞉sio꞉. 18 A꞉la꞉fo꞉ko꞉lo꞉ da꞉la꞉di bo꞉fo꞉lowan kaluwa꞉yo꞉ so꞉wa a꞉no꞉ tililia꞉ga꞉, ene misa꞉ kalumo꞉ a꞉la꞉sio꞉, “So꞉wa wema꞉yo꞉ to nolo꞉ gemo꞉ sa꞉ma꞉ni mio꞉ ko꞉lo꞉ dibolo kalu Fol eyo꞉ gelo꞉wa tililia꞉ hamana a꞉la꞉liki, nemo꞉ dabu ba꞉dabiki, a꞉na tililia꞉ mio꞉.” 19 Da꞉la꞉diya꞉ misa꞉ a꞉ma꞉yo꞉ so꞉wa a꞉no꞉ dagiya gasiliya꞉ga꞉, o꞉fo꞉f doba꞉ba꞉ ta꞉ta꞉ga꞉ ha꞉nakiyo꞉, “Ge nemo꞉wo꞉ o꞉b sa꞉ma꞉ni mio꞉wo꞉?” a꞉la꞉dabu ba꞉ba꞉. 20 So꞉wa a꞉ma꞉yo꞉ a꞉la꞉sio꞉, “Yu kalu iliyo꞉ nenela꞉sa꞉ga꞉ towo꞉ saefa꞉ ko꞉lo꞉ aliyo꞉ kanisolo꞉ amio꞉ Folo꞉ ge tililia꞉ ya꞉bi a꞉la꞉bo꞉ Yu kaluwa꞉yo꞉ gemo꞉wo꞉ dabu ba꞉ba꞉ib. Iyo꞉ Folbo꞉lo꞉ mo꞉walilo꞉ a꞉no꞉ wa꞉ka a꞉fanda da꞉ba꞉no꞉ a꞉la꞉likiyo꞉ ge dikili sa꞉ma꞉ib. 21 Ko꞉sega ililo꞉ dabuba꞉dab aumbo꞉ dimida꞉so꞉bo. Mo꞉wo꞉ kaluwo꞉ do꞉la꞉fo꞉ fa꞉la꞉da꞉in a꞉la꞉ta꞉ga꞉ tininila꞉ a꞉no꞉ usa yasila꞉ga꞉, Folo꞉ a꞉na banaifo꞉la꞉ga꞉ sa꞉mba꞉ib. Iliyo꞉ Folo꞉ mo꞉sanaitakiyo꞉, ho꞉n o꞉lia꞉ ma꞉n o꞉lia꞉yo꞉ elefo꞉ difa꞉ ko꞉lo꞉ semo꞉ma꞉ib a꞉la꞉liki tili saefa꞉ ko꞉lo꞉lab. Iyo꞉ dimidalia꞉sa꞉ga꞉, gilo꞉ a꞉ma꞉la꞉ to sa꞉labo꞉ ko꞉lo꞉ yasilab.” 22 To a꞉no꞉ da꞉da꞉sa꞉ga꞉yo꞉, da꞉la꞉diya꞉ misa꞉ kaluwa꞉yo꞉ so꞉wa o꞉mo꞉wo꞉ hagugu sa꞉lakiyo꞉, “Giyo꞉ to we nemo꞉wo꞉ sio꞉ka꞉ a꞉la꞉likiyo꞉, kalu nolbo꞉wo꞉ sa꞉la꞉so꞉bo” A꞉la꞉sa꞉la꞉sa꞉ga꞉ so꞉wa a꞉no꞉ a꞉ma꞉la꞉ iliga꞉fo꞉.

Folo꞉ Sesalia a꞉na mo꞉walilima꞉ki iliga꞉fo꞉.

23 Da꞉la꞉diya꞉ misa꞉ kalu eyo꞉, da꞉la꞉dilo꞉ bo꞉fo꞉lowan kalu a꞉la꞉ nowo꞉ ho꞉ida꞉sa꞉ga꞉, a꞉la꞉mo꞉wo꞉ a꞉la꞉sio꞉, “Ga꞉go꞉ da꞉la꞉di kalu 200 a꞉la꞉fo꞉, a꞉la꞉ta꞉ga꞉ hos wa꞉la silikilo꞉ da꞉la꞉di kaluwo꞉ 70 a꞉la꞉fo꞉ a꞉la꞉ta꞉ga꞉ da꞉ inso꞉lo꞉ sandima꞉no꞉wo꞉ 200 a꞉la꞉fo꞉ a꞉no꞉ tambo dimidalia꞉sa꞉ga꞉, nulu ofa꞉siyo꞉ agato꞉wa dowalikiyo꞉, Sesalia amisa꞉na ha꞉na꞉bi. 24 A꞉la꞉ta꞉ga꞉ Fol e dinafa hamana꞉kiyo꞉, hos nolo꞉ emo꞉ dimia꞉sa꞉ga꞉, a꞉na asita꞉ga꞉, gamani misa꞉ kalu, Fela꞉ksdo꞉ amio꞉ fa꞉la꞉doma꞉ ha꞉na꞉bi.” 25 To a꞉no꞉ sa꞉la꞉sa꞉ga꞉yo꞉, eyo꞉ mo꞉fo꞉so꞉ iliga꞉takiyo꞉ a꞉la꞉sa꞉sa꞉lo꞉.

26 Ne Kolodius Lisias, niyo꞉ mo꞉fo꞉so꞉ we gamani misa꞉ alan kalu Fela꞉ks gemo꞉ sa꞉sa꞉liga꞉to꞉l. Niyo꞉ sagalo꞉ towo꞉ gemo꞉wo꞉ so꞉lo꞉l.

27 
  • Yu kalu iliyo꞉ kalu we ta꞉lia꞉sa꞉ga꞉ sana soma꞉nigabikiyo꞉, niyo꞉ e Lom kalulo꞉b asula꞉sa꞉ga꞉, niyo꞉ o꞉lia꞉ ni da꞉la꞉di o꞉lia꞉ma꞉ ha꞉na꞉sa꞉ga꞉, e asuwa꞉taki gasili.
28 Niyo꞉ Yu kalu ililo꞉ diga꞉li sio꞉ a꞉no꞉ mo꞉wo꞉ fanda ba꞉ba꞉no꞉ a꞉la꞉liki, e Yuwa꞉ kanisolo ilo꞉ amio꞉ tililia꞉gane. 29 E mo꞉walili ba꞉ba꞉ amio꞉, iliyo꞉ Yuwa꞉ ini ele a꞉no꞉ ko꞉lo꞉ alobana kedo꞉ ko꞉sega, kalu we ni ba꞉ba꞉ amio꞉, e dibolo a to꞉loma꞉no꞉ hala dimido꞉ a꞉no꞉ mo꞉ba꞉ba꞉. A꞉la꞉ta꞉ga꞉ e sana soma꞉no꞉ hala dimido꞉wo꞉ mo꞉ba꞉ba꞉. 30 Yu kalu ililo꞉ kalu we ko꞉lo꞉ sana soma꞉no꞉ a꞉la꞉ta꞉ga꞉lo꞉ dimidaitab a꞉no꞉ ne da꞉da꞉sa꞉ga꞉, niyo꞉ Fol e gelo꞉wa bo꞉bo꞉ge iliga꞉to꞉l. A꞉la꞉ta꞉ga꞉ e o꞉lia꞉lo꞉ kego꞉ kalu iyo꞉lo꞉ gelo꞉wa ya꞉sa꞉ga꞉, gi siwa꞉la mo꞉walilaki sama꞉kiyo꞉, gelo꞉wa hamana a꞉la꞉sio꞉. Eyo꞉ mo꞉fo꞉so꞉ a꞉na sa꞉sa꞉lo꞉. 31 Da꞉la꞉di kalu iyo꞉, ini misa꞉ kaluwa꞉lo꞉ sio꞉ aumb kudu ha꞉naki, nuluwo꞉ Folo꞉ tililia꞉ ha꞉na꞉sa꞉ga꞉ Antibatilis amisa꞉n a꞉na fa꞉la꞉dowo꞉. 32 Kea꞉fowo꞉ hos wa꞉la silikilo꞉ da꞉la꞉di kalu iyo꞉ Folo꞉ a꞉ma꞉ka tililia꞉ga꞉ ha꞉nabikiyo꞉, da꞉la꞉di kalu nolo꞉ a꞉ma꞉la꞉ ilo꞉ sa꞉sen aya ane. 33 Da꞉la꞉di kalu Foldo꞉ tililia꞉gane a꞉no꞉ Sesalia fa꞉la꞉dowakiyo꞉, iliyo꞉ gamani misa꞉ kalumo꞉wo꞉ mo꞉fo꞉so꞉ dimiakiyo꞉, Fol elo꞉ tililia꞉ga꞉ elo꞉wa ta꞉fo꞉. 34 Gamani misa꞉ kaluwa꞉yo꞉ mo꞉fo꞉s sa꞉sa꞉lo꞉ a꞉no꞉ agela꞉sa꞉ga꞉, Fol emo꞉wo꞉, “Gi heno꞉ o꞉ba?” a꞉la꞉dabu ba꞉ba꞉ ko꞉lo꞉ misa꞉ kaluwa꞉yo꞉ Folo꞉ Silisia kalulo꞉b a꞉la꞉asulakiyo꞉, emo꞉wo꞉ a꞉la꞉sio꞉, “Gemo꞉lo꞉ diga꞉li sio꞉ kalu a꞉no꞉ wena fa꞉la꞉dowalikiyo꞉, ge nio꞉ a꞉na mo꞉walili da꞉ba꞉no꞉.” A꞉la꞉sa꞉la꞉sa꞉ga꞉yo꞉, Fol e Helo꞉da꞉ a alan a꞉namilo꞉ dibolo a a꞉na disalifoliki, bo꞉fo꞉melea꞉ki ta꞉fo꞉.

Copyright information for `BCO