1 Corinthians 3

Yehoba 'ina topaihowao

Ma tasigwao, geya sowasowahina ma sanapu moisa yahehepwaile 'oimiya, weyahina yaluyaluwami geya simatuha, ta 'imi nuwatuhu 'abwa tuwa gogo gabulena 'idi nuwatuhu gidemusa. Weyahina 'omi wahegaina tuwa Keliso 'ana hemisa 'oina, gide sedaseda 'i'iudi. Coinega geya sowasowahimi ma 'e'ahai ya'ebwaegomi ma hesi susumo 'oinega yahe'aigomiya, weyahina mwalona ma nige geya sowasowahina 'e'ahai wa'ai. Moisa, mumugami 'abwa tuwa gogo gabulena gidemusa, weyahina 'abwa wahe'ohe'ohe ma wahe'ipi'ipi tuwa. Ta tupwami wagwae, “Tauma Paulo 'ina boda.” Ta tupwami wete wagwae, “Tauma Apolosa 'ina boda.” Cimi gwaeyedi gidemusa gogo gabulena 'idi gwae.

Togidega taugu ma Apolosa weyahima wahehe'ohe'ohe? Tauma topaihowa tuwa, 'ida Bada weyahina. Cida Badaina 'ima paihowa 'i'ebwaemaiya hagadi ma hagadi 'apaipaihowadi, ma 'oinega 'omi Keliso wahemisaeya. Taugu 'igu paihowa todauna tuwa, ma Apolosa to'itayahi. Ma Yehoba hesi 'iboimo 'ina waiwaiyega 'e'ahai 'iyada. Coinega Yehoba 'iboimo tahepwatuwe, ma tauma sahena. Weyahina tauma todauna ma to'itayahina. Ma hesi 'abwa tauma tanoha 'ana topaihowao 'ama maisa 'aigeda 'aigeda 'ada loba gidemusa 'ima hetapewa 'ana madou. Bewa tuwa Yehoba ba'idamai 'ina tanoha 'apaipaihowa, ta 'ina tanohina beno 'omi tomota tuwa. Ma wete 'omi Yehoba 'ina hada.

10 Weyahina Yehobaina 'ihelauwegauwa ma 'ihesumanegauwa ma 'abehega 'ina to'abi hada, 'oinega 'ohola yalagu bwaibwainidiya ma 'oinega tupwadi topaihowa 'oholaedi 'oidiya ma si'abi, 'ilobwainediya ma sida 'abi bwaibwaina.

11 Cida 'oholaina 'imiyamiya, tauna Yesu Keliso, 'oinega geya sowasowahina ma hali 'ohola tahetoholo. 12 Ma hesi 'oholaina tabwanina 'ida yowayowana talagudi. Tupwadi tomota 'idi yowayowana bwebwe'adi si'ewedima, gidemusa 'ulabwa nuwana sagumo nuwana kasikasi, ma tupwadi 'idi yowayowanedi we'adi si'ewe'ewedima, gidemusa keipoki bo 'aulaha bo mulumulu. 13 Coinega 'abwa bwa'omatana 'ana sabwelo 'oina 'ida Badaina hadaedi 'ihadadadi ma 'ida tohodi, nuwana bwebwe'adi bo galadi.

14 Taudi si'abi bwaibwaina 'adi maisa si'ewa. 15 Ma taudi 'idi 'abi galadi, 'idi hadaedi 'igabu yahuledi ma loheloheyamo 'i'abihetedi, ma gesowana 'eta wete 'idi tobwatobwa 'itupwatupwa. 16 Eema wanuwatuhuyahi 'abehega tauda Yehoba 'ina Hada He'asisi, weyahina Yehoba Yaluyaluwana 'oida 'imiyamiya. 17 Ceguma taiyawedi Yehoba 'ina hadaina si'abihegaleya, Yehoba wete 'ida 'abihegaladi. Weyahina 'ina hadaina 'asi'asilalana ma taudi si'abi hegaleya. Cina hadaina tauda.

18 Gesowana taiya 'owa 'uboi 'u'abowego 'abehega 'owa 'aigeda tosanapu, weyahina 'eguma bale'u bewa 'ana sanapumo 'usanapuya, 'ilobwainegowa ma sanapuina 'ulogwahate ma 'oinega sanapu moisa Yehoba 'oinega 'uloba. 19 Weyahina sanapu bewa bale'uwa gide yauyaule Yehoba matana. Weyahina Buki He'asisi 'oina 'ihepwaila gidemusa 'igwaeya,

“Yehoba tosanapuwao 'i'onediya ma sida hesilae siboi 'idi gomanega.”
20 Ma wete 'igwaeya,

“Badaina tosanapuwao 'isanasanapudi 'abehega sinuwatuhu besobeso.”
21 Ma sahena wagwaegwae hanehane 'imi tohanugetaowedi bale'uwa weyahidi, weyahina Keliso ginaula mabwaiyadi 'i'ebwae pwaigomiya. 22 Gidemusa taugu ma Apolosa ma Pita wete 'ilagumaiya 'ami to'abihetenao, ma bale'u wete mabwaiyana 'i'ebwaegomiya, ma wete yawasimi ta 'imi 'amasa, wete ginaula mabwaiyana tuta bewa 'oina ma tuta sinaonaoma 'oidiya 'i'ebwaegomiya. 23 Weyahina 'omi Keliso 'ina tomotaiyao, ta Kelisoina Yehoba 'oinega.

Copyright information for `BDD