1 John 2

Keliso tauna 'ada tolema

Cae natugwao, 'imi leta bewa yaleleyawa ma 'oinega geya sowana pui wapaipaihowa. Ma 'eguma tapui, Yesu Keliso tauna todumwadumwalu 'i'ahwanoi weyahida, Tamada 'oina, ma 'ida puiyao 'inuwasamudi, weyahina Yesu tauna wahina 'ipwaoliyeya 'ida puiyao weyahidi, ma wete mebale'u mabwaiyadi weyahidi.

Yehobaina tasanapuya 'abehega 'iyadai moisa, 'eguma 'ina loinao tahematamatanedi. Ta 'eguma taiya 'igwaegwae ma 'igwae, “Taugu Yehoba 'iyagu.” ma Yehoba 'ina loinao geya 'ihematamatanedi, beno 'i'abowa weyahina 'eda dumwaluna 'i'ebesineya. Ma 'eguma Yehoba 'ina gwae tamulimuliye 'ina helau 'oinega 'ilohemahegita ma tasanasanapu 'abehega 'iyadaina mahetedai tamiyamiya. Eeta 'eguma taiya 'owa 'ugwae, “Taugu Yehoba 'iyagu ma mahetegu 'amiyamiya,” 'ilobwainegowa ma 'umumuga gidemusa Yesu 'ina mumuga.

Loina hauhauna

Ciyagwao, geya'abwa loina hauhauna yaleleleleyawa, ma hesi loina miyamiyanaina wahesagoha nugeteya, ta wasanapu pwaiya, bewa yalolohileyawa.

Ma hesi loina bewa yalele hileya gide loina hauhauna helau weyahina, weyahina helauina Keliso 'ana lobwaina, ma 'omi 'ami lobwaina wete. Beno 'oinega guguyou 'igumwagumwala, ta 'asilala moisa 'isaehane pwaima.

Ceguma taiya tasina 'ilo'alehe ma 'igwaegwae 'abehega tauna 'asilala 'oina 'imiyamiya, beno 'i'abo'abo, weyahina tauna 'abwa tuwa guguyou 'oina 'imiyamiya. 10 Ma wete 'eguma taiya 'owa 'iyamwao 'uhehelauwedi, 'owa 'asilala 'oina 'umiyamiya, 'oinega geya'abwa 'ube'ube'u. 11 Ma hesi 'eguma tasiu 'ulo'alehe, lamuna bewa weyahina 'owa 'abwa guguyou 'ina tupwa 'oina 'umiyamiya, ma wete guguyou 'oina 'utautauya, ma 'eda geya'abwa 'u'ita'ita, weyahina matau guguyou 'iumabodeya.

12 Gwagwama yo, gwae bewa yaleleyawa weyahina 'imi puiyao Yehoba 'inuwasamudiya, Yesu saninega.

13 Babadao yo, gwae bewa yaleleyawa weyahina 'omi tauna mwalohene ta bewa tuwa 'imiyamiya wasanapu pwaiya.

Hewahewaliyao yo, gwae bewa yaleleyawa, weyahina tauna topuiina wahewaiwai sineya.

14 Ma 'omi gwagwama madoumi, gwae bewa yaleleyawa weyahina Tamada wasanapu pwaiya.

Babadao yo, gwae bewa yaleleyawa weyahina 'omi tauna mwalohene ta bewa tuwa 'imiyamiya wasanapu pwaiya.

Hewahewaliyao yo, gwae bewa yaleleyawa, weyahina 'omi tohewaiwai ta Yehoba 'ina gwae 'imiyamiya 'oimiya, 'oinega tauna topuiina wahewaiwai sineya.

15 Ciyagwao, geya'abwa bale'u bewa nuwami 'i'ewa'ewa, weyahina 'eguma bale'u tobwatobwanao nuwami 'i'ewa, bewa 'oinega Tamadai wanuwanaide, ma geya wada helauweya.

16 Moisa, bale'u ginaulinao mabwaiyana, beno nuwa'ubuna ma tobwatobwa 'ana hamwa ma nuwahane, ginaulaedi bewa geya Tamadai 'oinega sitauyama, ma hesi bale'u 'oinega. 17 Ma bale'u bewa 'i'iunamo 'isawala, ma nuwatuhu bale'u tobwatobwanao weyahidi 'ilolagu, ma taudi hesi 'eguma Yehoba 'ina nuwatuhu sipaipaihowa simiya hataya.

Keliso 'ana 'alehaina

18 Natugwao, tuta 'ana 'ebelosaloha 'itauya pwaima, ma mwalo wahesagoheya 'abehega Keliso 'ana 'alehaina 'i'iuna 'ihapwesama, sowasowana wanuwatuhuyahi Keliso 'ana 'alehao baibaiwadi bale'uwa simiyamiya, 'oinega tasanapuya tuta 'ana 'ebelosaloha bewa, 19 ma Keliso 'ana 'alehaowedi 'adi 'ita gide Keliso 'ana tohemisao, ma geya. Weyahina taudi 'eguma 'ida boda moisa, 'abwa mahetedao tamiyamiya. Ma hesi geya! Tuwa si'ebesine pwaigita.

20 Ma 'omi taudi geya gidemusa, weyahina Yaluyaluwa Tabuna 'igihesanapu pwaigomiya, ma 'oinega sanapu baibaiwana wasanapuya, 21 ma geya 'abehega ma'imi henainaida 'imi leta bewa wahasihasili, weyahina he'ita dumwadumwaluna wasanapu pwaiya, ma wete wasanapuya 'abehega geya 'eta wete 'abo 'oinega 'ihapwesa.

22 Ma taudi to'abowedi Yesu simwehihiyeya, ma sigwae, “Yesu tauna geya To'abihetena.” Ceguma taiyawedi sigwaegwae gidemusa, taudi Keliso 'ana 'alehao, weyahina Keliso ma Tamana silogwahatediya.

23 Ceguma taiya 'owa Yehoba Natuna 'ulogwahateya geya Yehoba maheteu wamiyamiya. Ma hesi 'eguma 'utagwalego Natuna 'oina, tauna ma Tamana mahetemwao wamiyamiya.

24 Comi mwalo wasadi wahesagoheya, 'oinega 'eguma wasaina 'oimiya 'imiyamiya beno tauna ma Tamana mahetemiyao wamiyamiya. 25 Ma yawasidaina 'igwae hemiseya 'ida 'ebwaegomi, beno yawasida miyamiya hatayaina.

26 Bewa mabwaiyana yalele pwaiyawa ma 'abehega wasanapu taudi 'ami to'abowao weyahidi. 27 Ma sanapuina wasanapu pwaiya, weyahina Yehoba Yaluyaluwana 'i'ebwae pwaigomiya, ta mahetemiu wamiyamiya, ma 'ihe'itegomi. Coinega geya 'aigeda wete loheya sawasawahina ma 'ihe'itegomi, ma hesi Yehoba 'ina 'ebwaya 'oinega sanapu baibaiwana wasanapuya, beno sanapu moisa, weyahina Yehoba Yaluyaluwana geya 'i'abowegita. Coinega 'ina he'itao wamuliyedi, ma Keliso mahetemiu wamiyamiya, ma geya'abwa wa'ebe'ebesine.

Yehoba natunao weyahidi

28 Coinega natugwao, sowasowana ma Keliso 'oina wamiya hataya, 'oinega 'eguma tutaina 'ihapwesama, geya'abwa ma'imi matauta, nuwana ma'imi deba mwadina, ma hesi 'ina tauyama weyahina wayaliyaya. 29 Tauna mumugana wasanapuya mabwaiyana bwebwe'ana, eeta wasanapuya 'abehega tomota tobwebwe'ana, taudi wete Yehoba 'oinega sili'uma.

Copyright information for `BDD