2 Corinthians 1

Loyauwedo

Yauwedo meKolinita 'omi Yehoba 'ina tohekalesiyao ma 'omi wete Yehoba 'ana tohemisao tupwa Akaya mabwaiyana 'alona, 'imi leta bewa tasidai Timoti 'i'abihetegauwa ma 'aleleyawa, taugu Paulo 'oiguwega, weyahina Yehoba 'ina hesinuwega yahetohepwaila Yesu Keliso weyahina. Tamadai Yehoba ma 'ida Bada Yesu Keliso 'idi helauwega tuwa wamiya yaliyaya.

Paulo 'ina miyamwau 'alona 'iloyauwedowa Yehoba 'oina

Yehoba tauna 'ida Bada Yesu Keliso Tamana 'oina taloyauwedo weyahina 'iboinamo tauna 'atemuyamuya huhuna, ma 'ima miyamwau 'oidiyega 'i'abihe yaliyayemaiya, 'oinega sowasowahima taudi tomiya mwau wete 'a'abihe yaliyayadi, weyahina 'ima 'ebe yaliyayaina Yehoba 'oinega 'alobeya sowasowahina 'alagubale 'oidiya ma taudi wete siyaliyaya. Moisa, Keliso 'ana muyao tauma 'alotohodiya, ma 'oinega Keliso 'ina yaliyaya 'i'ebwaemaiya, tauna 'ina yaliyaya gide.

Ma 'eguma tauma muya 'aloba, beno 'omi 'ami 'abi he'atepatu ma 'ami 'abihetena weyahidi. Ma wete 'eguma 'ama 'ebe 'abihe'atepatu 'aloba, beno 'omi 'imi 'atepatu weyahina, 'eguma 'imi miyamwau gide tauma 'ima miyamwau, ma wete 'eguma 'oidiyega wa'alama'i'ita nata 'omi wa'atepatu. Coinega 'ima hemisa 'omi weyahimi 'ihewaiwai pwaiya, weyahina 'asanapugomiya 'abehega wamuyamuya tauma gide, ma wete wa'atepatu gide tauma.

Ciyagwao, nuwanuwagu ma wasanapu 'ima muyamuyao weyahidi, tutaina Esiya 'oina 'amiyamiya, beno 'ima nuwagala madou hedade 'anuwatuhuya 'abehega nata 'a'amasa. Cana 'ita gide 'ama 'alehaowedi sida lohe'amasimai, ma hesi Yehoba tuwa sowasowahina ma to'amasa 'i'abihe toholodi, ta miyamwauina 'alobeya, 'oinega 'anuwatuhu yahiya 'abehega geya tauma 'ima waiwai, ma hesi Yehoba 'ina waiwai 'oinega 'i'abihetemaiya.

10 Ma 'i'abihete pwaimaiya 'ebe hesilaeina 'oinega, ma wete 'anuwatuhu yahiya 'abehega 'abwa 'i'abihetemai tuta mabwaiyana 'oidiya.

11 Comi wete 'imi 'ahwanoiyega walememai ma 'oinega maisa bwebwe'ana Yehoba 'oinega nata 'aloba, mabwaiyada 'ida 'ahwanoi 'oidiyega, 'oinega mabwaiyada taloyauwedo 'abihetenaina 'alobeya weyahina.

Paulo nuwanuwana ma 'ihabo'ena meKolinita 'oidiya

12 Caigeda nuwatuhu weyahina yayaliyaya madouna, beno yasanapuya moisa 'ima mumuga 'ausalana ma dumwaluna tomota 'oidiya, geya sanapu bale'u 'oidiyega, ma hesi Yehoba 'ina helau 'oima 'oinega, ma gide 'apaihowa madouna 'oimiya. 13 Cimi leta bewa 'aleleyawa mabwaiyana sowasowahina wahasilidi ma wasanapudi, 'oinega nuwanuwagu ma wanuwa sabwalena, 14 gide wasanapu pwaiya tupwana, ma 'abwa Bada Yesu 'ina sabwelo madouna 'oina wayaliyaya tauma weyahima, ma tauma wete 'ayaliyaya weyahimi.

15 Comi yasanapugomiya 'imi hemisa 'oima, 'oinega mwalo nuwanuwagu yahabo'enegomi maluwa ma 'ane yaliyaya waloba. 16 Caigeda 'igu 'adau Masidoniya weyahina 'ana sauga, ma heluwena beno Masidoniyega yada hilama 'oimiya, ma 'oinega 'igu 'adau weyahina wada lemegau ma yada tauya Yudiya.

17 Sahena wanuwanuwatuhu 'abehega 'igu gwaeina mwalo weyahina yahenuwa naluwa. Geya. Sahena yatagwatagwala 'abo'abo gide taudi mumuga bale'u 'ana tomuliyao. 18 Gide tuwa Yehoba 'ina gwae moisa, taugu wete 'igu gwae 'oimiya gwae moisa, ma sahena yatagwatagwala 'abo'abo.

19 Gidemusa Yehoba Natuna Yesu Keliso, tauna weyahina Silibenosi ma Timoti ba'idagwao 'alohatotowa 'oimiya, 'abehega Yesuina geya 'itagwala 'abo'abo, ma hesi tuta mabwaiyana 'itagwala bwaibwaina. 20 Weyahina Yehoba 'ina gwae hemisa mabwaiyadi talobaloba Yesu 'iboimo 'oinega. Coinega Yesuina saninega tatagwalegita, ma Yehoba tahepwatuwe. 21 Cida miya bwebwe'ana Keliso ba'idadai Yehoba 'i'ebwaegita, 'omi ma tauma, ta tauma 'ima paihowa 'i'ebwaemaiya, 22 ma 'ina 'ila'ilala 'oida 'ilaguya, beno Yaluyaluwana 'ateda, ma 'oinega tasanapugita 'abehega tauda 'ina tomotaiyao.

23 Bewa Yehoba 'isanapuya yagwaegwae moisa 'abehega mwalo geya yabo'enegomi 'imi tupwa Kolinita 'oina weyahina geya nuwagu ma yaloina pa'alegomi 'imi mumuga galana weyahina. 24 Geya 'abehega 'ahetoloina pa'alina 'oimiya 'imi hemisa ta 'imi tapwalolo weyahidi, weyahina 'imi hemisega watoholo pa'ala pwaiya, ma hesi sabi lemegomi 'imi yaliyaya weyahina.

Copyright information for `BDD