2 Corinthians 4

Casilala weyahina

1Cima paihowa bewa Yehoba 'ina 'atemuyemuyega 'i'ebwaemaiya, 'oinega sahena 'awe'awe'a. 2Mumuga galadi ta 'abo'abowedi 'alogwahata pwaidiya, ma wete sahena Yehoba 'ina gwae 'abuibui 'abehega he'ita 'abo'abo 'oinega 'ahehe'ita, ma hesi he'ita moisa 'agwaegwae latuwe, ma 'omi mabwaiyami tauma 'ima mumuga 'ausalana Yehoba matana wa'ita. 3Ma 'eguma tupwana tomota 'ima he'itao geya sisanapu, siboidimo hesilae 'ina 'eda 'oinega sitautauya. 4Taudi geya sihemisa, weyahina bale'u bewa 'ina bada 'i'abihegibu pwaidiya, ma 'oinega 'asilala sahena si'ita'ita, beno Keliso 'ina wasawasa tetelina, tauna 'ana 'ita Yehoba gidemusa.

5Cima lohatoto geya tauma weyahima, ma hesi Yesu Keliso tauna 'ida Badaina weyahina, ma tauma 'imi topaihowao tuwa Yesu weyahina. 6Weyahina Yehobaina 'igwaeya, “Guguyou 'oina 'asilala 'ida saehane,” ma Yehoba 'atema 'isaesaehane, 'oinega tauna 'ina 'asilala Keliso manina 'a'ita'ita.

Yehoba 'ina wasawasa wahida we'awe'adi 'alodiya

7Cima wasawasa galewega 'wapima we'awe'adi 'oidiya 'imiyamiya, gide tobwatobwa wasawasa walata miyamiyana 'alona, 'oinega tomota sisanapumai 'abehega 'ima waiwai madouna geya tauma 'oimega, ma hesi Yehoba 'oinega. 8Tomota 'ama mwau baibaiwadi si'ebwaemaiya ta hesi geya sowasowadi ma si'abihe galemai, 'oinega 'ima nuwatuhu baibaiwana ta geya 'abe'u. 9Cama mwau loheloheya si'ebwaemaiya, ma tuwa Keliso 'abwa ba'idamai 'amiyamiya. Wete sihunuhunumai, ma hesi geya silohe'amasimai. 10Tuta mabwaiyana 'oidiya 'ana 'ita gide wahima si'ama'amasa, gidemusa Yesu 'i'amasa, ma 'oinega tomota si'ita Yesu yawasina 'oima 'ipaipaihowa.

11Moisa, mayawasima tuta bewa bale'uwa, ma Yesu weyahina tuta mabwaiyana 'oidiya 'ama 'alehao silolohe 'amasimai ma hesi Yesu yawasina 'wapima we'awe'adi 'alodi 'ihehetapewa.

12Gide tuwa 'amasa tauma 'aloma 'ipaipaihowa, ma 'oinega 'omi yawasi bwebwe'ana 'oimiya 'ipaihowa.

13Mwalo 'aigeda loheya 'ileleya 'igwaeya, “Taugu yahemisaeya, 'oinega yagwae latuweya.” Tauma wete 'ima hemisa tauna gide, ta 'oinega 'ima hemisega 'ahehepwaila, 14ma Yehoba 'asanapuya 'abehega 'ida Bada Yesu 'amasega 'i'abihe toholo hileya, ma tauma wete Yesu ba'idamai 'i'abihe toholo hilemai, ma 'omi wete ba'idamayao 'itoegita tauna matana.

15Bewa mabwaiyana 'omi weyahimi, ma 'oinega Yehoba 'ina helau 'ilelelelewana tomota mabwaiyadi 'oidiya, taudi ba'idadao taloyauwedo madouna, ma wete Yehoba 'ana hepwatu ta 'ina wasawasa 'imadou hedada.

16Coinega geya 'awe'a. Bwagana wahida siwe'awe'a, ma hesi tuwa 'aloda tahehe'ehau sabwelo 'aigeda 'aigeda 'oidiya. 17Muyamuyaedi bewa meyameyahadi tuwa, ma tuta to'uto'upanamo 'oidiya talobalobadi, ta hesi si'abihe waiwaigita ma 'abehega 'ida wasawasa bwebwe'ana hedade ma miyamiya hatayana 'abwa ta'ewa. 18Weyahina 'ida 'ebemasi ginaulaedi geya ta'ita'itadi 'oidiya. Moisa, ginauledi ta'ita'itadi sawasawalidi tuwa, ma hesi ginaulaedi geya tada 'itediya taudi ginaula miyamiya hatayadi.

Copyright information for `BDD