2 Corinthians 6

Paulo 'ina muyamuyao

Coinega Yehoba ba'idamai 'apaipaihowa, ta 'oimiya 'a'ahwanoi ma sahena 'ina helau wa'ahwa ginaula bwagabwagae, weyahina 'igwaeya,

“Tuta bwebwe'ana 'oina 'enau yahesagoheya, 'oinega
'abihetena 'ana tuta 'oina ya'abihete pwaigowa.”
Moisa, bewa tuta bwebwe'ana ma 'ami 'abihetena waloba.

Cabihetena bewa tomota mabwaiyadi weyahidi, genuwama ma 'aigeda taiya 'ilolomugiyemai 'ima paihowao weyahidi. Geya 'aigeda wete 'ebe'etoboda 'alagulagu, ma hesi 'ima paihowao mabwaiyana bwebwe'ana 'ahe'itaeya 'abehega Yehoba 'ina topaihowao bwebwe'ama. Cima paihowa bewa: 'alama'i'ita madouna, muyamuya, miyamwau, hesilae, sapi, 'ebepai, 'aleha, paihowa, 'oyatola masala, gomale, mumuga 'asilalana, sanapu, 'atemuyamuya, he'iya'iyagu, Yaluyaluwa Tabuna 'ateda, ta wete helau moisa, ta 'ima gwae moisa, ma wete Yehoba 'ina waiwai 'oima, ma 'ima 'ebe'aleha 'ebeulaulamega ma 'adigeyegeyemega, beno 'ima mumuga bwebwe'ana.

Tuta tupwana tomota si'ahwa bwebwe'anemai ma tuta tupwana si'ahwa galagalaemai. Wete si'ahwa 'abo'abowemai ma hesi geya 'a'abo. Tomota geya sisanapumai ma hesi Yehoba 'isanapumaiya. Tauma gide 'ama'amasima ma hesi yawasima 'ausalana. Si'abi'abi hegalemaiya ma geya silohe'amasimai. 10 Tauma ma'ima nuwagala ma hesi 'atema 'ayaliyaliyaya. Tauma gide wewelohe, ma hesi wasawasa 'aheheguyai tomota baibaiwadi 'oidiya. Geya wete 'ima tobwatobwamo ma hesiyage ginaula mabwaiyana 'oima simiyamiya.

11 Ciyagwao meKolinita 'omi, 'agu lotohona mabwaiyana yahepwaila latuwa 'oimiya, 12 ta 'ateguwa yahelauwegomiya, ma hesi geya wayaliyaya 'oiguwa. 13 Coinega natugwao, 'ilobwaineya ma 'atemiyega wahelauwegau.

Sahena guguyou tupwaina 'oina waluhuluhu

14 Sahena watubwetubwegomi taudi geya sihemisa Keliso 'oina ba'idamiyao, weyahina geya sowana mumuga bwebwe'ana ma galana ma'aigeda wapaihowa. Wete geya sowana 'asilala ma guguyou ba'idana sihe'iya'iyagu. 15 Wete geya sowana Keliso ma Tomudulele* ba'idana sihe'iya'iyagu. Ceguma Kelisoina 'uhemiseya, geya sowasowahina tomota taudi geya sihemisa ba'idamwao wapaihowa mahemahetena. 16 Wete geya sowasowahina hali 'ebe hemisao talagu luhuwedi Yehoba 'ina hada 'alona. Yehoba tauna mayawasina ta 'ina hada tauda, ma 'igwaeya,

“‘Taugu taudi 'oidiya yalo'asa ma 'alodiya yayawala dadana ma taugu 'idi Yehoba ma taudi 'igu tomotao!’
17 Coinega Yehoba wete 'igwaeya, ‘Hali boda 'oidiyega walatu ma wa'ebesinedi, ma sahena ginaula bi'ibi'idi wa'abi'abitohodi, ma yatoegomi 'igu tupwa, 18 ma 'oiguwa wa'ahwa tamana ma 'omi natugwao meloheyami ma mewahinemi.’ Bewa Yehoba Tohewaiwai tauna 'ina gwae.”
Copyright information for `BDD