2 Corinthians 7

Ciyagwao, Yehoba 'ina gwae hemisaedi tahesagohediya, 'oinega wahida ma yaluyaluwada ta'abihe 'asilaladi ginaula bi'ibi'idi 'oidiyega, ma tahe'ehau moisa ta ma'ida he'asisi Yehoba 'oina.

Paulo 'iyaliyaya meKolinita weyahidi

Ciyagwao wahelauwemai, weyahina 'ima mumuga mabwaiyana 'ausalana. Geya 'aigeda wete nuwami 'ada 'abihe galeya, bo 'a'abihe 'wanigomi, bo 'a'abowegomi. Cigu gwae bewa geya sabi heliyegomi, weyahina nuwama wa'ewa pwaiya, mwalo gide yahegwaegomiya ma 'abehega 'omi ba'idagwao tamiya 'ama'amasa. Yayaliyaya pwaiya weyahimi ma yahehepwatu, ta 'igu nuwatuhu 'ibwebwe'ana pwaiya weyahimi. Bewa tuwa 'ima miyamwau, ma hesi tuwa weyahimi yayaliyaya madouna. Mwalo 'atauyama 'ebwa Masidoniya, geya 'aigeda wete 'ebe'aiyawasi 'aloba, ma wete tuwa miyamwau mabwaiyana, beno 'aleha, tupwa mabwaiyana 'oidiya, ma matauta 'atema. Ma Yehoba, tauna tonuwagala 'adi to'abiheyaliyaya, tauma 'i'abihe yaliyayemaiya ginaula 'eluwa 'oidiyega, beno Taito 'ina tauyama 'oinega, ma wete tetelimi 'oinega, weyahina Taito 'ihegwaegauwa, 'igwaeya, “MeKolinitaedi nuwanuwadi ma 'utauya 'uhabo'enedi. Ma 'ino gwae weyahina sitagwala pwaiyediya, ta 'idi pui 'oinega sinuwabuiya ma'idi dou. Bewa ya'iteya ta yayaliyaya madouna.”

Mwalo 'imi leta yaleleya, ta 'i'abihenuwa mwauwegomiya, ma taugu wete weyahimi yanuwagala, ma tuwa sahena yanuwanuwagala letaina weyahina, weyahina 'omi 'imi nuwagala tuta to'uto'upanamo 'oina. Coinega taugu yayaliyaya, geya 'imi nuwagala weyahina, ma hesi weyahina 'imi nuwagala 'oinega wanuwabuiya 'imi puiyao 'oidiyega. Cimi nuwagalaina walotohoya 'abehega Yehoba 'oinega 'inaoma, ma geya 'eta wete 'oimiya galana yapaihowa. 10 Moisa, nuwagala Yehoba 'oinega ginaula 'ausalana ma 'i'abihe nuwabuigita, ma 'oinega 'abihetena taloba. Coinega sahena nuwagalaina talologwahate. Ma hesi hali nuwagala bale'u 'oinega 'abwa 'ilohe'amasigita.

11 Wa'ita, 'imi nuwagala bewa 'oinega Yehoba bo'i 'i'abihetegomiya, ma wahetapewa, ta wahewaiwaiya ta 'imi mumuga 'ibwebwe'ana mabwaiyana, 'oinega galanaina weyahina wagamwasowala pwaiya, ma wamatauta, ma nuwanuwami yatauyawa 'oimiya, ma wahewaiwaiya ma togalaina 'ana loina wa'ebwaeya. Ginaula mabwaiyana 'oidiyega 'imi paihowa 'ausalana wahe'itaeya.

12 Cimi leta mwalo yaleleyawa geya 'iyamiu topuimo weyahina, ma geya loheyaina 'ipuiya 'oina weyahina, ma hesi 'omi mabwaiyami weyahimi, ma 'abehega Yehoba matana wahe'itae 'igu gwae 'ana hematamatana bwebwe'ana. 13 Coinega yayaliyaya pwaiya madouna. Wete Taito 'ina yaliyaya tauma 'ima yaliyaya 'ilohepoiya, weyahina Taitoina 'imi mumuga 'ausala 'oinega 'iyaliyaya. 14 Mwalo Taito 'imiyamiya ta yahepwatuwegomiya, ma Taito matanega 'i'ita pwaiya, 'oinega geya wete 'ebe debamwadina 'oiguwa. Ma hesi 'igu gwae mabwaiyana 'omi weyahimi 'ana moisa 'ilatu pwaiya.

15 Taito 'imi hematamatana mabwaiyana 'inuwatuhu yahiya, tutaina tauna 'oina watagwalegomiya ma'imi 'ateyoho, 'oinega nuwana wa'ewa bwaibwainiya.

16 Ma taugu wete yayaliyaya 'imi mumuga mabwaiyana 'ausalana weyahina.

Copyright information for `BDD