2 Corinthians 8

Cehele 'awawa weyahina

Ciyagwao, nuwanuwama ma tohekalesiyao Masidoniya 'alona wasanapudi 'abehega Yehoba 'i'abihetediya 'ihenuwa laguwediya ta 'ehele 'awawa 'ausalana silaguya. Taudi towewelohe gide tuwa 'ebetohona silobeya 'idi miya 'ana mwau 'oinega, ma hesi tuwa ma'idi yaliyaya helau bwebwe'ana hedade silaguya.

Yagwaeya moisa, meMasidoniyaedi 'atedi sitagwalediya ta 'idi ginaulao si'ehele 'awawediya ma'ana loheposeyana. Ma si'ahwa'ahwanoi waiwai 'oima ma 'eguma sowasowahina sihelau Yelusalema 'ana tohekalesiyao 'adi sagu weyahina.

Tauma 'ima nuwatuhu ma sihelau, ma'iyamo 'idi 'ehele madou hedade, weyahina Bada 'oina sitagwala nugetediya, 'oinega wete sitagwalediya tauma 'oima, gide Yehoba 'ina nuwatuhu.

Coinega Taito 'ahegwaeya, 'agwaeya, “Mwalo 'uhegaina ma meKolinita 'u'abihetediya 'idi 'ehele 'ana paihowa weyahina, 'oinega 'u'abihetedi wete ma silosalohi.”

Comi wamumuga 'ausala pwaiya 'imi paihowa baibaiwana 'oidiyega, beno hemisa ma hepwaila ma sanapu ma hepwatu ma wete 'imi helau 'oima, 'oinega sowasowahimi ma 'ehele 'ausalana wete wapaihowa.

Bewa 'igu gwae tuwa ma geya 'abehega yaloinegomi, ma yanuwatuhuya tohekalesiyao tupwana sihehetapewa 'ehele 'awawa weyahina, 'oinega 'ebetohona bewa yalaguya ma ta'ita nuwana wa'ehele bwaibwaina, bo geya.

Comi 'ida Bada Yesu Keliso 'ina helau wasanapuya, tauna 'ina wasawasa madouna 'i'ebesineya ma 'iheweweloheya sabi 'abihetegomi, ta 'abehega 'ina hewewelohe 'oinega 'omi wahewasawasa.

10 Coinega nuwatuhu ya'ebwaegomi. Bolime 'igumwala nuwanuwami ma wahelau, 'oinega wahelau nugeta, ta hali boda mulimiya. 11 Coinega sowasowahina ma walosalohi. Mwalo wahetapewa ta wahegaineya, 'oinega nata wete 'imi 'atetagwalega to'aha 'oimiya simiyamiya 'oidiyega helauina walosalohi. 12 Sahena wagwaegwae ma wagwae, “Geya 'eta ginaula 'oima ma 'oinega 'ahelau.” Hesi tuwa wahetapewa ma to'aha 'oimiya 'imiyamiya 'oidiyega wahelau, ma Yehoba wa'abihe yaliyaya. 13 Bewa geya 'abehega 'omi 'imi helau 'ana mwau madouna ma hali 'asa 'idi helau 'ana mwau muhemuhena, ma hesiyage mahemahetena tuwa. 14 Ceguma bewa tuwa 'imi tobwatobwa baibaiwana, sowasowahina ma hali 'asa wa'abihetedi 'idi miyamwau 'oidiyega, ma 'eguma to tuta taudi 'idi tobwatobwa baibaiwana si'abihetegomi wete, 'eguma wamiya mwau. Coinega wada hemahemahetena. 15 Gidemusa gwae 'imiyamiya Buki He'asisi 'oina 'igwaeya,

“Taudi sihe'auta madouna 'adi 'e'ahai geya 'ana tupwamo, ma taudi sihe'auta 'i'iuna 'adi 'e'ahai tuwa sowasowahidi, eeta sihemahemahetena.”

Taito ma'iyanao sitautauya Kolinita

16 Yehoba 'oina yaloyauwedo, weyahina Taito 'ina nuwatuhu madouna 'i'ebwae pwaiya, ma tauna 'i'abihetegomi, gide tauma wete 'ima nuwatuhu. 17 Coinega tutaina 'ahegwaeya ma 'ihabo'enegomi 'itagwala bwaibwaineya, weyahina beno tauna 'ina nuwatuhu madouna.

18 Coinega wete tasidai 'aigeda Taito ba'idana 'ahetunediwa, tauna tologuguya 'aigeda wasa bwebwe'ana weyahina, ma sanina madouna tohekalesiyao 'oidiya, 19 ma tohekalesiyao 'ina paihowa si'ebwaeya ta tauna ba'idamai 'asakosakowasi 'ehele weyahina sabi 'abihetegomi, ma 'oinega tomota Yehoba sihepwatuwe.

20 Geya nuwama ma 'eta taiya 'ilomugiyemai 'igwae, “Helau 'awawaina madouna ma geya sida 'itayahi bwaibwainiya.” 21 Ma hesi nuwanuwama tuta baibaiwana 'oidiya 'ada paihowa dumwalu Yehoba matana, ma wete tomota matadiya.

22 Tasidai wete 'aigeda ba'idadiu 'ahesumaneyawa, tauna 'asanapuya 'abehega tohemisa moisa 'ina paihowa baibaiwana 'oidiyega, ma bewa tuwa 'omi 'imi mumuga bwebwe'ana 'ihesagoha pwaiya ta 'ihemiseya, 'oinega nuwanuwana madouna 'ihabo'enegomi sabi 'abihetegomi wete.

23 Taito wasanapuya 'abehega ba'idagu 'apaihowa mahemahetena 'ami lema weyahina, ma tasidaowedi taudi tohekalesiyao weyahidi sipaipaihowa, ta weyahina tomota Keliso sihepwatuweya. 24 Coinega 'ilobwainegomiya ma tasidaowedi wahelau bwaibwainidi, ma boda hekalesiya baibaiwadi si'ahwa moisaegomi, ma wete si'ahwa moisaemai 'ima hepwatu 'imi helauina weyahina.

Copyright information for `BDD