2 Thessalonians 3

Weyahima wa'ahwanoi Yehoba 'oina

Ciyamayao, nuwatuhu 'aigeda wete, nuwanuwama ma weyahima wa'ahwanoi Yehoba 'oina, ma Bada tetelina 'ima guguyega 'ihewaiwai tomota baibaiwadi 'oidiya, gide mwalo 'oimiya. Ta wa'ahwanoi ma 'ane togala 'oidiyega Yehoba 'i'abihetemai, weyahina Bada 'ana touhalao baibaiwa hedada. Ma hesi Badaina ma'ana hemisa sowasowahina 'i'abihe pa'aligomi, ma 'i'itayahigomi ma 'ane sahena Seitani 'i'abi'abi tohogomi. Coinega Badaina 'ahemisaeya ma 'ima he'ita 'oimiya nige ma wete 'abwa wahematamatanedi, ma 'abehega wete 'ihenuwa lagugomi, tauna 'ina helau weyahina, ta wete 'imi toholo pa'ala Keliso 'oina weyahina.

Lowahi'wata sahena

Ciyamayao, wete 'ahenuwa lagugomi 'ida Bada Yesu Keliso saninega, ma 'ane 'iyadao tupwadi tolowahi'wata wa'ebesinedi, weyahina lowahi'wata geya tauma 'ahe'itegomi, ma guibigamo 'ana 'eda hesi. Coinega wasanapu pwaiya 'abehega 'ilobwainegomiya ma tauma wahe'au'aunawemai, weyahina mwalo ba'idamiyao tamiyamiya, geya 'eta tuta paihowa 'oinega 'alowahi'wata. Gide wete tauma 'aboi 'amega 'ahehe'aimaiya, nihuwana ma sabwelo 'oidiya 'apaipaihowa. Weyahina geya nuwama ma 'ami mwau 'alagulagu, 'e'ahai weyahina.

Ma 'iyamo loina 'imiyamiya 'abehega 'omi wahe'aimai, ma tuwa taumamo 'amega 'ahehetapewa, ma 'ane 'omi 'ima paihowa wahe'au'aunawemai. 10 Ma wete mwalo ba'idamiyao tamiyamiya, 'aloinegomiya 'abehega 'eguma taiya geya 'ida paihowa sahena 'i'ai'ai.

11 Tetelimi 'ahesagoha pwaiya tupwadi 'oimiyega silowahi'wata ma geya simiya hohobiga ma sipaihowa. 12 Coinega 'iyadaowedi 'ahenuwa lagudi, ma 'ida Bada Yesu Keliso saninega 'aloinaedi, ma 'idi paihowa siboi sipaihowadi, ma simiya hohobiga ma 'ane 'adi siloba.

13 Ciyamayao, paihowa bwebwe'adi weyahidi sahena wahewahi we'awe'a.

14 Ceguma taiya he'itaedi 'imi leta bewa 'alonega 'isinalidi, loheyaina wa'ebesine, ma 'oinega 'ina paihowaina 'oina debana 'imwadina, 15 ta watoho, ma sahena walolo'alehe, weyahina tauna tuwa 'iyadai, 'oinega he'ita tuwa wa'ebwae.

Gwae 'ana 'ebelosaloha

16 Cida Bada tauna nuwadaumwala huhuna ma 'i'abihenuwa bwebwe'anigomi, ma 'i'abihe yaliyayegomi tuta mabwaiyana, ma ba'idamiu wamiya hataya.

17 Leta bewa 'ina 'ebe gumwala taugu tuwa nimaguwega yaleleyawa, gide tuwa 'igu letao mabwaiyadi 'oidiya. 18 Ta 'ida Bada Yesu Keliso 'ina helau mabwaiyami 'oimiya.

Taugu Paulo.
Copyright information for `BDD