Acts 14

Paulo ma Banaba 'idi loguguya Ikoniyami 'oina

1Paulo ma Banaba silatuwa Ikoniyami 'oina, ta 'idi paihowa Anitioki 'oina wete gidemusa Ikoniyami 'oina sipaipaihowa 'esa, beno meYudiya 'idi hada tapwalolo 'oina siluhuwa, sihe'ita, ta 'idi he'ita waiwai 'oinega boda sinabwana sihemisaediya, bodaedi tupwadi meYudiya ma tupwadi tomiya ganamuli 'oidiyega. 2Ta tupwadi meYudiya he'itaina geya sihemisae, ta sisinaliya, ma si'ahwa galagalaeya, ta silomugi taudi tomiya ganamuli 'oidiya ma taudi wete Yesu 'ana tohemisao silolo'alehedi.

3Ma 'iyamo tuta dudulena Paulo ma Banaba simiyamiya tupwaina 'oina ta ma'idi 'atepatu silologuguya Bada weyahina. Ma Badaina 'ina waiwaiyega paihowa 'ebe henainaida ta hedehedede sipaihowediya, ma 'oidiyega Badaina 'ina helau wasana 'ana moisa tauna 'ihe'itediya tomota 'oidiya.

4Ma meIkoniyamiyedi siwataha, ma tupwadi meYudiya si'ahwa moisaediya, ma tupwadi Yesu 'ana tohepwailao si'ahwa moisaediya. 5Coinega taudi ganamuli, geya meYudiya, ta meYudiya wete ma'idi babadao siloina hegogona ma Paulo ma Banaba sida gihemuyadi, ta da'uleyega sida lohe'amasidi. 6Ma hesiyage wasana sihesagoheya, ma sidena sitauya Lakeoni gogonao 'oidiya, beno Lisitila ma Dabi 'oidiya. 7Ma tetela bwebwe'ana sihepwaila latuheya, ta 'asanao deidiya wete.

Paulo ma Banaba 'idi paihowa Lisitila 'oina

8Lisitila 'oina 'aigeda tolopegoi silobeya, 'ina tuta li'u 'oinega ma 'iheloheya madouna, ma 'imiyamiyamo tuwa, ta geya 'ida toholowa ma 'ida yawala, weyahina ma'aena lopelopegoina 'itoleya. 9Eeta tolopegoiina 'imiyamiyatoiya, ma Paulo 'ina loguguya 'ihesagoheya, 'oinega Paulo tolopegoiina 'i'ebubuya, ma 'isanapuya 'abehega ma'ina hemisa Yesu 'oina ta sowasowahina 'ida 'abihe bwebwe'ane. 10Coinega Paulo 'enana madouna 'oinega 'ibwau naowa 'oina 'igwaeya, “Cutoholo.” Ma tolopegoiina 'itoholo mwayamwayauwa ma 'iyawala.

11Ma tomota mabwaiyadi Paulo 'ina paihowa bewa si'iteya, ma Lakeoni 'enadiyega sibwaubwau, sigwaeya, “Yehobao sisuluma, 'adi 'ita gide tomota.” 12Ma bodaedi Banaba sibwauweya Yupita ma Paulo sibwauweya Mekiuli, weyahina tauna 'idi togwae. Saniyedi bewa 'idi yehobao sanidiyao, beno Yupita ma Mekiuli.

13Ta 'idi yehoba Yupita 'ina topwaoli 'asaina 'oina 'imiyamiya, ta 'ina hada 'ebe pwaoli* 'asa 'atamanina. Ta topwaoliina 'abehega bulumakau ma 'aiwe didina sulasulana 'i'ewedima 'asa 'ana 'ahwa'eda 'oina, ma nuwanuwana 'abehega boda ba'idanao sida pwaoli Paulo ma Banaba 'oidiya.

14Ta siteluwaedi topwaoliina 'ina nuwatuhu sisanapuya ma geya nuwadi. Coinega 'adi 'ale'o siboi sigisabuya ma sipili latuma, boda 'oidiya sigwaegwae, 15“Ciyamayao gesowana tauma 'oima wapwaopwaoli. Tauma tomota tuwa gidemusa 'omi, ma wasa bwebwe'ana 'a'eweyama 'oimiya, ta 'abehega 'omi 'ebe hemisa besobeso wada logwahatedi ma wada 'itahila Yehoba mayawasina 'oina, tauna galewa ma bale'u ma ni'u ta wete ginaula mabwaiyadi 'alodiya 'adi tohemasaleha. 16Yehobaina mwalo tupwa mabwaiyana tomotainao 'itagwalediya ma taudimo 'idi nuwatuhu ta 'idi mumuga sida muliyedi, 17ma 'ebe he'itao 'oidiya simiyamiya, ta 'abehega 'oidiyega Yehobaina sida sanasanapu. Ma 'ebe he'itaowedi 'ina helauwedi 'oidiya ta 'omi 'oimiya, beno 'wesu galewega ma wete siwaloha bwebwe'ana ma 'oidiyega 'eli'eli bwebwe'ana walobaloba, ta 'oinega wa'ai'ai ma weyahina wayaliyaliyaya.”

18Ta Paulo ma Banaba tomotaedi si'etoboda 'asaediya, eema 'ebelosaloha 'oina sihewaiwai, ma geya 'oidiya sipwaoli.

19Ta meYudiya 'asa Anitioki ma Ikoniyami 'oidiyega sitauyama, ma siluhu bodaedi Paulo ma Banaba 'adi tohesagohao 'oidiya, ta silohetu hetunediya ma Paulo da'uleyega sihunuya. Cigumwala, ta 'asa 'alonega silisi latuheya, ta 'idi nuwatuhu 'i'amasa pwaiya.

20Ta muliyetega Yesu 'ana tomuliyao sitauyama, ma Paulo sitoholo sakowasiyeya, ma Pauloina 'itoholo ta 'iluhuhila 'asai. Ta gona 'i'adaleya, ma Banaba ba'idana sitauya Dabi.

Sihila Anitioki, beno Sisaliya 'alona

21Dabi 'oina wasa bwebwe'ana siloguguyaeya ma tomota tupwana baibaiwana sihemisaeya, ta simuliyeya, 'oinega Paulo ma Banaba sihilahila Lisitila ma Ikoniyami ma Anitioki 'oidiya.

22Ta 'idi lohihilaina 'oina Yesu 'ana tohemisao sigihe pa'alidiya 'asa 'aigeda 'aigeda 'oidiya, ta siguguyediya ma gesowana 'idi hemisa 'ida we'awe'a, ma sigwaeya, “Moisa 'abwa 'ida muya baibaiwadi 'oidiyega taluhu Yehoba 'ina 'ebeloina 'oina.” 23Ma wete 'asa 'aigeda 'aigeda Paulo ma Banaba tohekalesiyao 'idi tohanugetao sihe'asediya, ta 'adi 'abilagata bewa gidemusa, sihudihudi ta 'idi Badaina sihemisaeya 'oina si'ahwa'ahwanoi, ma 'ane 'ida gihewaiwaiyedi 'idi paihowaina weyahina.

24Ta Pisidiya 'alonega sitauyama ma Pamipiliya 'oina silatuwa, 25ta 'asa Peliya 'oina siloguguya, 'oinega sidobiya Atalaya, 26ma wagega sigeluwa, ta sihila Anitioki tupwaina, mwalo 'oinega 'idi paihowaina sihe'aleneya, ma 'oina wete mwalo Yehoba 'ina helau silobeya paihowaina silosalohiya weyahina.

27Eeta tutaina Anitioki 'oina siluhuwa, tohekalesiyao sibwau 'autedima, ma ginaula baibaiwadi Yehoba 'ipaihowediya 'idi sakowasiina 'alona sihe'ote'otetelediya, beno hemisa 'ana 'ahwa'eda 'iso'eya 'asa ganamuli taudi geya meYudiya weyahidi, ma siluhuluhu.

28Coinega Paulo ma Banaba Yesu 'ana tohemisao tupwaina Anitioki 'oina ba'idadiyao simiyamiya tuta dudulena.

Copyright information for `BDD