Acts 15

Yelusalema 'oina siloiloina

Ma tupwadi loheloheya Yudiya 'oinega sisuluma, ta sihehe'ita tohekalesiyao meAnitioki 'oidiya, sigwaegwae, “Mosese mwalo 'iloinaemaiya 'wapima 'ana 'upwa weyahina. Ma 'eguma 'omi 'wapi 'upwaina geya wa'ewa, nata geya 'abihetena walobaloba.” Ma hesi Paulo ma Banaba geya si'ahwa moisaedi, 'oinega mahetediyao sihe'ohe'oheya madouna. Ta tohekalesiyao Anitioki 'oina Paulo ma Banaba, ma tupwadi wete tomuliya 'oidiyega sihesinuwediya ma 'abehega sihane Yelusalema, ma nuwatuhu bewa weyahina sigwaegwae, nuwana siloina, Yesu 'ana tohepwailao site tuwelo ma wete tohanugetao ba'idadiyao.

Ta tohekalesiyao siloyauwedowediya ma sitauya. Sitautauya tupwa Pinisiya ma Sameliya sibui di'waediya, ta sihepwaileya 'idi sakowasi mwalo weyahina, beno 'asa ganamuli, taudi geya meYudiya 'idi nuwabui Yehoba 'oina sihepwaileya, ta Yesu 'ana tohemisao 'asa 'aigeda 'aigeda 'oidiya hepwailaina sihesagoheya, ma siyaliyaya madouna.

Eeta silatuwa Yelusalema, ma tohekalesiyao ma Yesu 'ana tohepwailao ma tohanugetao sitoediya 'idi hada, ta Paulo ma Banaba sihe'ote'otetela 'oidiya to'aha 'idi paihowaedi Yehoba 'ina waiwaiyega sipaihowediya.

Ma tupwadi Yesu 'ana tohemisao Palisi bodaedi 'oidiyega sitoholowa, ma sigwaeya, “Ceguma 'asa ganamuli 'adi tomiyao sihemihemisa, 'ilobwainediya ma 'wapi 'upwa si'ewa, ma wete taloinedi ma Mosese 'ina loinao simuliya nugetedi, ta 'oinega sowasowana sihekalesiya moisa.”

Coinega Yesu 'ana tohemisao site tuwelowedi ma tohanugetao 'eto'auta sipaihoweya, ma nuwatuhu bewa weyahina sigwaegwae. Ta tupwana sihe'ohe'oheya dudulena. Cigumwala ma Pita 'itoholowa ma 'igwaeya, “Tasigwao, wasanasanapu 'abehega tuta mwalo Yehoba 'oidega taugu 'ihesinuwegauwa, ma 'ahwaguwega tomiya ganamuli tetela bwebwe'ana sihesagoheya, ma sihemisaeya. Ta Yehoba to'aha 'ateda simiyamiya 'isanasanapudi, ma taudi tomiya ganamuli 'oidiya 'itagwala pwaiya, ma Yaluyaluwa Tabuna 'i'ebwaediya gidemusa tauda meYudiya 'i'ebwaya 'esegita, ma geya 'aigeda wete wataha 'i'abi'abi latuhe, ta 'abehega taudi hagahagadi ma tauda hagahagada, ma hesi taudi sihemiseya gide tauda tahemiseya, ma 'oinega mabwaiyada 'ateda 'i'abihe 'ehaudi.

10 “Sahena Yesu 'ana tohemisao hauhaudi tupwa ganamuliya 'oidiyega 'adi 'aha'ahala mwauna wa'ebwa'ebwaedi, tabu ma Yehoba wa'abihe gamwasowali, weyahina 'aha'ahalaina tubudao meYudiya geya sowasowahidi ma si'ahali, ta tauda wete geya sowasowahida. 11 Ma hesi 'ida hemisa 'abehega 'ida Bada Yesu 'ina helauwega 'i'abihetegita, ma taudi wete Yesu 'ihelauwediya, ta 'oinega wete 'i'abihetediya.”

12 Ta mabwaiyadi simiya henonowa, ma Banaba ma Paulo sihe'ote'otetela hedehededeyao ma 'ebe henainaidao Yehoba 'ipaihowediya tupwa ganamuli 'oidiya siteluwaedi 'idi paihowega, beno taudi geya meYudiya 'oidiya.

13 Cidi gwae 'igumwala ma muliyetega Yemesa 'itoholowa, 'igwaeya, “Tasigwao, 'igu gwae bewa wahesagohe. 14 Saimoni 'oida bo'i 'ihepwaila 'abehega Yehoba 'ihegaina pwaiya, ma taudi geya meYudiya 'oidiyega tupwana 'ina tomotaiyao 'ihesinuwediya. 15 Ginaula bewa weyahina mwalo palopitao Yehoba 'ina gwae sihepwaila nugeteya, 'igwae,

16 'Muliyetega yahilama ma Debida 'ina hada 'ilotaligeha ya'abihila. Bewa tuwa 'imiya gala ma hesi ya'abihe bwebwe'ane hila. 17 Ta 'oinega hali bodao Bada si'ebese, ma 'agu hesihesinuwao tomiya ganamuli 'oidiyega, taudi wete si'ebesegau.
18 Bewa Bada 'ina gwae, tauna mwalo hene nuwatuhu bewa 'i'abilatuheya.’”
19 Ta Yemesa wete 'igwaeya, “Cigu loina bewa, taudi tomiya ganamuli Yehoba 'oina si'ita'itahila, 'abehega sahena 'adi mwau talagulagu, 20 ma hesi 'idi leta talele ma 'etoboda 'ehatamo talagudi beno, 'e'ahaiina hali 'ebe tuluha 'oidiya tomota si'ebwaediya geya'abwa si'ai'aidi, ta sahena ganawala, ma hebai 'ani'o didididi hesiyodi ma wete bweyaha geya'abwa si'ai'aidi. 21 Weyahina mwalona hene 'ana siga nige Mosese 'ina loina 'ana tologuguyao 'asa 'aigeda 'aigeda 'oidiya simiyamiya, ta wete meYudiya 'idi hada tapwalolo 'oidiya 'etobodaedi bewa sihasihasilidi, ta tomota sihesagohedi Sabati 'aigeda 'aigeda 'oidiya.”

Tohemisa taudi geya meYudiya 'adi loina

22 Coinega Yesu 'ana tohepwailao site tuwelo ma tohanugetao ma tohekalesiyao mabwaiyadi sinuwanuwatuhu mahemahetena, ta tupwadi 'oidiyega sihesinuwanediya ma sihewasediya, ta 'abehega Paulo ma Banaba mahetediyao sitauya Anitioki. Ma 'eluwa tohekalesiyao 'adi tohanugetao 'oidiyega sihesinuwediya, beno Yudasa, tauna sihesaniyeya Basaba, ma wete Sailasa, 23 ta tohemisaowedi tupwa ganamuli 'oidiya 'idi leta si'eweya, ma 'ana lele 'igwae, “Yauwedo tasimao 'omi tohekalesiyao tupwa ganamuliya Anitioki ma Siliya* ma Silisiya 'oidiya wamiyamiya. Tauma Yesu 'ana tohepwailao ma tohanugetao 'imi leta 'aleleyawa. 24 Mwalo tetelimi 'ahesagoheya 'abehega tupwadi loheloheya tauma 'oimega sinaowa ma hali tetela 'oinega si'abihe 'wanigomiya, beno siboi 'idi nuwatuhuwega, ta geya tauma 'ima hemataluwa. 25 Ma tauma bewa 'a'eto'auta pwaima, ta 'ima nuwatuhu 'aigeda 'oinega tupwana 'ima loheloheyao 'ahesinuwediya, ta 'iyadao Banaba ma Paulo mahetediyao 'ahewasaediya 'oimiya. 26 Taudi Banaba ma Paulo siboimo sitagwalediya ma tuta baibaiwana sitautauya 'ebe hesilae 'alodiya, 'ida Bada Yesu Keliso 'ina paihowa weyahina.

27 “Ta 'ima loheloheyaedi 'ahesinuwa pwaidiya, sanidiyao Yudasa ma Sailasa, ma 'omi loina si'ebwaegomi 'imi leta 'oinega, ma wete taudi 'idi gwae 'oinega. 28 Cami loinaina Yaluyaluwa Tabuna ba'idamai 'anuwatuhuya 'abehega bewa loina bwebwe'ana ma 'etobodaedi 'ehata bewa madoudimo wamuliyedi, ta geya 'eta to'aha wete weyahina wanuwanuwatuhu. 29 Cetobodao beno, to'aha tomota sipwaopwaoli hali 'ebe tuluha 'oidiya, sahena wa'ai'ai, wete hebai mabweyahidi, ma hebai dididimagaidi hesiyodi sahena wa'ai'aidi, ta wete sahena waganaganawala. Ceguma 'etobodaedi bewa 'oidiyega wa'itayahigomi, mumugami bwebwe'ana. Yauwedo.”

30 Coinega site 'ehataedi sitoholowa, sisuluwa Anitioki, ma tohekalesiyao nobwa sibwau 'autedima, ta 'idi letaina si'ebwaediya. 31 Eeta letaina sihasiliya, ta 'ina hepwaila weyahina siyaliyaya madouna. 32 Ta Yudasa ma Sailasa taudi wete palopitao, ta 'idi guguya baibaiwana 'oidiyega tohekalesiyao si'abihe waiwaiyediya.

33 Ma siteluwaedi nobwa simiyamiya, 'ana siga 'idi tuta 'ilatuwa ma sitau, ta tohekalesiyaedi siloyauwedowediya, ma silokaiyoniyedi, ta sihila taudi 'adi tohewasaowedi 'oidiya. 35 Ma hesi Paulo ma Banaba Anitioki 'oina simiya hila, ma Badaina 'ina gwae sihehe'ita ta siguguguguya, ma tupwana baibaiwadi wete mahetediyao sipaipaihowa.

Paulo ma Banaba sitauya wasiwasiya

36 Ta sabwelo hisa sigumwala ma Paulo Banaba 'ihegwaeya, 'igwae, “Ciyagu, tahila ma gogowedi mwalo 'ida Bada tetelina 'aguguyaeya 'oidiya tahabo'enedi wete, ma tasidaowedi ta'itadi, togidega 'idi miyamiya.”

37 Ta Banaba 'igwaeya, “Bwebwe'ana, ma Yoni tauna sihesaniyeya Maki tatoe ma mahetedai tatauya.”

38 Ma Paulo 'igwae, “Nuwana sahena tauna 'i'waya'wayabugita, weyahina mwalo Pamipiliya 'oina 'i'ebesinegita, ma 'ihila 'asai, ta geya nuwana ma 'i'wayabugita 'ida sakowasi 'oina.”

39 Coinega Paulo ma Banaba sihe'ohe'oheya madouna Maki weyahina, ta Banaba Maki 'itoeya ta sigeluwa wagai ma sidobi bwanabwana Saipilosi 'oina.

40 Ma Paulo Sailasa 'ihesinuweya ma 'i'wayabu 'ina sakowasiina 'oina. Coinega tohekalesiyao Yehoba 'oina si'ahwa'ahwanoi, nuwanuwadi ma 'ina helauwega siteluwaedi 'ida 'abihewaiwaiyedi. Ta sitauya, 41 ma silohihila Siliya ma Silisiya 'asaidiyao 'oidiya, ta Paulo tohekalesiyao 'i'abihetedi, ma 'i'abihe waiwaiyedi.

Copyright information for `BDD