Acts 17

Paulo ma Sailasa galana silobeya 'asa Tesalonaika 'oina

Eeta sitauya Amipipoli ma Apoloniya 'oidiya, ma Tesalonaika 'oina silatuwa, ta Tesalonaika 'oina meYudiya 'idi hada tapwalolo 'imiyamiya. Ta Paulo 'idi lotapwalolo 'oina 'iluhuwa, gidemusa tupwa mabwaiyana 'oidiya 'ipaipaihowa 'esa, ma nobwa Sabati 'etoi 'oidiya Buki He'asisi 'oinega 'ihe'ihe'ita ma ba'idanao sihehe'ohe'ohe, ta Pauloina sanapu 'i'ebwaediya, 'igwae, “To'abihetenaina 'ilobwaineya ma muya 'iloba ma 'i'amasa ta wete 'amasega 'itoholo hila.” Ma wete 'igwaeya, “Yesuina yahehepwaile 'oimiya tauna tuwa To'abihetenaina.”

Coinega tupwadi si'ahwa moisaeya, ma Paulo ma Sailasa 'idi boda 'oina siluhuwa, ta wete Yehoba 'ana tohe'asisiyao taudi tupwa ganamuli 'oidiyega ma wahiwahine sanidi madoudi 'oidiyega tupwana baibaiwadi wete sihemisa.

Ta meYudiya Paulo ma Sailasa sihe'ipi'ipiyediya ma si'ahwa galagalaediya, ma tupwana toyawala besobeso galadi siloinedi ma boda madouna sihegogonediya ta nuwanuwadi silo'alehedi. Coinega Yesoni 'ina hada sihaneiya, 'idi nuwatuhu 'abehega Paulo ma Sailasa hadai simiyamiya, ma 'abehega sida 'abiyahidi, si'ewa latuwedi boda 'oidiya. Ma si'ebesa 'asaediya, ta Yesoni ma tupwana tohekalesiyao ba'idanao si'abiyahidiya, ma 'oinega sitoedima 'asa 'ana toloinao 'oidiya sabi heyatalaedi, ta sibwaubwau sigwae, “Loheloheyaedi taudi tupwa mabwaiyadi 'adi to'abihegalao sitauya pwaima 'ebwa, ma Yesoni 'ina hadai sihetaumana, ta 'idi he'ita 'oinega Sisa 'ina loina siligehiya, weyahina sigwaegwae 'abehega kini hauhauna 'ilatuma, sanina Yesu.”

Casa 'ana toloinao ma bodao he'ewa bewa sihesagoheya ta si'ateyohowa, 'oinega siloina Yesoni ma'iyanao 'oidiya ma 'abehega 'idi mane 'oinega sida hemaisa, ta wete sida miya daumwala. Ma sihemaiseya ma silihasidiya, ta sitauya.

Paulo ma Sailasa 'idi paihowa tupwa Beliya 'oina

10 Ma hinuwana tohekalesiyao Paulo ma Sailasa sihewasaedi ma sida tauya Beliya, 'oinega sitauya, ma tutaina silatuwa Beliya siluhuwa meYudiya 'idi hada tapwalolo 'oina, ta Yesu wasana sihe'ita. 11 Mwalo Tesalonaika 'oina meYudiya genuwadi wasaina, ma hesi meYudiya Beliya 'oina 'idi tagwala bwebwe'ana, ma wasaina nuwadi 'i'eweya, 'oinega sabwelo 'aigeda 'aigeda Buki He'asisi sihasihasili ta 'abehega wasa bewa 'ana moisa sida sanapu. 12 Coinega meYudiya tupwana baibaiwadi sihemisaeya, ma wete taudi geya meYudiya 'oidiyega wahiwahine, taudi sanidi madouna, ta wete loheloheya tupwana baibaiwadi.

13 Ta meYudiya Tesalonaika 'ana tomiyanao sihesagoheya 'abehega Paulo Yehoba wasana 'iloguguya 'asa Beliya 'oina, ma silomwayamwayau ma bodao sihenuwa lagudiya ta 'abehega Paulo ma Sailasa sida lo'alehedi.

14 Coinega tohekalesiyao siloina mwamwayau, ma Paulo sihetuneya ma 'isuluwa gogo holai 'oina, ta Sailasa ma Timoti 'ebwa ba'idadiyao simiyamiya. 15 Ta tupwana tohekalesiyao Paulo si'wayabuya ta sitauya Ateni, ma 'oinega Paulo loina 'i'ebwaedi ta 'abehega Sailasa ma Timoti silomwamwayauma Ateni 'oina, ta to'wayabuwedi sihila Beliya.

Paulo 'ina miyamiya Ateni 'oina

16 Ma Paulo Ateni 'oina Sailasa ma Timoti weyahidi 'abwa 'iyamwayamwana, ta 'inuwagala madouna weyahina 'i'iteya meAteni geya Yehoba 'oina sihemihemisa ta hesi 'idi 'ebe hemisa hagana ma hagana, ma baibaiwa hedada. 17 Coinega ba'idanao sihe'ohe'ohe nuwatuhu bewa weyahina, meYudiya ma tupwadi Yehoba 'ana tohemisao wete ba'idadiyao sigwaegwae, meYudiya 'idi hada tapwalolo 'oina, ma wete toni'asa, 'eguma 'ihalobadi 'ebe gimwane 'oina, ba'idadiyao sigwaegwae sabwelo 'aigeda 'aigeda 'oidiya.

18 Ta tupwadi tosinasinapuwao wete, taudi sihesaniyediya Epikulo*, ma tupwadi Sitoike* wete, Paulo ba'idadiu sihehegwaegwae ta tupwadi taudimo 'oidiya sihe'ote'otetela, sigwaeya, “Ciya! Toheyauyaule to'aha 'igwaeneya?” Ma tupwadi sigwae, “Nuwana hali Yehoba weyahina 'iloguloguguya,” weyahina sihesagoheya Yesu 'ina toholohila 'amasega weyahina 'ilologuguya. 19 Coinega Pauloina sitoeya hada 'eto'auta sanina Aliyopago* 'oina ma sihegwaeya, “Cino he'ita bewa hauhauna, 20 ta 'oima 'ana hesagoha 'abehega 'ebe henainaida, 'oinega 'ana sanapu 'uda lihasi ma 'ada sanapu.” 21 Ta meAteni ma'adi taumanao mabwaiyadi 'idi 'ebe nuwa'ewa beno sanapu hauhaudi 'adi he'ita ma 'adi hesagohamo.

22 Coinega Paulo hada 'eto'auta 'alona 'itoholowa ma 'iloguguya 'oidiya, 'igwaeya, “MeAteni, 'omi yasanapugomi 'abehega wahehetapewa 'imi tapwalolowao 'oidiya, 23 weyahina 'igu yawalao 'oidiya 'omi 'ebe tuluha baibaiwadi ya'itediya ma 'oidiyega 'aigeda 'ebe pwaoli ma'ana lele ya'ita lobeya, ta 'ana lele bewa gidemusa 'igwaegwae, ‘Yehoba tauna geya tada sanapuya 'ina 'ebe pwaoli bewa.’ Ma Yehoba 'ina 'ebe pwaoli beno 'oina watulutuluha ta geya wada sanapuya, tauna 'iboi yahehepwaila 'oimiya.

24 “Tauna bale'u mabwaiyana ma ginaula mabwaiyana 'oina simiyamiya 'adi tohemasaleha, ta galewa ma bale'u 'adi Bada. Coinega geya hadao tomota nimadiyega si'abi'abidi 'alodiya Yehobaina 'ida miya. 25 Ma tomota tauda geya sowasowahida ma 'aigeda to'aha nimadega tauna Yehobaina ta'ebwae, 'eguma tanuwatuhu 'abehega nuwanuwana, ta tauna hesi yawasida ma yaluyaluwada ma 'ida tobwatobwa mabwaiyana 'i'ebwaegita. 26 Ta 'aigeda loheya sanina Adama 'oinega hali tupwa ma hali tupwa tomotenidi Yehobaina 'ibubugita, ma 'abehega tomota si'elelewana bale'u mabwaiyana 'oidiya, ma boda 'aigeda 'aigeda 'idi sauga ta 'idi tupwa Yehoba 'iloina pwaidiya. 27 Cina nuwatuhu 'abehega tauna si'ebese, ma nuwana 'abwama silotoho, bo nuwana siloba. Ta hesi Tohemasalahaina mabwaiyada deida 'imiyamiya. 28 Weyahina 'Tauna 'oinega yawasida ta'ewa'ewa ma ba'idadai tatautauya ma wete tamiyamiya.’ Ma 'omi wete 'imi wali tobui tupwadi Yehobaina weyahina sigwaeya, 'Tauda moisa tauna natunao.’

29 “Coinega gesowana tanuwatuhu 'abehega Tamadaina gidemusa ma'ama'ayau, beno tomota 'idi nuwatuhuwega ma goula* bo siliba* bo da'ule 'oidiyega sibubuya.

30 “Tutaina mwalo tomota Yehoba sihemwage mwageyeya, 'oinega geya 'ida gamwasowalediya, ma hesi bewa tuwa tauda tomota tupwa mabwaiyana 'oidiya 'iloinaegita ma 'ida pui 'oidiyega tanuwabui. 31 Weyahina 'ida sabwelo bwa'omatana 'abwama 'iupaeya ma mebale'u mabwaiyada 'ada loina dumwadumwaluna 'ida 'ebwaegita loheyaina 'ihesinuweya 'oinega, ma loheyaina 'amasega 'i'abihetoholo hileya ma 'oinega tomota mabwaiyada wasa bewa tada 'ahwa moisae.”

32 Ma bodaedi to'amasa 'idi toholo hila wasana sihesagoheya, ma tupwana sihenameya, ta tupwadi sigwaeya, “Nuwanuwama ma 'abwama nuwatuhu bewa weyahina 'uhe'ote'otetela hila ma 'ada hesagoha.”

33 Eeta Paulo bodaedi 'oidiyega 'ilatuwa. 34 Ma tupwadi tomota Paulo 'ina gwae sihemiseya ta 'ina boda 'oina siluhuwa, 'aigeda loheya sanina Dionisiyo, tauna toloina 'aigeda boda Aliyopago* 'oidiyega, ma 'aigeda wahine sanina Damali, ma tupwadi wete.

Copyright information for `BDD