Acts 2

Yaluyaluwa Tabuna 'ina tauyama

1Ma muliyetega paihowa sanina Penitikosi* 'ana sabwelo 'oina Yesu 'ana tohemisao mabwaiyadi si'eto'autama, 2ma hadai simiyamiya, ma galewega 'aigeda dagugu gide wediliya madouna sihesagoheya, ta 'idi hada 'alona gesowana ma to'aha wete sihesagohe, 3ta ginaula 'aigeda si'iteya 'ana 'ita gide 'aiwe ninininimina, ma 'alataedi sitowa 'aigeda 'aigeda debadiya. 4Coinega mabwaiyadi Yaluyaluwa Tabuna 'ilohemahediya, ta sihegaina ma hali 'enana ma hali 'enana 'oidiyega sigwaegwae, beno Yaluyaluwa Tabuna 'ina waiwaiyega.

5Sauga nage 'oina totapwalolo meYudiya hali tupwega ma hali tupwega sitauya pwaima, ma Yelusalema 'oina simiyamiya, 6ma daguguina sihesagoheya ta si'eto'autama, ma mabwaiyadi taudi 'enadiyega 'aigeda 'aigeda gwae sihesagoheya 'oinega nuwadi 'ihepwanopwanowa madouna, 7ta sigwae, “Togidega, taudi togwaeyedi mabwaiyadi meGalili 'awa? 8Ma togidega ta 'oinega mabwaiyada tauda 'enadega sigwaegwae, 9'enanaedi beno Palitiya, ma Midiya, ma Elama, ma Mesopotemiya 'ana tomiya, ma Yudiya ma Kapadosiya, ma Ponito, ma Esiya, ma 10Piligiya, ma Pamipiliya, ma Itipita, ta Libiya tupwainaowedi Sailini 'alona simiyamiya, ta taudi Lomega sitauyama, tupwadi meYudiya, ma tupwadi geya meYudiya ma hesi 'ida tapwalolo 'oina sitagwalediya mahetediyao, 11ma wete meKiliti, ma meAlebiya, ta mabwaiyada tauda 'enada hagana ma hagana 'oidiyega sigwaegwae Yehoba 'ina paihowa waiwaidi weyahina.”

12Coinega mabwaiyadi ma'idi henuwanainaida siboidimo sigwaegwae, “To'aha lamuna ta 'idi paihowa bewa gidemusa?”

13Ma hesi 'iyadiyao tupwadi sigwae, “Nuwana we'aha waiwai 'oinega sihebuwa.”

Pita 'ina hepwaila

14Ma Pita 'iyanao site lebeni mahetenao sitoholo, ma Pita 'ihegaina ma 'oidiya 'iloguguya, 'igwaeya, “Comi meYudiya ma Yelusalema 'ana tomiyao mabwaiyami 'igu gwae wahesagohe, ma wanuwa sabwalena, 15'abehega 'ima paihowa bewa geya we'aha waiwai 'oinega, weyahina 'abwa gonagona, geya numa yauyaule 'ana tuta. 16Ma hesi mwalo palopita Yoeli 'ihepwaila nugeteya, 'igwae, 17'Yehoba 'ina hepwaila bewa gidemusa 'igwae:

Cabwa sauga 'ana 'ebelosaloha 'oina, Yaluyaluwagu yalosiwa tomota mabwaiyadi 'oidiya, ma natumiyao loheyadi nuwana natumiyao wahinedi siloguguya, ta 'imi hewahewaliyao si'eno mata'ita'ita, ta 'imi babadao sinihi.
18Moisa, tuta nage 'oina Yaluyaluwagu yalosiwa 'igu topaihowa, loheloheya ma wahiwahine 'oidiya, ma 'igu nuwatuhu sihepwaila nugete. 19Ma 'ebe'ita henainaida yapaihowadi galewa, ta wete bale'uwa, gidemusa bweyaha ma 'aiwe ganinisa ma 'asu, 20ta sinala 'iguguyou, ta wai'ena 'ana 'ita 'ihebweyaha, ma muliyetega Bada 'ina sabwelo 'ebe matauta 'ilatu. 21Ta 'eguma taiyawedi Bada saninega sibwaubwau nata 'i'abihetedi.’”
22Pita wete 'ihegwaediya, 'igwae, “MeIsileli 'omi gwae bewa wahesagohe, Yesu tauna gwama Nasaleta matamiya Yehoba 'ihe'itaeya 'abehega tauna 'ina topaihowaina, weyahina Yesu 'ina paihowa waiwaidi ma 'ebe henainaida Yehoba 'ina waiwaiyega 'ipaihowediya, ma wasanasanapudi weyahina gamwagamwanimiya 'ipaihowediya. 23Yehoba mwalo hene Yesuina weyahina 'iloina, ma to'aha bale'uwa Yesu nata 'iloba Yehoba 'isanapu nugeteya, beno 'omi watebaeya, ta 'imi loina 'oinega tomota galadi kelose 'oina silohe'amasiya. 24Ma Yehoba 'amasa 'ina tupwa mwauna 'oinega 'i'abiheteya ta 'i'abihetoholo hileya, weyahina geya sowasowahina ma 'amasa 'ina tupwa 'imiyamiya hataya. 25Bewa weyahina mwalo Debida Yesu 'ina gwae 'ihepwaila nugeteya 'igwae,

'Bada ya'iteya mataguwega 'imiya hataya, ma 'igu 'ebeulega 'imiyamiya, ta 'i'abihe waiwaiyegauwa ma sahena yawe'awe'a.
26Coinega yayaliyaya madouna ma yahehepwatuwe, ma yahemisaeya 'ane gesowana 'wapigu 'igalagala.
27Taugu 'ino loheya hesihesinuwaigu, eema sahena yaluyaluwagu 'ulagulagu hataya to'amasao 'idi gogowa, ma gesowana wete 'wapigu 'imwahulu.
28Ta hesi yawasi bwebwe'ana 'ina 'eda 'uhe'itaeya 'oiguwa, 'oinega matauwa 'u'abihe yaliyaya hataegau.’”
29Ma Pita wete 'igwaeya, “Tasigwao, gwae bewa geya tubuda Debida weyahina, weyahina Debidaina tasanapuya 'abehega mwalohene 'i'amasa ta sigaliheya, ma bewa tuwa 'ana galihina 'ebwa 'imiyamiya. 30Ma Debidaina palopita 'aigeda, ma Yehoba 'ina gwae hemisa waiwaina 'oina 'inuwatuhu yahiya 'abehega 'abwa Debida tubuna 'aigeda Debidaina 'ina 'ebeloina 'i'ewa Yehoba 'oinega. 31Coinega To'abihetenaina 'ina toholohila 'isanapu nugeteya, ta 'ihegwaeya 'abehega sahena to'amasao yaluyaluwadi 'idi gogo 'oina 'imiyamiya hataya, ma wete 'wapina gesowana 'imwahumwahulu. 32Bewa Yesu 'ina 'amasega Yehoba 'i'abihetoholo hila pwaiya, ma tauna mabwaiyama 'a'iteya. 33Coinega Yehoba 'i'abihaneheya ta tauna 'ina 'ebeulega 'imiyamiya, ma tauna Yaluyaluwa Tabunaina Yehoba mwalo 'igwae hemisaeya, ma bewa tuwa 'i'ebwaya pwaimaiya, 'oinega paihowa bewa wa'ita'itadi ma wahehesagohedi, tauna 'oinega sitauyama. 34Weyahina Debida geya tauna 'ina hane galewa weyahina 'igwae, ma Yesu hesi weyahina 'igwaeya, 'igwae,

'Yehoba 'igwae pwaiya 'igu Bada 'oina, “Cigu 'ebeulega 'umiyatoi,
35ma 'ana siga tutaina 'a sahiyao yalagu suluhedi 'aheu 'adi 'ebelagu 'oina.” '
36“Bewa weyahina meIsileli mabwaiyami wasanapu bwaibwaini 'abehega Yehoba Yesu 'i'ahwa bada pwaiyeya ma tauna To'abihetena, tauna Yesuina wa'abihekelose pwaiya.”

37Loheloheyaedi Pita 'ina gwae bewa sihesagoheya ta weyahina sinuwagala moisa, ma Pita ma'iyanao 'oidiya sihesilala, sigwae, “Tasimao 'alopuiya. Togidega nata 'apaihowa 'esa?”

38Coinega Pita 'igwaeya, “Cimi paihowa galana 'oidiyega wanuwabui, ma mabwaiyami To'abihetena Yesu saninega 'ada 'abihe babitaisogomi, ma wete 'imi puiyao 'inuwasamudi, ta wete Yaluyaluwa Tabuna 'i'ebwaegomi. 39Weyahina Yehoba 'ina gwae hemisaina 'abehega 'omi weyahimi, ma natumiyao wete weyahidi, ma taudi bwaga 'ana tomiyao weyahidi, taudi mabwaiyadi 'ida Badaina Yehoba 'ibwauwedi 'oina.”

40Ma Pita 'ina gwae ta 'ina loguguya baibaiwana wete 'oidiyega 'ihepwaila, ta 'igwaeya, “Ciyagwao, mehau galadi wa'ebesinedi ma 'abihetena wa'ebese.”

41Coinega sabweloina 'oina Pita 'ina gwae sihesagoheya, ta sibabitaiso, ta 'adi baibaiwa gidemusa 'etoi tausani, 42ta sitagwala moisa tohepwailedi 'idi he'itao 'oidiya ma sihe'iya'iyagu moisa, ma si'ai mahemahetena, ta wete si'ahwa'ahwanoi Yehoba 'oina.

Tohekalesiyao mumugadi

43Ta mabwaiyadi Yehoba sihe'asisiyeya, ma tohepwailao 'idi paihowao 'ebehenainaida ma hedehedede baibaiwadi sipaihowediya. 44Ma tohemisaowedi taudimo sihegogonedima, ta 'idi tobwatobwao sitagwalediya ma 'abehega tomota mabwaiyadi 'idi tobwatobwa. 45Ta 'eguma 'idi 'ebeloina 'asai simiyamiya sihegimwaneyedi ta ginaulaedi 'adi maisega siheguyaiyedi taudi geya 'idi tobwatobwaomo 'oidiya.

46Coinega sabwelo 'aigeda 'aigeda 'oidiya ma'idi 'atetagwala sitapwatapwalolo Hada He'asisi 'oina, ma taudi 'idi hada ma'idi yaliyaya si'ai hegogona, 47ma Yehoba sihehepwatuwe. Ta hesi tomota mabwaiyana tohemisaowedi si'ahwa bwebwe'anediya. Ma sabwelo 'aigeda 'aigeda 'oidiya Yehoba tupwana tomota wete 'i'abi'abihetedi, ta tohekalesiyao 'adi baibaiwa 'imadomadou.

Copyright information for `BDD