Acts 20

Paulo 'ina sakowasi Masidoniya ma Gilisi 'oidiya

1Ma dagadaga 'igumwala pwaiya, ta Paulo tohekalesiyao 'ibwauwedima ta 'iguguyediya, 'oinega 'iloyauwedowediya, ta 'itauya Masidoniya. 2Ma Masidoniya tupwainao 'oidiya 'isakowasiya, 'iloguguya tohekalesiyao 'oidiya, 'i'abihe pa'alidiya, ta muliyetega tupwa Gilisi 'oina 'ihapwesa, 3ta nobwa wai'ena 'etoi 'imiyamiya, ta 'i'iunamo wagega si'adau, Siliya weyahina, ta tupwana gwaegwae 'ihesagohediya meYudiya siloiloina tauna weyahina sabi 'abiyahina, ma 'oinega 'ina 'eda 'ibuiya ta 'abehega Masidoniya 'alonega 'ihila.

4Ma loheloheya tupwana ba'idanao sitauya, 'aigeda gwama Beliya, tauna Pilo natuna sanina Sopeta, ma meTesalonaika siteluwa, taudi Alisitako ma Sikanido, ta gwama Dabi sanina Gayo, ta Timoti wete, ta meEsiya siteluwa, sanidiyao Tikiko ma Tilopimo.

5Taudi bewa sitauya nugeta wagega ma Tilowasi 'oina siyamwayamwa. 6Ta tauma Pilipai 'oina 'amiyamiya 'ana siga pwalawa daisinamo 'ana guyai 'apaihowa. Cigumwala ta tauma wete 'ageluwa, ma sabwelo nima 'ai'aigeda 'a'ada'adau, ma 'asohota Tilowasi, ma 'iyamayaowedi 'alobediya, ta sabwelo sebeni wete 'amiyamiya.

Paulo 'ina paihowa Tiloasi 'oina

7Wiki 'ana sabwelo nugenugetaina 'oina mabwaiyama 'a'eto'autama beledi 'ehisihisi 'ana 'ebe nuwatuhuyahina sabi paihowaina, ma Paulo 'iguguya, weyahina hali sabwelo 'ina tuta tauya. Ta 'ina gwae guguyaina 'iloheduduleya ta 'ana siga hinuwana gamwana, ma tuwa 'abwa 'iguguguguya. 8Ta hada 'ana hane gidemusa hada 'etoi, ma hetoina 'oina 'ahaneya, ta mayale baibaiwadi 'agabudiya.

9Ma hewali 'aigeda, sanina Yutiko, 'imiya haneya hada papalina 'oina 'imiyatoiya, ta mata'eno'enowega 'ilolosaduduna. Ta Paulo 'abwa 'igwaegwae, ta Yutikoina 'i'enosineya, ma papalinaina 'oinega 'ibe'uwa bale'uwa, ma sisuluwa ta si'abilagasiya, ta si'iteya 'i'amasa pwaiya.

10Ta Paulo 'isuluwa, ma 'oina 'ituluha ma 'i'atusapwaliya, ta 'igwae, “Sahena wa'ate'ateyoho. Yawasina 'imiyamiya.” 11Ta hewaliina sitoe haneheya mayawasina, ma weyahina siyaliyaya madouna. Coinega Paulo 'ihane hila ma beledi 'i'ehisihisiya ta si'aiya, ma 'oinega mahetenao sihehegwaegwae ta 'ana siga gona 'i'adaleya, ta 'itoholowa ma 'i'ebesinediya.

Tilowasi 'oinega 'a'adau Milito weyahina

13Ma tauma wagega 'ageluwa ma 'a'u'eya Asosi, ta 'abehega nage 'oina Paulo 'ado'o, weyahina 'ihepwaila 'oima, 'igwaeya, “Wagega watauya, ma taugu 'aheguwega yatau Asosi, ma nage 'oina wado'ogau.”

14Ta Asosi 'ilatu pwaiya ma 'ahelobaloba, 'oinega 'ado'oya ta 'a'u'e hila, ma Mitiline 'oina 'asohota. 15Eeta Mitiline 'a'ebesineya, ta gona 'i'adaleya Kiyo matana 'apilipili. Eeta gona 'i'adaleya ma Samo 'oina 'asohota. Ci'adaleya wete, Milito 'oina 'asohota.

16Paulo 'ihegwae pwaimaiya ta 'abehega Epeso 'a'ebesine, ma 'abehega sahena wete tuta 'iuleule Esiya tupwainao 'oidiya, weyahina nuwanuwana ma 'ilomwayamwayau, 'eguma sowasowahina Yelusalema 'iloba Penitikosi* Guyaina 'ana sabwelo 'oina.

Paulo 'ina gwae loyauwedo meEpeso 'oidiya

17Ta Mitilo 'oinega 'ihewasa Epeso hekalesiya 'ana tohanugetao 'oidiya ma sinaoma. 18Ta sitauya pwaima 'oina ma Paulo 'ihegwaediya, 'igwae, “Comi wasanasanapu mumugagu tutaina tamiyamiya ba'idagwao Esiya 'oina, 'igu latu hohau 'oinega 'ana siga nige, 19beno 'ida Bada weyahina yapaipaihowa, hohobigega, ta ma'igu dou, ma muyao wete yalobediya meYudiya 'idi loinega, 20ta hesi geya 'aigeda to'aha 'ida Bada tetelina bwebwe'ana 'ana hepwaila yanuwahi, ma hesi mabwaiyami yahe'itegomiya 'imi tapwalolo 'oidiya, ta wete 'imi hada 'aigeda 'aigeda 'oidiya, 21ta 'igu he'ita 'oimiya tuwa mahemahetena, 'omi meYudiya, ma 'omi hali tupwa tomotaiyao, mabwaiyami yaguguya 'oimiya ta 'abehega mumugami galadi 'oidiyega wanuwabui Yehoba 'oina ma Bada Yesu wahemise.

22“Ma bewa tuwa Yaluyaluwa Tabuna 'ina loinega yatautau Yelusalema, ta geya tasanapu to'aha nata nobwa 'oiguwa 'ilatu. 23Beno tuwa 'asa 'aigeda 'aigeda 'oidiya, Yaluyaluwa Tabuna 'ihehepwaila 'oiguwa 'abehega 'abwa Yelusalema 'oina pai ma muya yalobadi.

24“Ta geya hene yawasigu weyahina yanuwanuwatuhu ma yanuwahi. Beno tuwa 'igu 'eda nuwana 'igu paihowaina Bada Yesu 'i'ebwaegauwa weyahina yanuwanuwatuhu ta 'abehega yalosalohi, beno 'ada helau Yehoba 'oinega 'ana hepwaila.

25“Wanuwatuhuyahi mwalo tuta baibaiwana 'oidiya 'asakosakowasi 'oimiya, ta Yehoba 'ina hetoloina tetelina weyahina yalologuguya. Ma bewa wahesagohe, 'abwa nata geya wete wa'ite'ite hilegau.

26“Coinega bewa tuwa yahepwaila 'oimiya 'abehega Yehoba 'ina loinao mabwaiyadi ya'ebwaya pwaigomiya, ta geya 'aigeda yadahwa. Ta 'eguma tupwami 'oimiyega wahesilae hataya, beno taugu geya 'igu puiyega, ta hesi waboi 'imi pui.

28“Coinega tohanugetao 'omi waboi wa'itayahigomi, ta 'imi sipiyao wete wa'itayahidi, weyahina Yaluyaluwa Tabuna 'imi paihowaina 'i'ebwaegomiya ma tohekalesiyao walomata yahidi, weyahina 'ida Bada Yesu tomotaiyedi taudi bweyahinega 'igimwanediya.

29“Yasanasanapu wete nata 'igu tauya mulina tohe'itao galadi, gide 'edewa sasasasaidi, sinaoma ma 'imi sipiyao si'abihe galadi. 30Ta wete 'omi nata 'oimiyega tupwadi sihegaina ma sihe'ita 'abo'abo 'oimiya, ta tupwana tomota silisidi taudi 'idi bodao 'oidiya. 31Coinega walomatayahi ta wete 'igu guguya wanuwatuhuyahi, 'abehega bolime 'etoi geya ya'aiyawasi, sabwelo ma hinuwana 'oidiya, ma hesi mamataneugu yaguguguguya 'aigeda 'aigeda 'oina.

32“Wete yahenuwa lagugomi tuta sinaonaoma weyahidi, 'abehega Yehoba tauna 'i'ita yahigomi, ma wete tauna 'ina helau tetelina 'i'abihe pa'aligomi, ma 'oinega 'ina bodao, taudi 'i'abihe 'ehaudiya 'oidiya, 'omi wete waluhu.

33“Mwalo taugu ba'idamiu tamiyamiya, geya nuwanuwagu 'imi wasawasao, nuwana mane, nuwana 'ale'o 'ausaladi, 34ma hesi wasanapu pwaigauwa 'abehega taugu 'igu paihowega 'aguwa ta 'igu tobwatobwa yalobedi, ta 'igu 'ali'eyao wete ya'abi'abihetedi. 35Mumugagu bewa 'oidiyega yahe'ita pwaigomiya 'abehega 'ilobwainegita ma tauda 'ida paihowega towe'a ta'abihetedi. Gidemusa Bada Yesu 'ina gwae wanuwatuhuyahi, beno 'igwaeya, 'Cewamo geya yaliyayenamo, ma 'ebwaya hesi mayaliyayaina madouna.’”

36Paulo 'ina gwae bewa 'igumwala ta 'ahena 'itulaseya, ma mahetenao si'ahwa'ahwanoi Yehoba 'oina. 37Ta mabwaiyadi sidouwa, ma Paulo si'atusapwaliya, 38ta sinuwagala madouna weyahina 'ihegwaediya, 'igwae, “Cabwa gesowana wa'ita'ita hilegau.” Coinega sidobiheya wagai, ta sihegeluya.

Copyright information for `BDD