Acts 21

Paulo 'ina tauya Yelusalema

Ma Paulo mahetemai, 'iyamayaowedi 'aloyauwedowediya ma 'a'u'e dumwaluna ta Kesa 'oina 'asohota. Gona 'i'adaleya 'a'u'e hila ta Lodi 'oina 'asohota, ta hali sabwelowa 'asohota Patala. Ta Patala 'oina waga 'alobeya sabi habala Pinisia, ma wagaina 'oina 'agelubala ta 'apilipili ni'uwa. Ta Saipilosi 'alatuwa, ma 'oinega 'ima 'ebeulega 'apili hataya, ta Siliya weyahina 'apilipili, ma Taiya 'oina 'asohota ma 'abehega waga 'ana do'odo'ona tupwana sihegubalidi. Ta tupwana Yesu 'ana tohemisao 'alobediya ta mahetemai 'amiyamiya sabwelo sebeni, ma Yaluyaluwa Tabuna sanapu 'iyamayaowedi 'i'ebwaediya, 'oinega Paulo sihegwaeya, sigwae, “Sahena 'ulagalaga Yelusalema.”

Ta 'oinega 'ima sabwelo nobwa sigumwala, ma 'agogona 'adobiya wagai, ma taudi mamwanediyao ma manatudiyao sidobihemaiya 'asa papalina, ta holai 'ahema 'atulaseya ma Yehoba 'oina 'ahwa'ahwanoi. Coinega 'aloyauwedowediya, ma 'ageluwa wagai, ta taudi sihila 'asai.

Ma Taiya 'a'ebesineya ta 'a'u'e hila, ta Tolimei 'oina 'asohota, ma 'asuluwa, ta 'oinega tohekalesiyao 'alobediya ma 'aloyauwedowediya, ta sabwelo 'aigeda mahetemai 'amiyamiya. Ta gona 'i'adaleya 'atauya Sisaliya, ma 'aluhuwa Pilipi 'ina hada, tauna mwalo tologuguya site sebeni 'aigeda 'oidiyega, ta mahetemai 'amiyamiya. Ma Pilipi natunao site hata mewahinedi, ta geya sihai, ma 'idi paihowa gide palopita ma Yehoba 'ina nuwatuhu sihepwaila nugeta tomota 'oidiya.

10 Ta sabwelo tupwana 'oidiya 'amiyamiya, ta 'aigeda palopita, sanina Agabu, Yudiyega 'isuluma, 11 ta 'oima 'inaoma, ta Paulo 'ana gadiwana 'i'eweya, ta 'ahena ma nimana 'iboi 'ipaidiya, ta 'igwae, “Yaluyaluwa Tabuna 'igwae gide: Toni gadiwana bewa meYudiya Yelusalema 'oina nata sipai, ma si'ebwae taudi ganamuli 'oidiya.” 12 Tauma ma 'asaina 'ana tomiyao gwae bewa 'ahesagoheya ma Paulo 'a'ahwanoiyeya, 'agwae, “Sahena 'uhanehane Yelusalema.”

13 Ta Paulo 'ihegwaemaiya, “Sahena wadoudou ma wahehe 'ateyohogau. Yatagwala pwaigauwa ma silagugau deliya, nuwana silohe 'amasigau Yelusalema 'oina, Bada Yesu weyahina.”

14 Ta 'a'etobode 'asaeya ta 'alolaguwa, ma 'agwae, “Causala beno, to'aha 'ida Bada 'ina nuwatuhu gidemusa 'ida paihowa.”

15 Sabwelowedi sigumwala, ta 'ima tobwatobwa 'a'atububuwa, ma 'ahane Yelusalema. 16 Ta tupwadi Yesu 'ana tohemisao Sisaliya 'oinega mahetediyao 'atauya, ma sitauyemaiya Nesoni gwama Saipilosi 'ina hada, tauna Yesu 'ana tohemisa nugenugetaina 'aigeda, ta 'abehega 'oina 'amiyamiya.

Paulo ma Yemesa sihelobaloba

17 Ma Yelusalema 'oina 'alatu pwaima, ta totapwalolowao siloyauwedomaiya ma'idi yaliyaya. 18 Ta gona 'i'adaleya ta Paulo ba'idamai 'atauya Yemesa 'ina hada, ta nobwa tohekalesiyao 'idi tohanugetao 'alobediya. 19 Ma Paulo 'igwae helauwediya, ta 'ina guguya ma Yehoba 'ina paihowa tomiya ganamuli 'alodiya weyahina 'ihe'ote'otetela bwaibwaina 'oidiya. 20 Ta mabwaiyadi sihesagoheya ma Yehoba sihepwatuweya, ta sihegwaeya, sigwae, “Tasimai, 'u'ita tausani baibaiwana Yesu 'oina sihemisa pwaiya, ta baibaiwadi tohemisaedi meYudiya, ma Mosese 'ina loina simulimuliya. 21 Ta wasau sihesagoheya 'abehega 'owa 'ino he'ita meYudiya 'oidiya, taudi 'asa ganamuli 'adi tomiyao ba'idadiyao simiyamiya 'abehega 'uhehe'itadi meYudiyaedi ma Mosese 'ina loina silogwahate, ma sahena natudiyao meloheyadi 'wapidi si'upwa'upwa, ma tubudao mumugadi sahena simulimuliye. 22 Nata sihesagohe 'abehega 'utauya pwaima, ta sigamwasowalego. Coinega to'aha tapaihowa 'ese?

23 “Cima nuwatuhu bewa gide: Loheloheya site hata 'ima boda 'oinega Yehoba 'oina sigwae hemisa pwaiya. 24 Coinega 'owa mahetediu wa'abihe 'ehaugomi ma watauya Hada He'asisi 'oina, 'abehega debadi si'oli ma sipwaoli Yehoba 'oina, ta 'imi paihowaina 'ana maisa mabwaiyana 'owa 'ulagu, ma bewa 'oinega tomota mabwaiyadi sisanapugo 'abehega 'owa Mosese 'ina loina 'umulimuliya, ta hesi 'ahwa galagalaedi weyahiu sihesagohediya, mabwaiyana gwae bwagabwaga.

25 “Ta Yesu 'ana tohemisao tupwa ganamuli 'oidiya, taudi geya meYudiya, 'idi leta 'ahetune pwaiya ta 'abehega to'aha gide tomota sipwaopwaoliyedi hali 'ebe hemisao 'oidiya sahena si'ai'ai, ta wete hebai mabweyahidi ma hebai 'ani'o didididi sahena si'ai'aidi, ta wete sahena siganaganawala.”

26 Coinega Paulo 'idi gwae 'ihesagoheya, ta hali sabwelowa site hataedi mahetenao sitauya ma si'abihe 'ehaudiya. Cigumwala ma Hada He'asisi 'oina 'iluhuwa, ma Pauloina topwaoli 'ihegwaeya, 'igwae, “Tauma 'agwae hemisa pwaiya Yehoba 'oina ta sabwelo sebeni 'ima 'abihe'ehau 'igumwala, ta 'oinega 'ahilama ma yapwaoli tauma weyahima.”

Paulo si'abiyahiya

27 Ta 'idi sabwelo sebeni 'i'iuna ma sigumwala, 'oinega meYudiya taudi mwalo tupwa Esiya 'oinega sinaoma, Paulo si'iteya Hada He'asisi 'alona, ma boda sihenuwa laguwediya, ta si'abiyahiya, 28 ta siwuiwui, sigwaegwae, “MeIsileli he, wanaoma ma loheya bewa wa'ita, tauna tomota tupwa mabwaiyana 'oidiya 'ihe'ita puidiya, 'abehega 'ida boda sisinasinaligita, ta 'ida loinao ma 'ida Hada He'asisi sisinalidi, ma wete Hada He'asisi bewa 'i'abihe ginaula bwagebwageya, weyahina tupwa ganamuliyega, taudi geya meYudiya, 'i'ewedima 'alona.”

29 Cidi gwae bewa weyahina mwalo gwama Epeso, sanina Tilopimo, Paulo mahetena 'asai si'iteya, ta sinuwatuhuya 'abehega Paulo Tilopimoina 'i'eweyama Hada He'asisi 'alona.

30 Bewa weyahina meYelusalema mabwaiyadi sigamwasowala, ma sihedagadaga, sipili hegogonama, ta Paulo si'abiyahiya, ma Hada He'asisiyega silisi latuweya, ta 'ana 'ahwa'eda siguduya, 31 ta sitohotoho sabi lohe'amasina. Coinega boda 'aleha 'ana tohanugeta wasa 'ihesagoheya 'abehega meYelusalema mabwaiyadi sihehedagadaga besobeso. 32 Ta 'ilomwayamwayauwa, ma tolo'alehaowedi ma 'adi tohanugetao 'i'ewediya, ma boda 'oidiya sipili suluwa. Tutaina boda si'itediya tolo'alehao ma 'adi tohanugetao sinaonaoma, ta Paulo 'ana hunuwa silolaguwa.

33 Coinega boda 'aleha 'ana toloinaina 'idobima ma Paulo 'i'abiyahiya, ta 'iloina ma balae seni 'eluwa 'oidiyega sipaiya, ma 'ihesilala boda 'oidiya, 'igwaeya, “Taiya tauna? Ma to'aha 'ipaihoweya?” 34 Ta boda siwui, 'idi gwaeyao hagadi ma hagadi, ma geya sowasowahina ma 'ihesagoha bwaibwaini, wui sinabwana weyahina, ta 'iloina 'abehega tolo'alehao 'idi hada sitauye.

35 Sitauyeya, ta boda sigamwasowala hedada ta simulimuliyedi, ma siwuiwui, “Walohe'amasiyamo.” Coinega tolo'alehao Paulo si'ahaliya tete 'oinega ta hada 'alona, tomota 'idi 'ohe weyahina.

Paulo 'ina gwae boda 'oidiya

37 Ci'iunamo ma sitoe hada 'alona, ta Paulo boda 'aleha 'ana toloina 'i'ahwanoiyeya, 'igwae, “Sowasowahina gwae 'aigeda 'oiuwa yagwaene?” Ta toloinaina 'isalutuwa, ta 'igwae, “Ca! Tomada! Cena Gilisi 'usanapuya? 38 Cigu nuwatuhu 'owa gwama Itipitaina, tauna mwalo 'inaoma ta tolohe'amasa powa tausani 'ihegogonediya 'aleha weyahina, ta 'ihanugetediya yoho 'awawa.”

39 Ta Paulo 'igwaeya, “Geya. Taugu gwama Yudiyaigu, ta 'igu 'asa Tasisi, tupwa Silisiya 'alona, 'asaina 'asa madouna. Ma sowasowahina 'utagwalegau ma tomota 'oidiya yagwae?”

40 Citagwaleya, ta Paulo teteya 'itoholo, ma nimana 'i'abilagasiya ma silolagu, ta 'oinega mabwaiyadi silolaguwa, ta Paulo 'ena Ibeliuwega* 'ihegwaediya, 'igwae.

Copyright information for `BDD