Acts 27

Paulo 'ina 'adau Loma weyahina

1Ta siloina pwaiya 'abehega Itali 'oina 'atauya, 'oinega Paulo ma tupwadi paipaidi wete ba'idanao sitagwalediya Sisa 'ina tolo'alehao 'adi tohanugeta 'oina, sanina Yuliyasi, ma 'ane 'ima 'adau 'oina 'i'itayahidi.

2Eeta Adilamitio 'oina wagega 'agelu, tauna wagaina 'i'iuna 'ipili Esiya 'asaidi gadowaidi 'oidiya, ma 'a'u'e, Alisitako ba'idamai, tauna gwama Masidoniyana, tupwa Tesalonaika 'oinega. 3Gona 'i'adaleya ta Saidoni 'oina 'asohota, ta Yuliyasi Paulo 'i'atemuyamuyaeya ta 'itagwaleya ma 'itauya 'iyanao 'oidiya, ma si'itayahi. 4Ta Saidoniyega 'a'u'e hila ta Saipilosi gwahunega 'apili sakowasiya, weyahina Saipilosi matanega yaumai 'itowa bodemaiya. 5Ta Silisiya ma Pamipiliya 'idi bwagabwaga 'a'ebesinediya ta Maila 'asohota, tupwa Lisiya 'oina.

6Nage 'oina tolo'alehao 'adi tohanugetaina 'ilobeya 'aigeda Alekisanidela wagana, 'i'iuna ma 'i'u'e Itali weyahina, ta 'oina 'agelubala. 7Ta sabwelo baibaiwana 'ima 'adau mwauna, ta Nidasi deina 'alatuwa, ta geya sowasowahina ma Nidasi matanega 'adumwalu, weyahina yaumai madouna matamega, 'oinega 'asuluwa Kiliti ma Salimoni gamwagamwanidiyega 'asola, ta Kiliti guinega 'asakowasiya. 8Ta 'oye'oyega 'a'u'eya, ma yaumaiina tuwa 'i'ewe'ewemai ta tuwa 'atauyama 'alo 'aigeda sanina Calo Daumwala 'oina, gogo Lasiya holaina deina.

9Ma tuta dudulena 'auleya, ta hudi* 'ana tuta 'igumwala, ma yaumai 'ana tuta galana 'ihegaina pwaiya, 'oinega Paulo 'ihenuwa laguwediya, 10'igwae, “Babadao 'ilobwaineya ma ta'aiyawasi 'alo bewa 'oina. Sahena tatohotoho ma ta'ada'adau hila, tabu ta tahesilae, ma tobwatobwa ma waga tamudalidi, ma wete tauda ta'amasa.”

11Ma tolo'alehao 'adi tohanugeta 'ihesagohediya toniwaga ma waga 'ana to'eyaisa 'enadi, ta geya Paulo 'ina gwae weyahina 'ida nuwatuhuwa. 12Ma 'aloinaina 'oina simiyamiya geya 'ilobwaine bolibolime 'ana tuta, ta baibaiwadi sigwae, “Tuwa tatoho, ma 'eguma sowasowahina Pinikisa 'oina taluhu, weyahina tauna 'alo bwebwe'ana, ma 'oina ta'aiyawasi.” Ta Pinikisa 'oina 'alo 'aigeda, beno bwanabwana Kiliti 'oina, ma 'ebesola yalasi ma yalata 'ilobediya.

Wediliya silobeya

13Ma yalasi 'i'iuna 'itowama, ta sinuwatuhuya 'abehega nata si'adau bwaibwaina ma Pinikisa siluhu, ta 'idi loho sitabeiya ta Kiliti deinega sipiliya 'oye'oyega. 14Ta tuta 'i'iuna ma yaumai madou hedadena sanina Bomatu 'itowadobima, 15ta waga geya sowasowahina ma 'ipili, weyahina yaumai matamega 'itowatowama, ta tuwa 'ibibini hilemai, 16ta bwanabwana sanina Kiloda gwahunega 'a'ada'adau, ta 'ahewaiwaiya ta waga 'ebe talalaga 'alisi lagasiya, 17ta balae si'eweya ma waga madouna simomosiya, ma simatauta, nuwana nenegwala sanina Silitisa 'oina siduna, ta 'ole'ole siulisiya ma tuwa 'a'aha'ahai.

18Ta wediliya madouna waga 'i'ahu'ahu buibui hedadeya, ta gona 'i'adaleya ta waga 'ana do'odo'ona si'eula suluhediya. 19Ma sabwelo hetoina 'oina waga 'ana tobwatobwao si'ewediya ta siula suluhediya.

20Ma sabwelo baibaiwana 'oidiya geya hala bo 'ipwala 'ada 'itediya, ta wediliya madouna 'imutumaiya, 'oinega 'asanapuya 'abehega nata 'a'amasa.

21Ma sabwelo baibaiwana 'oidiya waga 'ana togeluwao geya si'ai, ta Paulo gamwagamwanidiya 'itoholowa, ma 'igwaeya, “Tasigwao, 'eguma 'igu gwae wada hesagoheya, ma sahena Kilitiyega tada gelugelu, gesowana mwau ma hesilae bewa talobaloba. 22Ta bewa yaguguyegomi wa'atepatu, sahena 'aigeda 'oimiyega 'i'ama'amasa, ma wagamo hesi 'abwa 'idamana, 23weyahina hinuwana 'igu Yehobaina, tauna yahemiseya, 'ina anelose 'inaoma ma deiguwa 'itoholowa, 24ta 'ihegwaegauwa, 'Paulo, sahena 'u'ate'ateyoho; 'abwama Sisa matana 'utoholo, weyahina 'ino 'ahwanoi 'oinega waga 'ana togeluwao mabwaiyadi mahetemwao Yehoba 'i'abihetegomi.’ 25Ma tasigwao, sahena wa'ate'ateyoho, weyahina Yehoba yahemiseya, ma nata 'ipaihowa gide tuwa 'ihe'itegauwa. 26Eema bwanabwana 'aigeda 'oina taduna.”

Waga 'iduna

27Wiki 'eluwa sigumwala, 'abwa hene Ediliya ni'una 'idoedoe dadanemai, ma nihuwana gamwana waga 'ana topaihowao sinuwatuhuya 'abehega 'oya'oya deina 'alatulatu. 28Ma ni'u siloho tohotohoya ta silobeya 'ana saliyana gide tuweniti lihe 'ana saliyana. Ta tupwana 'ahedoe naowa ta wete siliheya ta silobeya ni'u saliyana gide pipitini lihe. 29Ta simatauta tabu ma da'ule 'oina 'aduna, ta waga yiuwega loho 'ehata siulediya, ma si'ahwa'ahwanoi gona 'ada'adale weyahina.

30Ta tupwadi wagaina 'ana topaihowao nuwanuwadi ma wagega sidena, ta waga 'ebe talalaga siulasuluheya holai, ta si'abowa 'abehega loho wete siule waga matanega. 31Ta Paulo tolo'alehao ma 'adi tohanugetao 'ihegwaediya, “Ceguma loheloheya nage wagega sidena, nata geya'abwa tabwebwebwe'ana.” 32Ta tolo'alehaowedi waga 'ebe talalaga 'ana balae si'upwa yahuleya ta 'idoeya.

33Ta 'i'iuna ma gona 'i'adale, ta Paulo 'ihegwaediya ma si'ai, 'igwae, “Sabwelo potini 'ateyoho weyahina ta geya wete 'e'ahai wada lotohoya. 34Coinega 'ilobwainegita ma talohepa'ala, weyahina sahena hesi 'aigeda 'ihehesilae.”

35Ma gwae bewa 'igwaeneya ta beledi 'i'eweya ta weyahina 'iloyauwedo Yehoba 'oina, mabwaiyama matama, ma 'ihisiya, ma tauna 'i'ai nugeta. 36Ta 'oinega mabwaiyama nuwama 'ibwebwe'ana, ta wete 'a'aiya. 37Ta 'ama baibaiwa wagaina 'oina 'ageluwa beno tu handeledi ma sebeniti sikisi. 38Eema 'amwausuwa, ta pwalawa waga 'alonega siuleya holai, ma 'abehega waga 'imalamalai.

39Ta gona 'i'adale pwaiya ta 'oya'oya si'iteya, ta geya si'inana to 'asa, ma 'alo namonamoina si'ita lobeya, 'oinega sinuwanuwatuhu 'eguma sowasowahina wagaina silagahe 'aloina 'oina. 40Ta loho si'upwa yahuleya ma ni'uwa si'abi sinediya, ma wete 'eyaisi 'ana balaeyao silihasidiya ma si'eyaisa, ma 'ole'ole 'ai matana si'u'eya ma si'u'e 'oya'oya weyahina.

41Ma 'alusa 'idoemaiya ta waga 'aheduneya namonamo 'oina, ta waga 'abusuna 'iduna ma geya sowasowahina 'ilonihu, ma gwahuna bagodu 'idi lasa hilehilega ta 'ipisaliya. 42Ta tolo'alehao sinuwanuwatuhu 'abehega paipaidi silohe'amasidi tabu ma tupwadi situbehane 'oya'oya ma sidena. 43Ta 'adi tohanugetaina nuwanuwana ma Paulo 'i'abihete, 'oinega 'i'ausidiya, 'abehega sahena silolohe 'amasidi. Ma hesi 'iloinaedi taudi sowasowahidi ma sitube nugeta ma 'oya'oya weyahina sitube, 44ma tupwama wagaina tupwatupwana 'oidiyega 'atube laga, ta mabwaiyama ma'ima bwebwe'ana 'atube haneya 'oya'oya.

Copyright information for `BDD