Acts 28

Cima miya Melita 'oina

Ta 'agayo haneya 'oya'oya, ma bwanabwanaina 'ana tomiyao sihepwaila 'oima 'abehega bwanabwana sanina Melita. Ma bwanabwanaedi sihelauwemaiya madouna, ta 'aiwe siholeya, ma mabwaiyama sibwauwemaiya ta 'amwaimwailu, weyahina 'i'wesu'wesu ma gogai wete.

Ma Paulo 'aiwe 'idomweyama, ta 'aiwe 'oina 'ilagu balediya, ma yahiyahi weyahina ta mwata newanewalina 'ilatuma, ta Paulo nimana 'inaliya.

Ta bwanabwanaedi si'iteya Paulo nimana mwata 'isanasanana, ta sihehegwaegwae siboidimo, sigwaeya, “Moisa tuwa, loheya nage tolohe'amasa, ma geya sowasowahina loinega 'iboi 'i'abihete. Bwagana damanega 'idenama 'oya'oya, ma wa'ita mwata 'inaliya.”

Ta Paulo mwataina 'ilosepaleya 'aiwe ninininimina 'alona, ma geya muya 'ilolotoho. Ta bwanabwanaedi Paulo si'e'ebubuya ta 'idi nuwatuhu nata nimana 'iseseha, nuwana 'itai ma 'i'amasa, ma siyamwayamwa, ta Paulo geya wete 'aigeda to'aha 'i'ewa'ewa, 'oinega 'idi nuwatuhu sibuiya, ta sigwae, “Loheyaina 'aigeda yehoba.”

Bwanabwanaina 'ana bada sanina Pubiliyasi, ta 'ina 'asa tupwaina deina 'aluhuwa, ta Pubiliyasiina sabwelo 'etoi 'oidiya 'i'itayahi bwaibwainimaiya.

Ma tutaina 'oina Pabiliyasi tamana hadai 'i'eno'eno ma'ina lohala, ta 'ina lohala yahiyahi ma gamwa pilipili. Ta Paulo 'iluhuwa 'oina, ma weyahina 'i'ahwanoiya Yehoba 'oina, ta wahina 'i'abi tohoya ta 'i'abihe bwebwe'aneya.

Ta bwanabwanaedi mabwaiyadi taudi ma'adi lohala sinaoma Paulo 'oina, ma taudi wete 'i'abihe bwebwe'anediya. 10 Coinega helau baibaiwana si'ebwaemaiya, ta 'ima tuta gelu 'oina, 'ama 'alai sowasowahima sido'oya.

Melitega ta Loma

11 Ta wai'ena 'etoi sigumwala ma Melitega 'agelu Loma weyahina, ta 'ima waga Alekisanidela wagana, matana 'ana tosamala didiluwaluwa loheyadi. Ma wagaina, mwalo wai'ena gogaiyedi 'oidiya bwanabwanaina 'oina 'iyamwayamwana 'ana siga yaumai madouna 'ilolaguwa.

12 Ta 'a'u'e ma Sailakiusa 'oina 'asohota, ta sabwelo 'etoi 'amiyamiya. 13 Nage 'oina 'asakowasiya Legiyami ta 'asohota. Ci'adaleya, ta yalasi 'itowama, 'oinega 'a'u'e hila, ta 'apilipili, ta sabwelo 'eluwa tuwa ma 'aluhuwa Putioli.

14 Putioli 'oina tupwana tohekalesiyao 'alobediya, ta sitoemaiya 'idi hada, ta 'oidiya 'amiyamiya sabwelo sebeni 'oidiya. Ta nage 'oinega 'atauya Loma weyahina.

15 Ma tohekalesiyao Loma 'oina tetelima sihesagoheya, ta sitauyama 'edai sihesohotemaiya tupwa Cebegimwane, sanina Apio ma Hada Taumana 'etoi 'oidiya. Ta tutaina Paulo 'iyanaowedi 'ilobediya, Yehoba 'oina 'iloyauwedowa, ma 'i'atepatu. 16 Nage 'oinega 'atauya ta Loma 'oina 'alatuwa, ta tolo'alehao Paulo sitagwaleya ma 'imiya wasi, ma 'ana to'itayahina tolo'aleha 'aigeda tuwa.

Paulo 'ina paihowa Loma 'oina

17 Ma sabwelo 'etoi sigumwala, ta Paulo meYudiya 'idi tohanugetao 'ibwau 'autedima. Sihapwesama ta 'ihegwaediya, 'igwae, “Tasigwao, taugu geya 'eta to'aha galana 'ida boda 'oidiya yapaihowa, nuwana mumugada tubudao 'oidiyega yaligeligehi, ma hesi Yelusalema 'oina si'ebwayaegauwa meLoma 'oidiya, ta deliya silagugauwa. 18 Ta 'igu yatala mulina meLomaedi nuwanuwadi ma silihasigau, weyahina geya 'aigeda 'igu pui siloba, ma 'abehega sida lohe'amasigau. 19 Ta meYudiya si'oheya gabana 'oina 'abehega sahena silihalihasigau. Bewa huhuna ya'ahwanoiya Sisa 'ina yatala weyahina, ta geya 'abehega 'ida bodao yahe'ewadi. 20 Ma hesi taudi 'idi he'ewa 'oiguwa weyahina yabwauwegomiya ma 'ane tahegwaegwae. Moisa tuwa tauda meIsileli tahehemisa 'abehega 'ada lema Yehoba 'oinega 'ilatuma, ta hemisaina bewa weyahina deliya silagugauwa.”

21 Ta meYudiyaedi sigwaeya, “Tauma geya 'aigeda Yudiyega leta weyahiu 'alobaloba, ma wete 'iyadao 'ebwa sinaonaoma geya sihepwailego 'abehega 'owa galau. 22 Ta hesi nuwanuwama 'ahesagohamo 'oiuwega to'aha 'ino nuwatuhuwedi, weyahina tupwa baibaiwadi tomota 'ino boda hekalesiya si'ahwa galegaleya.”

23 Ma sabwelo siupaeya, ma boda madouna si'eto'autama Paulo 'ina hada, ma gonegonega 'ana siga 'iboi 'oidiya 'iguguya, Yehoba 'ina hetoloina weyahina, ta Mosese 'ina loina 'oinega, ma palopitao 'idi gwaeyao 'oidiyega, 'ihe'itediya Yesu weyahina, ta 'itohoya ma 'abehega 'i'abihe 'asilaladi. 24 Ta tupwadi sihemiseya ma tupwadi sipa'ala. 25 Weyahina 'idi nuwatuhuwao hagana ma hagana, 'oinega sisawala.

Ta Paulo 'ina gwae 'ana 'ebelosaloha 'oidiya 'igwaeya, “Yaluyaluwa Tabuna 'ina gwae tubumiyao weyahidi gwae moisa, beno palopita Aiseya 'ahwanega 'igwaenediya:

26 'Cutauya ma tomotaedi 'uhegwaedi: Cabwa wahehesagoha, ma sahena nuwami 'isabwasabwalena. Ta wete tuwa wa'e'ebubuna, ma nata geya wa'ita'ita. 27 Weyahina tomota bewa sinuwapota, ma tenadi si'elotuiya, ta matadi si'elogibuwa, tabu ta matadiyega si'ita ma tenadiyega sihesagohe, ma sinuwa sabwalena, ma 'oiguwa si'ita hila, ma ya'abihe bwebwe'anedi.’”
28 Ta Paulo 'ina gwaeina wete 'iloheposeyaneya, 'igwae, “Wasanapu Yehoba 'ina hepwaila 'ada 'abihetena weyahina 'abehega 'ihewaseya taudi 'asa ganamuli geya meYudiya 'oidiya, ma taudi hesi sihesagohe.”

30 Ta Paulo 'ina hada nage 'ihehemaisa eeta 'oina 'imiyamiya bolime 'eluwa 'oidiya, ta tomota baibaiwadi 'ina hadaina siluhuluhu ma mahetenao sihe'iya'iyagu, 31 ta Yehoba 'ina loina weyahina 'iguguguyae ma 'ihehe'itae Bada Yesu Keliso weyahina, ta geya 'aigeda taiya 'itoho ma 'ina guguyaina 'i'ausi.

Copyright information for `BDD