Galatians 1

Loyauwedo

1Taugu Paulo Yesu Keliso 'ana tohepwaila 'aigeda, ta 'igu hetohepwaila geya tomota 'idi hesinuwega ma hesi Yesu 'ina hesinuwega, ma Tamada Yehoba wete 'ina hesinuwa. Tauna Yesu Keliso 'amasega 'igihetoholo hileya. 2Ma baibaiwadi tasidaowedi mahetegwao 'ebwa 'amiyamiya, 'imi leta 'ahewasaeyawa 'omi totapwalolo, boda 'aigeda 'aigeda tupwa Galetiya 'alona, 'oimiya.

3Tamada Yehoba ta 'ida Bada Yesu Keliso 'idi helauwega tuwa wamiya bwebwe'ana. 4Weyahina Tamada Yehoba 'ina nuwatuhu bewa gidemusa, eeta Yesu tauna 'itagwaleya ta 'i'amasa 'ida puiyao weyahidi, ma 'oinega tuta bewa galana 'ina waiwaiyega sowasowana 'i'abihetegita. 5Eeta weyahina Yehoba 'oina tada hepwatu hataya. Emeni.

Tetela bwebwe'ana 'aigeda tuwa

6Cebe nuwahenainaida bewa 'oiguwa, weyahina mwalo Yehoba 'ihesinuwegomiya ma 'abehega helau Keliso 'oinega waloba, 'oinega tetelinaina wahemisaeya, ma hesi walomwayamwayauwa bewa tuwa ta walogwahateya, ta hali tetela wahemisaeya. 7Moisa, Tetela Bwebwe'ana 'aigeda tuwa, ma geya wete 'eta tetela 'imiyamiya, ma hesi tupwana tomota sigihe'wanigomiya weyahina nuwanuwadi ma Keliso tetelina sigibuidi ma 'oinega si'abowegomi. 8Keliso tetelina wahesagohe nugeteya beno moisa, 'oinega geya'abwa 'aigeda taiya hali tetela 'ida 'ebwa'ebwaegomi. Tauma, bo aneloseyao galewega geya'abwa hali tetela 'a'ebwa'ebwaegomi. Ma 'eguma taiya tetela bwebwe'ana 'ilagubui nata mwau 'iloba Yehoba 'oinega. 9Mwalo 'ahepwaila pwaiya 'oimiya, ma bewa wete yahepwaila hila 'abehega 'eguma taiya hali tetela 'i'ebwaegomi, nata muya 'iloba Yehoba 'oinega.

10Togidega, tomota 'adi hepwatu weyahina yanuwanuwatuhu, bo Yehoba 'ana hepwatu? Ta 'eguma tomota 'idi nuwatuhu yapaipaihowa, geya sawasawahigu ma Keliso weyahina yahetopaihowa.

Paulo 'ina nuwabui

11Ciyagwao, wanuwatuhuyahi 'abehega tetela bwebwe'ana yahepwaileyawa geya tomota 'oidiyega, 12weyahina geya tomota 'idi hepwailao, nuwana 'idi he'itao 'oidiyega, ma hesi Yesu Keliso 'ina he'ita 'oiguwa 'oinega. 13Ta 'igu mumuga mwalo, tutaina meYudiya 'idi boda 'alona yamiyamiya, wahesagoheya, 'abehega Yehoba 'ina tohekalesiyao ya'abihemuya hedadediya ta nuwanuwagu yamutudi. 14Coinega 'iyagwao Yudiya 'alona yahewaiwai sinediya, weyahina tubudao 'idi mumuga weyahina yahetapewa madouna ta 'iyagwao 'idi hetapewa tupwana tuwa.

15Tutaina geya yatole, ma mwalo hene Yehoba 'ina helauwega 'ihesinuwa nugetegauwa, 16eeta tauna 'ina nuwatuhuwega Natuna 'oiguwa 'ihe'itaeya, ma yahetohepwaila weyahina tupwa ganamuli* 'oidiya. Coinega geya yatautauya tomota 'oidiya sabi hesilala tetela bewa weyahina. 17Geya yatauya Yelusalema Keliso 'ana tohepwaila nugenugetadi 'oidiya, ma hesi yatauya Alebiya, eeta nobwa yamiyamiya 'ana siga yalohihila Damasiko 'oina.

18Coinega bolime 'etoi mulina yahaneya Yelusalema ta Pita yahabo'eneya, eeta nobwa mahetegu sabwelo pipitini 'amiyamiya. 19Ma Keliso 'ana tohepwailao baibaiwadi geya ya'itadi. Beno tuwa Yemesa, tauna 'ida Badaina tasina. 20Cigu gwae bewa Tamada matana yaleleyawa, geya 'aigeda wete 'abo.

21Coinega Yelusalema ya'ebesineya ma yatauya Siliya ma Silisiya 'idi tupwa 'oidiya. 22Ta tutaedi 'oidiya Keliso 'ina tohekalesiyao Yudiya tupwanao 'oidiya manigu geya sida sanapuya. 23Beno tuwa teteligu sihesagoheya 'abehega “Tauna mwalo 'igihegihe muyegita, ma 'inuwabui pwaiya, ta tetelina mwalo 'i'etobodeya tuta bewa 'iloguguyaeya.” 24Coinega tohekalesiyaowedi Yehoba sihepwatuweya 'igu nuwabui weyahina.

Copyright information for `BDD