Hebrews 12

Toholo pa'ala weyahina

1Ma tohemisao baibaiwadi galewega si'e'ebubugita, ta sawasawahida ginaula mwaudi 'oidiyega ta'aisinedi, ma 'oinega tapili waiwai 'ebepiliina 'ana 'eda 'oinega, ta wete mumuga galadiyedi sipaipaigita ta'aisinedi. 2Ma wete Yesu 'oina talolo'italaga, weyahina Yesuina 'ida hemisa 'ana 'ebehegaina ta 'ana 'ebelosaloha. Tutaina Yesu bale'uwa 'imiyamiya 'isanapuya 'abehega 'abwa 'ebeyaliyaya madouna 'iloba, 'oinega kelose 'ina muyamuya 'i'alama'i'itaneya, mwadina wete geya weyahina 'inuwatuhu, ta 'ebelosaloha 'oina 'ihaneya galewa ta Yehoba 'ina 'ebeulega 'imiyatoiya.

3Yesuina wanuwatuhuyahi 'abehega 'i'alama'i'ita madouna togala 'idi lo'aleha 'oinega, ta 'oinega 'omi wete gide 'abehega sahena wahesabulolo nuwana wawe'awe'a. 4Ma 'omi tutaina mumuga galana walo'aleheya 'imi miyamwau 'i'iuna tuwa, ta geya sida lohe'amasigomiya Yesu gide. 5Nuwana guguya wanuwanaideya, guguyaina 'oina 'i'ahwa natunegomiya 'igwaeya,

“Natugu, 'eguma tutaina Bada 'ihemata sabuwego sabi 'abihe dumwalugo, bewa weyahina 'unuwanuwatuhu ma sahena wete 'uwe'awe'a.
6Weyahina 'eguma taiya Yehoba 'i'ahwa natune ta 'ihelauwe, sawasawahina ma sapi 'iloba 'ina puiyao weyahidi, ma 'oinega 'ida bwebwe'ana hila.”
7Ta 'eguma sapi waloba Yehoba 'oinega, tuwa wa'alama'i'ita, weyahina tama mabwaiyadi natudiyao sisapisapidi sabi 'abihedumwaludi. 8Coinega Yehoba wete mabwaiyada 'isapigita, ma 'eguma taiya 'owa Yehoba geya 'isapigo, beno weyahina 'owa geya natuna moisa, ta 'abehega 'owa 'aigeda tamabudabuda.

9Wanuwatuhuyahi 'eguma tamadao bale'uwa sisapigita ma 'oinega tahe'asisiyanedi, wete 'ilobwainegita ma yaluyaluwada Tamadiu galewa tahe'asisiyane, ma 'oinega yawasida 'ausalana 'i'ebwaegita. 10Weyahina tamadao bale'uwa taudimo 'idi nuwatuhu 'oidiyega sisapisapigita ma si'abi'abi hedumwalugita tuta to'uto'upanamo weyahina, ma hesi Yehoba 'isapisapigita 'ada lema weyahina ma 'abehega 'i'abihe 'ehaugita ma tada mumuga 'ausalana, tauna 'ina mumuga gide.

11Moisa, tutaina 'eguma bada 'aigeda 'isapigita tamuyamuya madouna ta geya'abwa tayaliyaliyaya, ma hesi 'eguma 'i'abihe dumwalugita 'abwa huwaina 'ausalana taloba, beno mumuga bwebwe'ana ma miya daumwala.

12Coinega 'imi we'a wa'ebesine ma wahewaiwai, 13ta 'imi 'eda wa'abihe dumwaludi, ma 'eguma toha'au'au sitautauya, sahena sibe'ube'u, ma hesi 'idi ha'au'auwedi sibwebwe'ana, ta taudi wete sihewaiwai.

14Watoho waiwai ma wamiya daumwala tomota ba'idamiyao, ta wete watoho ma 'imi mumuga 'ibwebwe'ana mabwaiyana, weyahina 'eguma taiya geya 'ina mumuga bwebwe'ana geya'abwa Bada 'i'ita'ita.

15Wa'itayahigomi 'amuge nata 'oimiyega taiya Yehoba 'ina helau geya'abwa 'ilobaloba. Ma sahena 'aigeda taiya 'oimiyega 'ihegaina ma 'imumuga galana, 'amuge ta baibaiwadi simuliye.

16Sahena wanuwanuwa 'ubuna, ta wete sahena Yehoba 'ina helau walologwahate, gide Iso* mwalo Yehoba 'ina gwaehemisa tauna weyahina ma 'ipeleya tasina 'oina, 'ana maisa 'e'ahai 'aigeda tuwamo. 17Ma wanuwatuhuyahi 'abehega tuta muliyetega Iso gwae hemisaina 'inuweya, ta weyahina 'idouwa, ta geya sawasawahina 'i'ewahila, weyahina tasina 'i'ewa pwaiya.

18Bewa tuwa wanaoma Yehoba 'ina tupwa, geya gide mwalo Mosese ma meIsileli ba'idanao sitauya ta silotohoya 'oya Sainai 'oina, weyahina 'aiwe ganinisa ma guguyou madouna ma hogahoga ta duba madouna, 19ma yoguli 'enana ma wete loheya 'enana 'oyaina 'oina, 'oinega meIsileli simatauta madouna, ta si'ahwa'ahwanoi ta 'abehega sahena 'enanaina sihehesagoha hila, 20weyahina loinaina sihesagoheya 'i'abihe matautediya 'abehega,

“Sahena 'aigeda to'aha 'oya bewa 'i'abi'abitoho, ma 'abehega 'eguma 'aigeda hebai 'inaoma 'oyaina 'oina, dimwega siloda'ule ma 'i'amasa.”
21Moisa, 'oyaina 'ebe matauta madouna, ta Mosese tauna wete 'imatauta, ta 'ihepwaila 'igwaeya,

“Cigu matautega yadedela.”
22Ta 'omi hesiyage wanao pwaima Saiyoni 'oyana 'oina, beno Yehoba tauna mayawasina 'ina 'asa, Yelusalemaina galewa 'oina, aneloseyao baibaiwa hedade simiyamiya ta siyaliyaliyaya gide guyai 'oina, 23ma wete wanaoma tomotaedi Yehoba 'i'ahwa natunediya, ta sanidiyao galewa 'ilelediya 'oidiya, ma wete tauna tauda ta ginaula mabwaiyana 'ada Toloina, beno Yehoba 'oina, ma wete taudi yaluyaluwadi Yehoba 'i'abihe dumwaludiya 'oidiya, 24ta wete Yesu 'oina, tauna loina hauhauna 'ana to'eheleina, ta bweyahina 'ana losehusehula 'oinega 'i'abihetegita, ma geya gide Ebeli bweyahina, weyahina beno 'ebehesilae.

25Coinega wa'ita yahigomi ma tauna galewega 'igwaegwae 'oida sahena 'enana walologwahate. Weyahina mwalo tomota tupwadi bale'uwa Mosese 'ina lohatoto 'oidiya silogwahateya, ta mwau silobeya. Ma bewa sauga Yehoba galewega 'ilologuguya 'oida, ta 'eguma 'enana talogwahate mwau madou hedade taloba.

26Weyahina 'enanaina mwalo bale'u 'i'abi nihuweya, ta bewa tuwa 'igwae hemisa pwaiya 'abehega,

“Cabwa bale'u ma galewa wete ya'abi nihuwedi ma'aigeda tuwa.”
27Bewa gide 'igwae 'esa weyahina ginaula hehemasalahadi 'ida 'abinihuwedi, ma 'oinega ginaulaedi geya sipa'ala sida be'u, ma ginaula pa'alidi sitoholo hataya.

28Bewa 'ida tupwa hauhauna 'oina taluhuluhu, waiwaina ma miyamiya hatayana, 'oinega sowasowana Yehoba 'oina taloyauwedo, ma talotapwalolo to'aha 'ina nuwatuhu 'ana lobwaina gide, ta wete tada he'asisiyane ma'ida matauta, 29weyahina 'ida Yehobaina 'aiwe ganinisa gide.

Copyright information for `BDD