Hebrews 2

Cabihetena Yehoba 'oinega

Coinega sawasawahida ma gwaeyedi tahesagohediya tanuwatuhu yahidi, ma sahena tanuwanuwa naidedi.

Mwalo aneloseyao Yehoba 'ina gwae sihepwaileya tomota 'oidiya, ma gwaeina gwae moisa, 'eguma tomota geya sida muliyediya, beno 'idi pui, ta 'ana maisa silobeya. Tauda wete 'eguma 'abihetenaina madounaina talogwahate, bwa'omatana taloba, ta geya sawasawahina tadenasine.

Gwaeina 'abihetenaina weyahina 'ida Bada Yesu 'ihepwaila nugeteya, eeta 'ina gwaeyao 'ana tohesagoha nugetao si'ebwaegita tauda.

Ma Yehoba wete 'ihe'ita 'abehega gwaeina gwae moisa, beno 'ila'ilala ma hedehedede ma paihowa waiwaidi 'oidiyega, ta wete Yaluyaluwa Tabuna 'ina heguyai 'oida 'oinega. Ma 'ina 'eheleyedi Yehoba 'ina nuwatuhu gide, ta Yaluyaluwa Tabuna ginaulaedi 'oida 'iheguyaiyediya.

Cada To'abihetena 'ina muyamuya

Cahegwae pwaigomiya tupwaina 'abwa taloba weyahina, ta Yehoba aneloseyao sahena 'idi loina 'i'ebwa'ebwaedi tupwaina 'oina, ma hesi tomota 'aigeda 'i'ebwaeya, weyahina Buki He'asisi 'oina 'ihepwaila 'igwaeya,

“Yehoba yo, to tomota tauna ta 'oinega weyahina 'unuwanuwatuhu? Ma taiya hede tomota natuna tauna 'u'ita'itayahi?
Coinega tuta to'uto'upanamo weyahina 'ulagu suluheya, aneloseyao gabulediya ma muliyetega 'ana 'amayaba ta 'ana hepwatu madouna 'u'ebwaeya. Ma waiwai wete 'u'ebwaeya ma ginaula mabwaiyadi 'iloinedi.”
Ma 'ina 'ebeloina ginaula mabwaiyana 'oidiya 'iloina, ta hesi geya sauga bewa, 'abwa hesi 'ihetoloina ginaula mabwaiyana 'oidiya.
Ma hesi Yesu ta'ita pwaiya, beno tuta to'uto'upanamo 'oina 'imiyasuluwa aneloseyao gabulediya ta muliyetega 'ana 'amayaba ta 'ana hepwatu madouna 'ilobediya 'ina muyamuya ma 'ina 'amasa 'oidiyega. Beno Yehoba 'ina helau 'oida, weyahina Yesu 'amasa 'ana muya 'ilotohoya mabwaiyada weyahida.

10 Yehoba ginaula mabwaiyadi 'ihemasalehediya tauna 'iboi weyahina, eeta nuwanuwana natunao baibaiwadi 'itoedima tauna 'ina tupwa wasawasa 'oina. Cilobwaineya ma Yehobaina 'ada To'abihetenaina 'i'abihe 'asilale. Bewa lamuna muya madouna 'ilotohoya, ma hesi tuwa 'i'alama'i'ita, ta 'oinega mumugana mabwaiyana dumwadumwaluna.

11 Yesuina 'ada To'abihetena ma tauda 'i'abi 'ehaugita, ta tauna ma tauda Yehoba 'oinega tanaoma, 'oinega geya'abwa Yesu 'ihemwadimwadina weyahida, ta hesi 'i'ahwa'ahwa tasinegita, 12 weyahina 'ina gwae tamana 'oina, 'igwaeya,

“Saniu nata yahepwaile tasigwao 'oidiya, ma 'eto'auta 'alona yahepwatuwego.”
13 Ta wete 'igwaeya,

“Yehoba 'oina 'igu hemisa yalagu.”
Ta wete 'igwaeya,

“Gwagwamaedi Yehoba 'i'ebwaegauwa ba'idagwao 'ebwa 'amiyamiya.”
14 Moisa tuwa, Yesu 'ina gwagwamao tauda tomota mahesiyoda ma mabweyahida, 'oinega Yesu wete 'iheloheya ta loheya wahina 'i'eweya ma 'i'amasa, ma 'abehega 'ina 'amasega Tomudulele* 'ilohesawali, ma Tomuduleleina 'ina loina 'amasa weyahina 'ilohesawaliya. 15 Ta wete 'amasa 'ana matauta 'ana pai waiwaina 'ida tuta mabwaiyana 'oidiyega 'i'abihetegita.

16 Cabiheteina geya aneloseyao weyahidi ta hesi tauda Ebalahamo tubunao weyahida. 17 Coinega Yesu 'iheloheya tauda tasinao gide, ta 'ihetopwaoli madouna ma'ina 'atemuyamuya weyahida, ma Yehoba 'ina paihowa 'oina 'ihetapewa, ta 'ipwaoliyeya 'ida mumuga galadi weyahidi ta 'abehega Yehoba 'inuwasamudi.

18 Ta wete Yesu bale'uwa miyamwau ta 'ebetohona baibaiwana 'ilobediya, 'oinega 'eguma Tomudulele 'itohogita Yesu 'ebetohowedi 'isanapu pwaidiya, ta sawasawahina 'oidiyega 'i'abihetegita.

Copyright information for `BDD