Luke 16

Caigeda to'itayahina galana

Wete Yesu gwae hegehegedi 'aigeda 'ana tomuliyao 'i'ebwaediya, 'igwae, “Loheya towasawasa ma'ina topaihowa, tauna 'ina wasawasa 'ana to'itayahina, ta 'aigeda tuta 'oina tupwadi loheloheya wasa si'eweyama towasawasaina 'oina, sigwaeya, ‘Bada, 'ino topaihowaina 'ino tobwatobwa 'ihehepaipaisiyedi.’” Coinega, towasawasaina 'ina topaihowaina 'ibwauweyama, ma 'ihegwaeya, 'igwae, “Hepwaila galadi weyahiu yahesagoheya 'oinega bewa tuwa 'igu tobwatobwa 'adi pepao 'u'ebwae hilegau, ma 'oiguwega 'ulatu.”

“Coinega topaihowaina 'inuwatuhuwa ta 'igwae, ‘Togidega nata yapaihowa 'esa, weyahina 'igu badaina 'ilogwahategauwa? Geya sowasowahina ma yatanoha paihowa, ma wete debamwadina 'eguma yatautauya tomota 'oidiya, 'e'ahai weyahina yalo'ahwa'ahwanoi.’ Cinuwanuwatuhu ma 'aigeda 'eda 'inuwalobeya, 'igwaeya, ‘Cehe, bewa gide yapaihowa 'ese ma 'oinega 'iyagwao baibaiwadi yalobadi, 'eguma paihowa bewa 'oinega yalatu.’ Eeta 'ina badaina 'ina tobukiyao 'ibwauwediya, ma 'aigeda 'aigeda 'oidiya 'ihesilala.

Loheya nugenugetaina 'oina 'ihesilala, 'igwaeya, ‘Hisa 'a buki 'igu badaina 'oina?’
Ma 'igwaeya, ‘Holowa 'adi baibaiwa handeledi yabukidiya.’ Coinega topaihowaina 'igwaeya, ‘Pepa bewa 'oina 'a bukiyedi 'uleledi ma pipitimo 'ulagu.’ Ma 'aigeda wete 'iluhuwa ta 'ihesilaleya, 'igwae, ‘Ma 'owa hisa 'a buki?’ Ta 'igwaeya, ‘Ce'ahai 'adi baibaiwa handeledi yabukidiya.’ Coinega tauna wete 'igwaeya, ‘Pepa bewa 'oina 'a bukiina 'ulele ma 'eitimo 'ulagu.’ Ma mabwaiyadi gide 'adi bukiyedi silagu suluhediya.

“Coinega 'ina badaina 'ina paihowa bewa wasana 'ihesagoheya, ma 'ihepwatuweya, weyahina mebale'u sihewaiwai 'idi wasawasa 'ana paihowa 'oina, ma hesi Yehoba 'ina bodao geya sihewaiwai 'idi paihowao 'asilala weyahina.”

Ta Yesu wete 'ihegwaediya, “Bale'u wasawasao galadi, ma 'eguma wasawasaedi 'oidiyega 'iyamiyao wahelauwedi, 'abwa taudi sihaesotegomi 'ebemiya hatayaina 'oina, tutaina wasawasaedi sigumwala.

10 “Weyahina 'eguma taiya ginaula 'i'iuna 'oina 'ihematamatana, wete ginaula madoudi 'oidiya 'ihematamatana. Ma 'eguma 'i'iudi 'oidiya 'i'abo wete ginaula madoudi 'oidiya 'i'abo. 11 Comi wete, 'eguma geya bale'u wasawasao weyahidi wapaihowa bwaibwaini, nata Yehoba geya'abwa wete wasawasa moisa 'i'ebwa'ebwaegomi. 12 Ma 'eguma 'iyamiyao 'idi wasawasa weyahidi geya wapaihowa bwaibwaini, gesowana wete Yehoba 'imi wasawasaina 'i'ebwaegomi.

13 “Coinega topaihowa geya sowasowahina ma 'ihetopaihowa bada 'eluwa 'oidiya, ma 'aigeda 'iguipaile ma hesi 'aigedamo weyahina 'ipaihowa, ma 'oinega 'aigeda 'i'ahwa bwebwe'ane ma 'aigeda 'i'ahwa galagalae. Coinega geya sowasowahina ma Yehoba 'ina paihowa ma wasawasa bale'uwa ta'abiluwedi.”

Palisiyao mumugadi

(Madiu 11:12-13; 5:31-32; Maki 10:11-12)

14 Saugaina Palisiyao gwaeina sihesagoheya ta Yesu silotuyaneya, weyahina taudi mane nuwanuwadi madouna. 15 Coinega Yesu Palisiyaowedi 'oidiya 'igwaeya, “Comi wanuwatuhuya 'abehega mumugami bwebwe'ana tomota matadiya, ma hesi galana mabwaiyana 'atemiya Yehoba 'isanasanapudi, weyahina ginaulaedi tomota nuwadi si'eweya, Yehoba 'ilogwahatediya. 16 Moisa tuwa, Mosese ma palopitao 'idi loinao 'oimiya simiyamiya 'ana siga Yoni to'abihebabitaiso 'inaoma, ma tuta nage 'oinega 'ana siga nige tetela bwebwe'ana Yehoba 'ina loina weyahina 'abwa 'ahehepwailedi, ma 'ebeloinaina weyahina tomota baibaiwadi ma'idi waiwai sitohotoho ma siluhuluhu. 17 Galewa ma bale'u 'idi sawala sowasowahina, ma hesi Mosese 'ina loinao bwagana 'i'iu sehenina, geya'abwa sigumwagumwala.”

18 Ma Yesu wete 'oidiya 'igwaeya, “Ceguma taiya loheya mwanena 'isa'ile ma 'ihaibala hali wahine 'oina, tauna 'ipui pwaiya, ma wete 'eguma wahine sa'isa'ilina 'ihaihila hali loheya 'oina, loheyaina tauna wete 'ipui pwaiya.”

Towasawasa 'aigeda ma Lasalo

19 Ma Yesu wete 'ihegwaediya, 'igwae, “Caigeda tuta 'oina towasawasa 'aigeda ma Lasalo simiyamiya. Towasawasaina 'ana 'ale'owao 'ausala hedadedi ma wete 'anao mabwaiyadi bwebwe'adi, 'oinega sabwelo 'aigeda 'aigeda 'oidiya ma'ina yaliyaya. 20 Ma Lasalo wewelohena ma lobwe'abwe'aina, 'oinega Lasaloina towasawasaina hada 'ahwa'eda 'oina 'imiyamiya, 21 ma 'abehega towasawasaina 'ana mugumuguna 'oinega 'ida 'ai. Ma Lasaloina bwe'anao tuta baibaiwana 'edewa siyamoyamosidi. 22 Ma tutaina Lasalo 'i'amasa aneloseyao sitoeya ta Ebalahamo deina silaguya tobwebwe'ana 'idi tupwa. Ma muliyetega wete towasawasaina 'i'amasa ma sigaliheya, 23 ma tauna ma'ina muya madouna to'amasa 'idi tupwa 'oinega 'i'ita haneya, ta Lasalo 'i'iteya Ebalahamo ba'idana simiyamiya. 24 Coinega 'ibwau madouna ma 'igwaeya, ‘Tamagu yo! Cuda 'atemuyemuyegau ma Lasalo 'uhewasaeyama ma we'aha gogaina nimanega memenagu 'i'abihegogai, weyahina tuta bewa yamuyamuya madouna 'aiwe 'ala'alata 'oina.’

25 “Ma Ebalahamo 'ihegwaeya, 'igwae, ‘Natugu, 'usanapuya 'abehega mwalo yawasiu mabwaiyana yaliyayamo, ma hesi Lasalo geya 'aigeda 'ebeyaliyaya 'iloba. Coinega bewa tutaina tauna ma'ina yaliyaya, ma 'owa 'umuyamuya. 26 Ma wete 'uda sanapu 'abehega gamwagamwanida sa'ala madouna 'imiyamiya, 'iwatahigita, 'oinega geya sowasowahina ma bewa 'oinega 'ahabalawa 'oimiya. Comi wete, geya sowasowahimi ma wahabalama 'oima.’

27 “Towasawasaina 'igwaeya, ‘Ee bwebwe'ana, ma benomo nuwanuwagu ma Lasalo 'uhewasae 'igu bodao 'oidiya, 28 ma tasigwao site nima 'ida hemataluwedi, tabu ma taudi wete sinaoma muya 'ina tupwa bewa 'oina.’ 29 Coinega Ebalahamo loheyaina 'ihegwaeya, 'igwae, ‘Tasimwaowedi 'adi tohenuwalagu simiyamiya, taudi beno Mosese ta palopitao 'idi gwaeyedi Buki He'asisi 'oina. Gwaeyedi 'alona sowasowahina ma tasimwaowedi sihesagoha bwaibwaini.’ 30 Ma hesi towasawasaina 'igwaeya, ‘Tamagu, beno geya sowasowahina. Ma 'eguma taiya 'amasega 'itoholohila ma 'itauya 'oidiya, ma tauna si'ita, 'oinega sinuwabui bwaibwaini.’ 31 Ta Ebalahamo wete 'igwaeya, ‘Ceguma Mosese ma palopitao 'idi gwae geya sihemisaedi, geya'abwa wete 'aigeda taiya sihehemisae, bwagana 'eguma 'aigeda to'amasa 'itoholo hila ma 'itauya 'oidiya.’”

Copyright information for `BDD