Luke 23

Yesu 'ina yatala Pailato matana

(Madiu 27:1-2,11-14; Maki 15:1-5; Yoni 18:28-38)

Coinega mabwaiyadi sitoholowa, ta Yesu sitoeya ta sitauyeya toloina madouna sanina Pailato 'oina, sabi yatalae.

Sitauyeya Pailatoina 'oina, ta Yesu weyahina sihepwaila 'abo'abowa, sigwaeya, “Loheya bewa 'ina he'ita 'ahesagohediya ta 'abehega tauma meYudiya 'ihawasiyemai, beno gide 'igwaeya, ‘Sahena Kini Sisa 'ana takesi walagulagu, weyahina taugu kiniina, ta To'abihetenaigu.’”

Coinega Pailato Yesu 'ihesilaleya, 'igwaeya, “Togidega, 'owa meYudiya 'idi kini, wa?”

Ta 'ihegwaeya, 'igwae, “Beno 'ugwae pwaiya.”

Ta muliyetega Pailato topwaoliyedi ta bodao 'ihegwaediya 'igwaeya, “Loheya bewa geya 'eta 'ina pui yaloba.”

Ma taudi tuwa sihe'ewa yahiya, sigwae, “Ci'abo'abowego beno, weyahina 'aloba pwaiya tomota 'i'abo'abowedi ma 'abehega gabemaniyao 'oidiyega 'iwatahidi. Weyahina Galili 'oina 'ihegaineya 'ina 'aboina, ta Yudiya tupwanao mabwaiyadi 'ilohegumwalidiya, ma 'ilatu pwaima tupwa bewa 'oina.”

Yesu 'ina yatala Helodi matana

Cidi gwae bewa Pailato 'ihesagoheya ta 'ihegwaediya, “Togidega tauna gwama Galili, wa?”

Ma taudi sigwaeya, “Cehe, gide.”

Coinega Pailato 'ihegwaediya, 'igwaeya, “Galili beno Helodi 'ina 'ebeloina, 'oinega Yesu watauye Helodi 'oina ma tauna 'iloinae, weyahina bewa tuwa Helodi 'ebwa Yelusalema 'oina 'imiyamiya.”

Sitauyeya Helodi 'oina, ta tutaina Helodi Yesu 'i'iteya 'iyaliyaya madouna, weyahina tuta dudulena Helodiina nuwanuwana ma Yesu 'i'ita, weyahina wasana 'ihesagoheya, ta 'ina paihowa waiwaidi nuwanuwana ma 'i'itadi. Coinega Helodi Yesu 'ihesilala hedadeya, ta geya 'aigeda wete 'ida hemaiseya.

10 Ta topwaoli madoudi ta loina 'ana tohe'itao silaga Helodi 'oina, ma Yesu sihehe'ewa tubatubali. 11 Ma 'oinega Helodi ma'ina tolo'alehao Yesu silolotuyaneya ta si'ahwa galegaleya. Ma muliyetega kini 'ana 'wama sihe'oteya ma sihesumane hileya Pailato 'oina. 12 Sabweloina 'oina Helodi ma Pailato 'idi hegamwagamwagu tuta dudulena 'oinega sihe'iya'iyaguwa.

Yesu 'ina 'amasa weyahina

(Madiu 27:15-26; Maki 15:6-15; Yoni 18:39-19:16)

13 Coinega Pailato Topwaoli Madoudi ma babada ta tupwana meYudiyaedi 'ibwau he'autedima, 14 ta 'ihegwaediya, 'igwaeya, “Loheya bewa 'oiguwa wa'eweyama ta wahepwaileya 'abehega tomota 'i'waniyediya, ta matamiya yaheyatala pwaiyeya ma geya 'aigeda 'ina pui yalobaloba 'imi he'ewaowedi 'oidiyega. 15 Helodi wete geya 'aigeda pui 'ilobaloba, ta 'oida 'ihesumane hileyama. Coinega geya wete lohe'amasa 'ilobwaine, 16 ma sapimo 'iloba, ma 'oinega yatagwala ma 'itauya.”

18 Coinega bodaedi mahemahetena sibwauwa sigwaeya, “Tauna 'i'amasa, ma hesi Balaba 'ulihasi weyahima.” 19 Balabaina lohe'amasa weyahina deliya silaguya, weyahina tupwaina 'oina mwalo Balaba ma'iyanao meLoma silo'alehediya, ta tupwana loheloheya silohe'amasidiya.

20 Ma Pailato nuwanuwana ma Yesu 'i'etolihasi, 'oinega boda wete 'ihesilalediya, 21 ma hesi taudi si'alamanimanini hedadeya, sigwaeya, “Kelose 'oina tatutu hepa'ine!”

22 Pailato 'ina gwae hetoina 'oina 'ihegwaediya, 'igwaeya, “To'aha hede 'ina pui ta 'oinega 'abehega 'amasa 'iloba? Weyahina geya 'eta wete galana 'oina yalobaloba. Ma hesi sapimo 'ilobwaineya ma muliyetega yalihasi.”

23 Ma hesi bodaedi tuwa 'abwa sibwaubwau hedahedade, sigwaegwae, “Kelose 'oina tatutu hepa'ine!”

Ta bodaedi 'idi gwae 'ihewaiwaiya,
24 'oinega Pailato 'oidiya 'itagwala ma Yesu sida 'abihekelose. 25 Ma loheyaina nuwanuwadi 'i'etolihasi weyahidi, tuwa 'i'etolihasiya, tauna tolohe'amasaina deliya silaguya mwalo tutaina tauna meLoma 'idi tohanugetao 'ilo'aleha 'oidiya. Coinega Pailatoina boda nimadiya Yesu 'ilaguya, ma 'idi nuwatuhuina sida losalohi.

Yesu kelose 'oina situtu hepa'iyeya

(Madiu 27:32-44; Maki 15:21-32; Yoni 19:17-27)

26 Yesu sitoe pwaiya ta sitauyeya, ma 'edai 'aigeda loheya sanina Saimoni silobeya, tauna gwama Sailini, pwatulega 'ilatuma ta 'itautauya 'asai. Coinega tolo'alehaowedi Saimoniina siloineya ta Yesu 'ana kelose 'i'ahaliya, ta 'imuliya.

27 Ma boda madouna Yesu simuliyeya, ma wete wahiwahine baibaiwadi simulimuliya, ma sidoudou ma'idi nuwagala Yesu weyahina. 28 Ma Yesu 'i'itahila ta wahiwahineyedi 'ihegwaediya, “Comi Yelusalema wahiwahinediyao, sahena weyahigu wadoudou, ma 'omi waboi weyahimi ma natumiyao weyahidi wadou, 29 weyahina tuta 'inaonaoma 'oina mwau 'ilatu ma taiyawedi 'omi 'aga'agalimi, nuwana geya natumimo, nata bwebwe'ana waloba. 30 Weyahina tutaedi 'oidiya 'abwa tomota 'oya 'oidiya sigwae, ‘Coya, wabe'uma ma wasamumai!’ 31 Moisa, taugu nata yahesilae, ma 'omi 'abwa wahesilae geyogeyoi. Weyahina taugu gide 'aiwe 'idahigu, ma 'omi tuwa gide 'aiwe 'ama'amasidi.”

32 Ma togala wete 'eluwa sitoediya ta Yesu ba'idanao silohe'amasidi. 33 Coinega 'aigeda tupwa 'oina silatuwa, sanina Mwagu, ma tupwaina 'oina kelose bale'uwa silaguya ma Yesu situtu hepa'ineya ma sihetoholoya, ma togalaedi siteluwa wete 'adi kelose 'oidiya situtu hepa'iyediya, ta 'aigeda Yesu 'ebeulanega, ma heluwena Yesu 'adigeyageyanega sihetoholodiya.

34 Coinega Yesu 'igwaeya, “Tamagu yo, 'idi pui bewa 'unuwasamudi, weyahina geya sisanapu to'aha sipaipaihowa.” Ma tolo'alehaowedi Yesu 'ana 'wama si'eweya, ta 'oinega si'eheyaheyaleya, tuwa gide siulahesinuwa, ma 'oinega 'eguma taiyawedi sinugeta 'wamaedi si'ewadi.

35 Nage 'oina tomota si'e'ebubuna, ta meYudiya 'adi tohanugetao Yesu silolotuyaneya, sigwaegwae, “Hali tomota 'i'abihetediya, ma hana bewa tuwa tauna 'ida 'abihete, 'eguma tauna To'abihetena Keliso Yehoba 'oinega.”

36 Tolo'alehaowedi wete Yesu silotuyaneya, ta waini memaina si'eweyama ta si'abihaneheya, 37 ma sigwaeya, “Ceguma 'owa meYudiya 'idi kini, 'u'etopelego 'uboi.” 38 Ma wete 'ana kelose pwatana 'ina 'amasa huhuna sileleya, 'igwaeya, “Loheya bewa meYudiya 'idi kini.”

39 Keloseyedi 'oidiyega 'aigeda togalaina Yesu 'iheliyeya, 'igwaeya, “To'aha weyahina 'owa To'abihetenaina, ma geya 'u'etopelegita?”

40 Ma togalaina heluwena 'iyanaina 'iheliyeya, 'igwae, “Togidega Yehoba geya 'umataute? Ma 'uhesagohe tatetoi 'ada loina 'aigeda tuwa si'ebwaegita, 41 ma loinaina 'owa ma taugu 'ilobwainegita, weyahina tauda togala, ma loheya bewa geya 'eta 'ina puimo.”

42 Coinega loheyaina Yesu 'ihegwaeya, “Yesu, 'abwa 'ino hetoloina 'ana tuta, sowasowahina ma 'unuwatuhugau?” 43 Ma Yesu 'igwaeya, “Yagwae moisa 'oiuwa, 'owa ma taugu tupwa 'ausalana 'oina nata tamiyamiya.”

Yesu 'ina 'amasa

(Madiu 27:45-56; Maki 15:33-41; Yoni 19:28-30)

44 Casudiladila ma sinala 'iguguyouwa, 'oinega tupwa mabwaiyana 'iguguyouwa ta 'ana siga lahilahiya 'asa 'i'asilala hila. 45 Ma 'ale'oina 'oinega Hada He'asisi sibiliupeya*, tutaina 'oina 'ilotaigala luwa. 46 Coinega Yesu 'enana madounega 'ibwauwa, 'igwaeya, “Tamagu yo, yaluyaluwagu nimauwa yalagulagu.” Cina gwae bewa 'igwaeneya ma yawasina 'igumwala.

47 Nage 'oina tolo'alehao 'adi tohanugeta 'i'iteya Yesu yawasina 'igumwala, 'oinega Yehoba 'ihepwatuweya 'igwaeya, “Moisa, loheya bewa loheya bwebwe'ana.”

48 Ma wete to'ebubuna mabwaiyadi tupwaina 'oina si'eto'autama Yesuina 'ina 'amasa si'iteya, ta ma'idi nuwagala sihila 'idi 'asa. 49 Ma Yesu 'iyanao ta wete wahiwahineyedi mwalo Galiliyega simuliyeyama, taudi bwaga sitotoholo ma Yesu 'ina 'amasa si'e'ebubu.

Yesu 'ana lagu taona

(Madiu 27:57-61; Maki 15:42-47; Yoni 19:38-42)

50 Caigeda loheya sanina Yosepa, Yudiya loheyaina 'ina 'asa 'i'iuna Alimatiya, tauna loheya bwebwe'ana ta ma'ana hemisa. Loheyaina meYudiya 'idi tohanugeta 'aigeda, ta 'iyamwayamwa ma to tuta Yehoba 'ihetoloina meYudiya 'oidiya. Mwalo tutaina tohanugetao nuwanuwadi ma Yesu silohe'amasi, ma Yosepaina geya nuwana. 52 Loheyaina Pailato 'oina 'itauya, ta Yesu wahina 'i'ahwanoiyeya ma 'abehega 'igalihe. 53 Coinega Pailato 'itagwala, ta Yosepa ma'iyanao Yesu wahina kelose 'oinega si'ewa suluheyama, ta siwaduhiya 'ale'o wa'ewa'e'ena 'oinega, ma muliyetega sigaliheya. Gogoina siyalaiya gide tuwa duluha dimwa 'alona, ma geya 'aigeda tuta to'amasa wahina 'oina silagu.

54 Sabwelo nage 'oina meYudiya 'idi tuta 'atububuna 'idi Sabati weyahina. 55 Ma wahiwahineyedi mwalo Galiliyega Yesu simuliyeyama taudi sitauya Yesu 'ana galiha si'iteya, ma wete wahina 'ana 'ebelagu si'iteya. 56 Coinega sihila 'asai ta holowa 'ausalana si'atububuya Yesu wahina 'ana holowa weyahina, ta sabweloina mulina si'aiyawasiya, weyahina Sabati gide 'ana loina.

Copyright information for `BDD